އޭޑީކޭއިން ގެއްލުނު މީހަކު ފެނުނީ ކަނޑުމަތިން!

އޭޑީކޭ ހޮސްޕިޓަލަށް ޑޮކްޓަރަށް ދައްކަން ގޮސް ހުއްޓައި ގެއްލިގެން ހޯދަމުންދިޔަ މީހަކު ކަނޑުމަތިން ފެނިއްޖެއެވެ.

57 އަހަރުގެ މި މީހާ ގެއްލިގެން ހޯދަން ފެށީ މިއަދު ހަވީރު 17:54 ހާއިރުން ފެށިގެންނެވެ. ބައެއް މީޑިޔާތަކުން ރިޕޯޓްކުރިގޮތުގައި އޭނާ އޭޑިކޭގައި ޑޮކްޓަރަށް ދައްކަން ގޮސް އިންދައި، ފާހަނާއަކަށް ދިއުމަށް ދިޔަ ގޮތަށް އަނބުރާ ނައުމުން އާއިލާއިން ހޯދަން ފެށިއެވެ.

އޭނާ ގެއްލުނު މައްސަލަ ފުލުހުންނަށް ހުށައަޅާފައިވަނީ މިރޭ 20:34ގައެވެ.

ފުލުހުން ބުނީ މާލެ ކައިރިން ކަނޑުމަތިން އެމްޓީސީސީ ފެރީއަކަށް މިރޭ 21:30 އެހާކަންހާއިރު އެމީހާ ފެނިގެން ނަގައިގެން ފުލުހުންގެ އިދާރާއަށް ގެެނެސްފައިވާ ކަމަށެވެ. އޭނާ ފެނުނު އިރު އޭނާގެ ހާލު ރަނގަޅެވެ.

މިވަގުތު އެމީހާގެ އާއިލާގެ މީހުންނާއި އެކު ފުލުހުންގެ އިދާރާގައި އެމީހާ ހުރިއިރު، މި މައްސަލަ ފުލުހުން ދަނީ ތަހުގީގުކުރަމުންނެވެ.