ދާހިލީ ވަޒީރު އަލީ އިހުސާނުގެ އިތުބާރު ނެތްކަމުގެ މައްސަލަ މަޖިލީހަށް ހުށަހަޅަނީ!

ހޯމް މިނިސްޓަރު އަލީ އިހުސާނުގެ އިތުބާރުނެތްކަމުގެ މައްސަލަ ރައްޔިތުންގެ މަޖިލީހަށް ހުށަހެޅުމަށް، އިދިކޮޅު އެމްޑީޕީން ނިންމައިފިއެވެ.

އެމްޑީޕީ ޕީޖީ ގްރޫޕުން ބޭއްވި ބައްދަލުވުމަށްފަހު މިގޮތަށް ނިންމާފައިވަނީ، އައިޑީކާޑު ޔުނިޓް، ޑިޕާޓްމަންޓް އޮފް ނެޝަނަލް ރެޖިސްޓްރޭޝަންގެ ޑޭޓާތަކެއް ބޭނުންކޮށްގެން ވެރިކަންކުރާ ޕީއެންސީއަށް މެމްބަރުންތަކެއް އޮޅުވާލައިގެން ވެއްދި މައްސަލާގައެވެ.

މި މައްސަލަ ކުށްވެރިކޮށް އެމްޑީޕީން މިނިސްޓަރު އިހުސާނުގެ މައްސަލަ ބަލައިދިނުމަށް ކަމާބެހޭ ފަރާތްތަކަށްވެސް ގޮވާލާފައެވެ.

އެމްޑީޕީން ނެރުނު ބަޔާނުގައި ބުނެފައިވަނީ، ޕީއެންސީއަށް މެމްބަރުން އިތުރުކުރުމަށް ހިންގި ހަރަކާތުގައި ސައްހަނޫން ފޯމްތަކެއް ފުރުމަށްފަހު އިލެކްޝަނަށް ހުށަހަޅާފައިވާކަމަށެވެ. އަދި އެކަން ކުރިކަމަށް އިލެކްޝަނުގެ ބަހުންނާއި، ޕީއެންސީގެ އަމިއްލަ އިއުތިރާފުން ވަނީ ޝައްކެއްނެތް މިންވަރަށް އޮޅުންފިލާފައި ކަމަށެވެ.

އެމްޑީޕީން ބުނީ، މިކަން ހިނގާދިޔައީ އެކިފަރާތްތަކުން ހުށަހަޅާ ފޯމްތަކުގެ ސައްހަކަން ކަށަވަރުކުރުމުގެ ގާބިލުކަން އެޕާޓީގައި ނެތުމުގެ ސަބަބުން ކަމަށް ޕީއެންސީން ބުނިނަމަވެސް މިކަމަކީ ގަސްދުގައި ރާވައިގެން ހިންގި ޖަރީމާއެއްކަން މިހާރު ހާމަވެފައިވާކަމަށް އެމްޑީޕީގެ ބަޔާނުގައި ބުންޏެވެ. އެމްޑީޕީން ބުނީ މިކަން ކުރުމުގައި ދާހިލީވަޒީރު އިސްދައުރެއް އަދާކޮށްފައިވާތީ އެޕާޓީގެ ފަރާތުން އެކަން ނިހާޔަތަށް ކުށްވެރިކުރާ ކަމަށާއި، ވަޒީރުންނަކީ މަގާމުގެ މަސްއޫލިއްޔަތު އަދާކުރުމަށް ﷲ ގަންދީ ހުވައެއްކޮށްގެން ތިބި ބަޔަކަށްވާއިރު، މިއީ އެކިކަންކަމަށް ސަރުކާރަށް ލިޔެކިޔުން ހުށަހަޅާ ދިވެހިރައްޔިތުންގެ ޒާތީ މައުލޫމާތުން ވައްކަންކުރުމުގައި މިނިސްޓަރު އިހުސާނުގެ ބައިވެރިވުން އޮތްކަމީ ވަޒީރު ކުރެއްވި ހުވަޔާވެސް ހިލާފް އަމަލެއް ކަމަށެވެ.

ސޯޝަލް މީޑިއާގައި މިހާރު އާއްމުވެފައިވާ މަންޒަރުތަކަށް ބަލާއިރު އައިޑީކާޑު ޔުނިޓުގެ މުއައްޒަފުންނާއި ވަސީލަތްތައް ބޭނުންކޮށްގެން އެކަންކޮށްފައިވަނީ ސީދާ މިނިސްޓަރު އިހުސާނުގެ ބެއްލެވުމުގެ ދަށުންކަން އެމްޑީޕީ ބަޔާނުގައި ވަނީ ފާހަގަކޮށްފައެވެ. އެމްޑީޕީން ވަނީ މިނިސްޓަރު އިހުސާނުގެ މި މައްސަލަ ބެލުމަށް ފުލުހުންނަށް ގޮވާލާފައެވެ. އަދި ހޯމް މިނިސްޓަރުކަމުގައި ހުންނަވައިގެން އެ މައްސަލަ ބެލުމަކީ މުސްތަހީލް ކަމަކަށްވާތީވެ، މައްސަލައިގެ މިނިވަން އިންސާފުވެރި ތަހުގީގެއްކުރުމަށް މިނިސްޓަރު މަގާމުން ވަކިކުރުމަށް އެމްޑީޕީން ވަނީ ސަރުކާރަށް ގޮވާލާފައެވެ.

އަދި ދައުލަތުގެ ވަސީލަތްތައް ބޭނުންކޮށްގެން ވަކިބަޔަކަށް މަންފާއެއް ހޯދައިނުމަށް ކޮށްފައިވާ ކަމަކަށްވާތީވެ އެމްޑީޕީން ވަނީ އޭސީސީއަށްވެސް މިނިސްޓަރު އިހުސާނުގެ މައްސަލަ ބަލައިދިނުމަށް ގޮވާލާފައެވެ.