ރައީސްގެ ނިންމެވުމެއް: އައިނު ހެެއްދުމަށް އާސަންދައިން ދޭ އެހީ 2000ރ އަށް ބޮޑުކޮށްފި

އައިނު ހެއްދުމަށް އާސަންދައިން ދޭ އެހީ ބޮޑުކޮށް އެކަން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު މިރޭ އިއުލާނު ކުރައްވައިފި އެވެ.

އެމަނިކުފާނު މިކަން ޢިއުލާނު ކުރެއްވީ ދުނިޔޭގެ ސިއްހަތު ދުވަސް ފާހަގަ ކުރުމަށް މިރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ. މިހާރު އޮންނަ ގޮތަކުން އައިނު ހެއްދުމަށް އާސަންދައިން ދެނީ 1000 ރުފިޔާ އެވެ. އެ ފައިސާ ދެނީ ވެސް ދެ އަހަރުން އެއް އަހަރު އެވެ.

އެ އަދަދު 2000 ރުފިޔާއަށް ބޮޑު ކުރުމަކީ ރައީސް މުއިއްޒުގެ ރިޔާސީ ވައުދެކެވެ. މިރޭގެ ޖަލްސާގައި އެކަން ފާހަގަ ކުރައްވާ ރައީސް ވިދާޅުވީ އަންނަ މަހުގެ އެކަކުން ފެށިގެން އެކަން ތަންފީޒު ކުރުމަށް މިހާރު އަންގާފައިވާ ކަމަށެވެ.

"އެކަމަށްޓަކާ ހަދަން ޖެހޭ ހުރިހާ ހިސާބެއް ހަދާ ނިންމާ އަޅުގަނޑު ވާނީ ކަމާބެހޭ ފަރާތްތަކަށް މިއަދު ސިޓީ ފޮނުވާފައި ޖޫން އެކަކުން ފެށިގެން އައިނު ހެދުމަށް ދޭ 1000 ރުފިޔާ, 2000 ރުފިޔާއަށް ބޮޑު ކުރުމަށް," ރައީސް ވިދާޅުވި އެވެ.

ލޮލުގެ ތަފާތު މައްސަލަތަކާއި ގުޅިގެން އައިނު އަޅަން ޖެހޭ މީހުންގެ އަދަދު ދަނީ ދުވަހެއް ދުވަހަކަށް އިތުރުވަމުންނެވެ. އެކަން ދިމާވަނި ދިވެހީންގެ ދިރިއުޅުމުގެ ކަންކަން ހުންނަ ގޮތުން ކަމަށް ބެލެވެ އެވެ. ވަރަށް ޅަ އުމުރުގައި އައިނު އަޅަން ޖެހޭ ކުދީންގެ އަދަދު ދަނީ އިތުރު ވަމުންނެވެ.

އައިނު ހެއްދުމަށް ކުރަން ޖެހޭ ހޭދަ ބޮޑުވުމަކީ ވަރަށް ގިނަ ބައެއްގެ ކަންބޮޑުވުމެކެވެ.