ވޭތުވެދިޔަ 4 މަސްތެރޭގައި މަޖިލީހުން ފެނިގެންދިޔައީ ރައްޔިތުންނަށް އުނދަގޫކުރާތަން: ރައީސް މުއިއްޒު
ވޭތުވެދިޔަ 4 މަސްތެރޭގައި މަޖިލީހުން ފެނިގެންދިޔައީ ތަރައްގީގެ ވިސްނުމެއްނެތި ރައްޔިތުންނަށް އުނދަގޫކުރާތަންކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެއެވެ.
ރައްޔިތުންގެ މަޖިލީސް އިންތިހާބުގައި ވާދަކުރައްވާ ފުވައްމުލަކު ދެކުނު ދާއިރާގެ ސަރުކާރުގެ ކެންޑިޑޭޓް، އިބްރާހީމް ހުސައިން ގެ ކެމްޕެއިން ޖަގަހަ ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، ދިވެހީންގެ ރާއްޖެއަށް ވާސިލުވުމަށް އެމަނިކުފާނު ފެއްޓެވި މަސައްކަތުގެ ދެބައިކުޅަ އެއްބައި ކާމިޔާބުކުރެވިފައިވާ ކަމަށާއި، މަޖިލީސް އިންތިހާބު ކާމިޔާބު ކުރެއްވުމުން ދިވްހިންގެ ރާއްޖެއަށް ވާސިލުވުމުގެ ފުރިހަމަ ކާމިޔާބީ ލިބިގެންދާނެ ކަމަށްވެ.
ރައީސް މުއިއްޒު އިތުރަށް ވިދާޅުވީ، މިފަދަ ތަރައްގީގެ މަސައްކަތްތައް މަޖިލީހުގެ ތެރެއިން ރައްޔިތުންނާ ބައިވެރިވާނެ ވިސްނުންފުޅު ހުރި ބޭފުޅުން ހޮއްވެވުމަކީ ޒަރޫރީ ކަމެއްގެ ގޮތުގައި ދެކެވަޑައިގަންނަވާ ކަމުގައެވެ.
ޒަރޫރީ ކަމަކަށްވަނީ، ކަންކަމުގެ ހަގީގަތް އަޅުގަނޑުމެން ބަލާލާއިރުގައި، ފެންނަން ހުރި ހަގީގަތްތަކުގެ ސަބަބުން. މި ވޭތުވެގެންދިޔަ ހަތަރު މަސްދުވަހުގެ ތެރޭގައި، އަޅުގަނޑުމެންނަށް ފެނިގެން ގޮސްފައި މިވަނީ، މި ވިސްނުމުގައި މަސައްކަތް ނުކުރާ ބަޔަކު ތިއްބަވައިގެން ރައްޔިތުންނަށް ކުރަމުންދިޔަ އުނދަގޫތައް. އަޅުގަނޑުމެން ފާސްކުރަން ބޭނުންވާ، ރައްޔިތުންނަށްޓަކައި ހުށަހަޅާ ބިލުތައް ތަޅުމުން ބޭރުކުރާތަން މިފެންނަނީ
ރައީސް ޑރ. މުޙައްމަދު މުއިއްޒު ވިދާޅުވިއެވެ
ރައީސް މުއިއްޒު ވިދާޅުވީ، މަޖިލީހުން އެންމެ ފަހުންވެސް ކުރެއްވި ކަމަކީ، ގައުމުގެ އިގްތިސާދު ރައްޔިތުންގެ ހައްގުގައި ހަރުދަނާކުރުމަށްޓަކައި ފެށީ އެންމެ މުހިއްމު މަސައްކަތް ސޮވެރިން ޑިވެލޮޕްމަންޓު ފަންޑު މިހާރަށްވުރެން ވަރުގަދަކޮށް އެ ފަންޑަށް ގާނޫނެއް ފާސްކުރުމަށް ފޮނުވި ބިލު ތަޅުމުން ބޭރުކޮށްލުން ކަމަށެވެ.
އެހެންކަމުން، ކުރިއަށް އޮތް މަޖިލީސް އިންތިހާބުގައި މަޖިލީހުން އެ ޢަމަލުކުރި ޣައިރު ޒިންމާދާރު ޢަމަލަށް ޖަވާބުދިނުމަށް ރައްޔިތުންގެ ކިބައިން ރައީސް މުއިއްޒު ވަނީ އެދިވަޑައިގެންފައެވެ.
ރައްޔިތުންގެ ޙައްގުގައި ބަސްބުނާ ކެންޑިޑޭޓުންނަށާއި ގައުމުގެ ތަރައްގީގެ މަސައްަތްތައް ރައްޔިތުންގެ ހައްގުގައި ކޮށްދެއްވާނެ ކެންޑިޑޭޓުން ހޮއްވެވުމަށް ރައީސް މުއިއްޒު ވަނީ އެދިވަޑައިގެންފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
