މުޣްނީގެ ކެމްޕެއިންގައި ބައިވެރި ނުވާނެކަމުގެ އިޝާރާތެއް ނަޝީދު ދެއްވައިފި

ގެވެށި އަނިޔާއަށް ތުހުމަތުކުރެވޭ މީހެއްގެ ކެމްޕެއިންގައި ބައިވެރިވެވަޑައިނުގަންނަވާނެކަމަށް ވިދާޅުވެ އެމްޑީޕީގެ ލީޑަރ ރައީސް މުހައްމަދު ނަޝީދު ގދ ތިނަދޫ އުތުރުދާއިރާއަށް ކުރިމަތިލައްވާފައިވާ އެމްޑީޕީގެ ކެންޑިޑޭޓް އަބްދުލް މުޣުނީއަށް މެސެޖެއް ދެއްވައިފިއެވެ. މުޣުނީގެ މައްޗަށް ސޯޝަލް މީޑިއާގައި އޭނާގެ ކުރީގެ އަންހެނުން ގެވެށިއަނިޔާގެ ތުހުމަތެއްކުރުމުން އެމްޑީޕީންވަނީ މުޣުނީއަށް ކުރިތާއީދު އަނބުރައިގެންގޮސްފައެވެ. ނަޝީދު އޭނާގެ ޓްވީޓާގައި ވިދާޅުވެފައިވަނީ އެމްޑީޕީގެ މެމްބަރަކަށް ގެވެށިއަނިޔާގެ ތުހުމަތެއް ކުރެވޭނަމަ އެބޭފުޅަކު އަމިއްލައަށް އެފަދަކަމެއް މީގެފަހުން ނުކުރާނެކަމަށް އެއްބަސްވުމާއެކު އެކަމަށް މައާފަށް އެދުމަށް އެމަނިކުފާނު އެދިވަޑައިގަންނަވާ ކަމަށެވެ. މިޓްވީޓްގައި ސާފުބަހުން ނަޝީދު މުޣުނީއަށް އެވިދާޅުވަނީ އޭނާ އޭނާގެ ކުރީގެ އަންހެނުންގެގާތުން މައާފް އެދުމަށެވެ.

މުޣުނީދަނީ އޭނާގެ މައްޗަށް ކުރާ ތުހުމަތަށް އިންކާރުކޮށްފައެވެ. އެމްޑީޕީގެ ބާރުގަދަ ކެންޑިޑޭޓެއްގެ ގޮތުގައި މުޣުނީ ތިނަދޫ އުތުރުދާއިރާއަށް އިންތިޚާބުވާން ކުރަމުންދިޔަ މަސައްކަތަށް ނަޝީދުގެ މިމެސެޖުން ވަރަށް ނޭދެވޭ އަސަރުކުރާނެކަމަށް ބެލެވެއެވެ. އިންތިޚާބުގެ މިހާ ހިސާބުން ޕާޓީން އޭނާއަށް ކުރި ތާއީދު އަނބުރައިގެންދިއުމުގެ ފަހަތުގައި ބޮޑުރޭވުމެއް ވާކަމަށް އޭނާއަށް ތާއީދުކުރާ މީހުން ތުހުމަތުކުރެއެވެ. އެއީ އެދާއިރާއަށް ދެން ކުރިމަތިލާފައިވާ ސައުދުﷲ ހިލްމީއަށް ދިން ހަދިޔާއެއްކަމަށާއި މިކަމުގައި ވަރަށް ގޮތް ނޭގޭ ކަންތައްތަކެއް ހިމެނޭކަމަށްވެސް މުޣުނީގެ ސަޕޯޓަރުން ދެކެއެވެ. މުޣުނީއަކީ އަދި އޭނާގެ ސަޕޯޓަރުންނަކީ އެމްޑީޕީގެ ދެގޮތެއްނުވާ ހާޑުކޯ ސަޕޯޓަރުންނަށް ވީހނދު ޕާޓީން ކުއްލިއަކަށް މިނިންމި ނިންމުމުން އެމީހުންތިބީ ހައިރާންވެފައެވެ.

ގެވެށިއަނިޔާގެ މައްސަލާގައި މުޣުނީއާމެދު މިހާ ހަރުކަށި ފިޔަވަޅެއްއެޅިއިރު ކުޑަ އަންހެންކުއްޖަކާއެކު ބަދުއަޚްލާގީ އަމަލުހިންގި އެޕާޓީގެ އިސްސަފުގެ މީހެއްގެ ޖަލު ހުކުމް އެމްޑީޕީގެ ސަރުކާރު އައުމާއެކު ރައީސް ލައްވައި މައާފްދީގެން ބަދަލުކޮށްލިގޮތް އެއީ ތިލަފަތުން ކިރައިގެން ގާއިމުކުރި ކޮން އިންސާފެއްތޯ މީހުން ސުވާލުކުރެއެވެ. ބަރީ މުޣުނީގެ މައްސަލަތޯއެވެ. ނުވަތަ ކުޑައަންހެންކުއްޖެއްގެ އިއްޒަތާއި ކަރާމަތަށް އަރައި ބަދުއަޚްލާގީ އަމަލު ހިންގައިގެން ގާނޫންގައި ކަނޑައެޅިފައިވާ ވަރުގަދަ އަދަބެއް ކުރިމަތިލާންޖެހުނު މީހާގެ މައްސަލަތޯއެވެ.