ޝަރުއީ ކޯޓުތަކުން ރައްޔިތުންނާއި މެދު ތަފާތުކުރާ ކަމަށް ބުނެ ހުށަހެޅި މައްސަލަ ބޭރުކޮށްލައިފި

ޝަރުއީ ކޯޓުތަކުން ރައްޔިތުންނާއި މެދު ތަފާތުކުރާ ކަމަށް ބުނެ ހުށަހެޅި މައްސަލަ ރައްޔިތުންގެ މަޖިލީހުން ބޭރުކޮށްލައިފިއެވެ.

ކޯޓުތަކަށް ހުށަހެޅޭ މައްސަލަތަކުގައި ގަސްތުގައި އެކި މީހުން ތަފާތުކުރާކަން ފާހަގަކުރެވިފައިވާ ކަމަށް ބުނެ މަޖިލީހަށް މައްސަލައެއް ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމްއެވެ.

އެ މައްސަލައިގައި ބުނީ އެއްވެސް މީހަކާ މެދު ތަފާތުކޮށްގެން ނުވާނެކަން ގާނޫނުއަސާސީން ވަރަށް ސާފުކޮށް އެނގެން އޮތް ނަމަވެސް، ކޯޓުތަކަށް ހުށަހެޅޭ މައްސަލަތަކުގައި ގަސްތުގައި އެކި މީހުން ތަފާތުކުރާކަން މި ފަހުން ފާހަގަކުރެވިފައިވާ ކަމަށެވެ.

އަދި ޖިނާއީ ބޮޑެތި ކުށްތަކުގައި ތުހުމަތުކުރެވޭ މީހުންނަށް ކުރު މުއްދަތެއް އަދި ކުދިކުދި މައްސަލަތަކުގައި ހިމެނޭ މީހުންނަށް ދިގު މުއްދަތެއް ޖަހާކަމުގެ ކަންބޮޑުވުން އެ މައްސަލައިގައި މެންބަރު ވަނީ ފާހަގަކުރައްވާފައެވެ.

އެގޮތުން މައްސަލައިގައި މެންބަރު ފާހަގަކުރެއްވި ބައެއް ކަންކަމުގެ ތެރޭގައި:

- އެމްޑީޕީގެ ލޫޓުވައިފި އެއްވުމުން ހައްޔަރުކުރި މީހުން 15 ދުވަހަށް ބަންދުކުރި ނަމަވެސް، އޭޕްރީލް 18 ގައި ހިނގި ހައްވާ ޔުމްނު ރަޝީދުގެ މައްސަލައިގައި ހިމެނޭ ރައުދު އަޙްމަދު ޒިލާލު ތިން ދުވަހަށް ބަންދުކުރުމާއި

- އެއާޕޯޓުން ޑޮލަރުތައް ފޭރިގެން މައްސަލައިގައި ހައްޔަރުކުރި މީހުން އެންމެ ފަސް ދުވަހަށް ބަންދުކުރި ނަމަވެސް، ކެފޭއަކުން ކެއުމަށް ފަހު ފައިސާ ނުދައްކާ ދާން އުޅުނު މީހަކު 10 ދުވަހަށް ބަންދުކުރުމެވެ.

އެހެންކަމުން އެ ތަފާތުކުރުންތަކެއްގެ ގޮތުގައި ފާހަގަކުރައްވައި މެންބަރު ވަނީ އެ މައްސަލަ ހުށަހެޅުއްވީ އެކަން ސަރުކާރުގެ ސަމާލުކަމަށް ގެނައުމަށް ކަމަށެވެ.

އެހެން ނަމަވެސް ރިޔާސަތުގައި އިންނެވި އަބްދުއްރަހީމް އަބްދުﷲ ވަނީ އެ މައްސަލައަކީ ކުއްލި މައްސަލައެއްގެ ޝަރުތު ފުރިހަމަވާ މައްސަލައެއް ނޫން ކަމަށް ވިދާޅުވެ، އެ މައްސަލަ މަޖިލީހުން ބޭރުކުރައްވައިފައެވެ.