ޔޫރަޕުން މަހުގެ ބާވަތްތަކަށް ނަގާ ޑިއުޓީ ކުޑަކުރަން މަޝްވަރާކޮށްފި

ރާއްޖެއިން އުފައްދާ މަހުގެ ބާވަތްތަކަށް ޔޫރަޕުން ނަގާ ޑިއުޓީ ކުޑަކުރުމާ ގުޅޭގޮތުން، މަޝްވަރާ ކޮށްފިއެވެ.

މި މަޝްވަރާ ކުރެވިފައިވަނީ ގެންގޮސްފައިވަނީ ފޮރިން މިނިސްޓަރު މޫސާ ޒަމީރާއި ފްރާންސްއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޖީން ފްރާންސޯ ޕެކްޓެޓްއާ ދެމެދެ އިއްޔެ ބޭއްވުނު މަޝްވަރާ ބައްދަލުވުމުގެ ތެރެއިންނެވެ.

ފޮރިން މިނިސްޓްރީގައި ބޭއްވުނު މި ބައްދަލުވުމުގެ ތަފްސީލް ހިއްސާ ކުރަމުން ފޮރިން މިނިސްޓްރީން ބުނީ، ދިވެހިރާއްޖެއާއި ފްރާންސްއާއި ދެމެދު އޮންނަ ގާތް ގުޅުން ފާހަގަ ކުރައްވައި ގުޅުން އިތުރަށް ކުރިއެރުވުމަށް ކުރެވިދާނެ ކަންކަމާއި ގުޅޭ މަޝްވަރާތައް ކުރިއަށް ގެންދެވުނު ކަމަށެވެ.

މީގެ އިތުރުން އިގްތިސާދީ ތަރައްގީއާއި، މޫސުމަށް އަންނަ ބަދަލުތަކާއި ސަލާމަތީ އެއްބާރުލުމާއި، ދެ ގައުމުގެ ގުޅުން އިތުރުކުރުމާއި، ޔޫރަޕަށް ދަތުރުކުރުމަށް ރާއްޖޭގެ ރައްޔިތުންނަށް ފަސޭހަކޮށްދިނުމާ ބެހޭ ގޮތުންނާއި، ދިވެހިރާއްޖޭން ޔޫރަޕަށް އެކްސްޕޯޓްކުރާ މަހުގެ ބާވަތްތަކުންނަގާ ޑިޔުޓީ ކުޑަ ކުރުމަށް ވެސް މަޝްވަރާ ކުރެވުނުކަމަށް އެ މިނިސްޓްރީން ބުންޏެވެ.

ހަމައެހެންމެ ދެ ގައުމުގެ މަސްލަހަތު އޮތް ދާއިރާތަކުން ފްރާންސާ ގުޅިގެން މަސައްކަތް ކުރުމަށް ރާއްޖެއިން ތައްޔާރަށް އޮތް ކަމަށް މިނިސްޓަރ ވިދާޅުވެފައިވާއިރު, ދެގައުމުގެ އެއްބާރުލުން އިތުރުކުރުމަށް ރާއްޖޭގެ ސަރުކާރާ ގުޅިގެން މަސައްކަތް ކުރައްވަން ބޭނުންވާ ކަމަށް ސަފީރު ވަނީ ވިދާޅުވެފައެވެ.

ޔޫރަޕުން ރާއްޖޭގެ މަހުގެ ބާވަތްތަކަށް ނަގާ ޑިއުޓީ ކުޑަކުރުމަށް ނުވަތަ އެއްކޮށް ކަނޑާލުމަށް އެދި ކުރީގެ ސަރުކާރުން ގިނަ މަސައްކަތްތަކެއް ކޮށްފައިވެއެވެ. ނަމަވެސް އެކަން ކާމިޔާބު ވެފައެއް ނެތެވެ.