ބޭނުންވަނީ ރާއްޖޭގެ ޕަބްލިކް ސާވިސް އެއްކޮށް ޑިޖިޓަލައިޒް ކުރަން: ރައީސް މުޢިއްޒު

ރާއްޖޭގެ ޕަބްލިކް ސާވިސް ދާއިރާ އެއްކޮށް ޑިޖިޓަލައިޒް ކުރައްވަން ބޭނުންވެވަޑައިގަންނަވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ.

ރައީސް މުޢިއްޒު އެސްޓޯނިއާއަށް ކުރެއްވި ރަސްމީ ދަތުރުފުޅު ނިންމަވާލައްވަމުން ދައުލަތުގެ މީޑިއާއަށް ދެއްވި ޚާއްސަ ބަސްދީގަތުމެއްގައި ވިދާޅުވީ، އެސްޓޯނިއާ އަކީ ޕަބްލިކް ސާވިސް ޚިދުމަތްތައް އެއްކޮށް ޑިޖިޓަލައިޒް ކުރެވިފައިވާ ގައުމެއް ކަމަށެވެ. އެހެންކަމުން، ރާއްޖެއިންވެސް އެ ގައުމު ނަމޫނާއަކަށް ބަލައި، ޕަބްލިކް ސާވިސް ހުރިހާ ޚިދުމަތެއް ޑިޖިޓަލައިޒް ކުރައްވަން ބޭނުންފުޅުވާ ކަމަށް ރައީސް ވިދާޅުވިއެވެ.

ހުރިހާ ޕަބްލިކް ސާވިސްއެއް، ސަރުކާރުންދޭ ޚިދުމަތްތަކެއް 100 ޕަސެންޓް ޑިޖިޓަލައިޒް ކުރަން ބޭނުން

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

އެއާއެކު، އެތައް އަހަރުތަކެއް ވަންދެން ކަރުދާހުގައި އެއްކުރެވިފައި ހުރި، މައުލޫމާތުތައް ޑިޖިޓަލައިޒް ކޮށް ޑިޖިޓަލް އާކައިވް އަކަށް ހަދަން ބޭނުންވެވަޑައިގަންނަވާ ކަމަށް އެމަނިކުފާނު ވިދާޅުވިއެވެ.

މީގެ އިތުރުން ޑިޖިޓަލް ދާއިރާއިން ރާއްޖޭގެ އިގްތިޞާދު ފުޅާކުރަން ބޭނުންވެވަޑައިގަންނަވާ ކަމަށްވެސް އެމަނިކުފާނު ވިދާޅުވިއެވެ.

އަޅުގަނޑު ކަނޑައަޅާފައި އޮންނާނެ، 2030 އަށް، ކުރިއަށް އޮތް ފަސް އަހަރުގެ ތެރޭގައި ތަރައްގީ ކުރަމުންގޮސް މަދުވެގެން %15 އަޅުގަނޑުމެންގެ ޖީޑީޕީއަށް ހިއްސާކުރާނީ ޑިޖިޓަލް އިކޮނަމީ ކަމަށް.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

ރައީސް މުޢިއްޒު އެސްޓޯނިއާއަށް ކުރެއްވި ދަތުރުފުޅުގައި ޑިޖިޓަލައިޒޭޝަން، ތިމާވެށި އަދި ސިޔާސީ މަޝްވަރާގެ ދާއިރާތަކުން އެއްބަސްވުންތަކެއްގައި ވަނީ ސޮއިކުރައްވާފައެވެ.