އެސްޓީއޯއިން ފިޔާ، ބިސް ވިއްކަން ފެށުމާއެކު، އެތަކެތީގެ އަގުތައް ދަށަށްދާން ފަށައިފި

ރަމަޟާންމަހާ ދިމާކޮށް ބާޒާރުގައި އަސާސީ ބާވަތްތަކުގެ އަގުތައް ބޮޑުވިޔަ ނުދިނުމަށްޓަކައި އެސްޓީއޯއިން ފިޔާ، ބިސް އެތެރެކުރަން ފެށުމާއެކު އެތަކެތީގެ އަގުތައް ދަށަށްދާން ފަށައިފިއެވެ.

ނިމިގެންދިޔަ ހަފްތާގައި މާލޭގެ ބާޒާރުގެ އަގުތަކަށް ބަލާއިރު، ފިޔާ ކިލޯއެއްގެ އަގުހުރީ 20 ރުފިޔާ އާއި 30 ރުފިޔާ އާ ދެމެދުގެ އަގުތަކެއްގައެވެ. އަދި ކުކުޅު ބިހެއްގެ އަގު ހުރީ 2.50 ރުފިޔާއަށެވެ. އަދި ލުނބޯ ކިލޯއެއްގެ އަގުހުރި 70 ރުފިޔާއިން މަތީގައެވެ. ރަމަޟާންމަހާ ދިމާކޮށް ބާޒާރުގައި ދިވެހިން އެންމެ އާއްމުކޮށް ބޭނުންކުރާ ބާވަތްތަކުގެ އަގުތައް މައްޗަށް ދިއުމާއެކު، އެސްޓިއޯއިން ވަނީ ނިމިގެންދިޔަ ބައެއް ބާވަތްތައް ރާއްޖެ އެތެރެކޮށް ނިމިގެންދިޔަ ހަފްތާ ނިމެނިކޮށް ބާޒާރަށް ނެރެފައެވެ. އެސްޓިއޯއިން މިހާތަނަށް ބާޒާރަށް ނެރުނު ތަކެތީގެ ތެރޭގައި ފިޔާ، ބިސް، ކާށި ހިމެނެއެވެ.

އެސްޓީއޯއިން ފިޔާ ބާޒާރަށް ނެރުމާއެކު މިހާރު ބާޒާރުމަތީގެ އިތުރުން މާލެ އަދި ހުޅުމާލޭގެ ފިހާރަތަކުގައި އެންމެ އަގުބޮޑު ވެގެންވެސް ފިޔާ ކިލޯއެއް 18 ރުފިޔާއަށް ލިބެއެވެ. އެސްޓީއޯއިން ފިޔަ ކިލޯއެއް ވިއްކަމުންދަނީ 16 ރުފިޔާއަށެވެ. މާލޭ ބާޒާރުގައި ކުކުޅު ބިހުގެ އަގު 2.50 އެރިތާ ދުވަސްކޮޅެއް ވިއްޖެއެވެ. ނަމަވެސް މިހާރު ގިނަ ފިހާރަތަކުން ދެ ރުފިޔާއަށް ބިހެއް ލިބެއެވެ. ބާޒާރުގައި މިފަހުން އެންމެ އަގުއަރައިގެންދިޔަ އެކައްޗަކީ ކާއްޓެވެ. ދަތުރުވެރިންގެ މާރުކޭޓްގައި މިދިޔަ ހަފްތާގައި ކާށި ވިއްކަމުންދިޔައީ 10 ރުފިޔާ އާއި 35 ރުފިޔާ އާ ދެމެދުގެ އަގުތަކެއްގައެވެ. ނަމަވެސް އެސްޓީއޯއިން ވަނީ އަވައްތެރި އިންޑިއާއިން ކާށިގެނެސް ކާއްޓެއް 5 ރުފިޔާއަށް ވިއްކަން ފަށާފައެވެ.

އިކޮނޮމިކް މިނިސްޓްރީން ބުނީ ރޯދަމަހު ތަކެތީގެ އަގުތައް ބޮޑުވިޔަ ނުދިނުމަށްޓަކައި ހާއްސަ ފިޔަވަޅުތަކެއް އަޅަމުންދާނޭ ކަމަށާއި، ރޯދަމަހު އާއްމުކޮށް ބޭނުންކުރާ ކާބޯތަކެތީގެ އަގުތައް ބޮޑުވިނަ ނުދިނުމަކީ އެ މިނިސްޓްރީން ހާއްސަ އިސްކަމެއްދޭނޭ ކަމެއް ކަމަށެވެ. އެގޮތުން އެ މިނިސްޓްރީން މި މަސައްކަތްކުރަމުންދަނީ އެސްޓީއޯއާ ގުޅިގެންނެވެ.

އެސްޓީއޯއިން ވަނީ ހަތަރު ކެޓެގެރީ އަކަށް ބަހާލެވިގެން ކާބޯތަކެތި އެތެރެކުރުމަށް ތައްޔާރުވެފައެވެ. އެއީ:

އަސާސީ ކާބޯތަކެތި:  ފިޔާ، ބިސް އަލުވި، ކާށި، ކަދުރު

ތާޒާ ތަރުކާރީ އަދި މޭވާ: ލުނުމެދު، އިނގުރު، ލައިމް، ކެރެޓް، އޮރެންޖް، ކެބެޖް، މިރުސް، ފޭރު، ކަރާ، އަނބޫ، ޕެޝަންފުރުޓް، ކިއުކަންބާ

ޕްރޮސެސްޑް ކާނާ : ނެސްލޭ ކުރީމް، ކޮކޯ ޕައުޑަރ، ބޭކެޓް ބީންސް، ގެރިކިރު ދަޅު

ކެއްކުމަށް ބޭނުންކުރާތަކެތި:  ސަންފްލާވަރ އޮއިލް، ވެޖިޓަބަލް އޮއިލް، ބާސްމަތި ހަނޑޫ