އާރުޑީސީގެ ސައިޓްތަކުގައި މަސައްކަތްކުރާނޭ މީހުން ހޯދަނީ

ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އިން އަތޮޅުތަކުގައި ފެށުމަށް ތައްޔާރުވަމުންދާ އުމްރާނީ ބައެއް މަސައްކަތްތައް ކުރުމަށް މީހުން ހޯދުމަށް އިއުލާނުކޮށްފިއެވެ.

އާރުޑީސީން ވަނީ ތިން ރަށެއްގެ ސައިޓްތަކަށް ބޭނުންވާ މީހުން ހޯދުމަށް އިއުލާނުކޮށްފައިވާއިރު، އެރަށްތަކުގެ ތެރޭގައި ހިމެނެނީ، މ.ކޮޅުފުއްޓާއި، ނާލާފުށީގެ އިތުރުން، މުއްޔެވެ. އާރުޑީސީން އިއުލާނުކޮށްފައިވާ ވަޒީފާތަކުގެ ތެރޭގައި ސައިޓް ސުޕަވައިޒަރުންނާއި، ޕްރޮޖެކްޓް އެސިސްޓަންޓުންނާއި، އިންވެންޓަރީ މެނޭޖްމަންޓް އޮފިސަރުންގެ އިތުރުން، ބާބެންޑާ އަދި ޑްރައިވަރުން ހިމެނެއެވެ.

ސަރުކާރުން ވަނީ އަތޮޅުތެރޭގެ ގިނަ ރަށްތަކެއްގެ އުމްރާނީ ތަރައްޤީގެ މަޝްރޫޢުތައް ކުރިއަށްގެންދިއުމަށް އާރުޑީސީއާ ހަވާލުކޮށްފައެވެ. މިގޮތުން މިދިޔަ އޮގަސްޓްމަހުގެ ތެރޭގައިވެސް ސަރުކާރުން ވަނީ އާރުޑީސީއަށް 11 ރަށެއްގެ މަގުތައް ހެދުމުގެ މަސައްކަތް ހަވާލުކޮށްފައެވެ. އެ މަޝްރޫޢުތަކުގެ ޖުމްލަ އަގު 850 މިލިއަން ރުފިޔާއަށް އަރާއިރު، އާރުޑީސީން ދަނީ މަގުހެދުމުގެ އިތުރުންވެސް ފުޓްސަލް ދަނޑުތަކާއި އެނޫންވެސް އެފަދަ މަޝްރޫއުތައް ހިންގަމުންނެވެ.

ސަރުކާރުގެ އަމާޒަކީ ކުރިއަށް އޮތް ތިން އަހަރު ދުވަހުގެ ތެރޭގައި އަތޮޅުތެރޭގެ އުމްރާނީ މަސައްކަތްތަކުގެ މުހިއްމު ގިނަ މަޝްރޫޢުތައް ނިންމައި ރައްޔިތުންނަށް އެކަމުގެ ލުއިފަސޭހަކަން ހޯދައި ދިނުންކަމަށް ރައީސް ޑރ.މުއިއްޒު ވަނީ މީގެކުރިން ވިދާޅުވެފައެވެ.