ފަނޑިޔާރުން ވަކިކުރުމުގެ މަސައްކަތް ފެށިތާ ދެމަސް ފަހުން އެޗްއާރްސީއެމް ހޭލައިފި؛ އެދުނީ ޙައްޤުތައް ކަށަވަރުކުރަން!

ސްޕްރީމް ކޯޓުގެ ބެންޗުގައި ހިމެނިވަޑައިގަންނަވާ ތިން ފަނޑިޔާރަކު ސަސްޕެންޑްކޮށް އެ ފަނޑިޔާރުން ވަކި ކުރުމުގެ މަސައްކަތް ފެށިތާ ދެމަސް ދުވަހަށްވުރެ ގިނަ ދުވަސް ވެފައިވަނިކޮށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) ހޭލައި އެކަމާއި ކަންބޮޑުވުން ފާޅުކޮށްފިއެވެ.

ރައްޔިތުންގެ މަޖިލީހަށް އިންތިޚާބުވި ޕާޓީއިން ރައްޔިތުންގެ މަޖިލީހުގެ މެންބަރަކު ވަކިކޮށްފިނަމަ ނުވަތަ ވަކިވެއްޖެނަމަ އެ މެންބަރެއްގެ ގޮނޑި ގެއްލޭ ގޮތަށް ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް ގެނެވުނު އިޞްލާޙު ބާޠިލުކުރުމަށް ދިވެހިރާއްޖޭގެ ސުޕްރީމް ކޯޓަށް ދުސްތޫރީ މައްސަލައެއް ހުށަހަޅުއްވާފައިވަނިކޮށް، ދިވެހިރާއްޖޭގެ ސުޕްރީމް ކޯޓުގެ ފަނޑިޔާރުންގެ ޤާނޫނީ އަދަދު މަދުކުރުމަށް ކަނޑައަޅައި، ގާނޫނަށް އިސްލާހުގެނައުމުގެ ބިލު 26 ފެބުރުވަރީ 2025ގައި ރައްޔިތުންގެ މަޖިލީހުން ވަނީ ފާސްކޮށްފައެވެ.

އަދި، ހަމަ އެދުވަހު ތާވަލުކޮށްފައިވާ ދުސްތޫރީ މައްސަލައިގެ ޝަރީއަތުގެ މަޖިލިސް ފެށުމަށް ކުޑަތަންވެފައިވަނިކޮށް، ދިވެހިރާއްޖޭގެ ސުޕްރީމް ކޯޓުގެ ފަނޑިޔާރުންގެ ތެރެއިން ފަނޑިޔާރު އަލްއުސްތާޛު ޙުސްނުއް ސުޢޫދު، ފަނޑިޔާރު އަލްއުސްތާޛު މަޙާޒު ޢަލީ ޒާހިރު އަދި ފަނޑިޔާރު ޑރ. އަޒްމިރާލްދާ ޒާހިރު ސަސްޕެންޑް ކުރެއްވުމަށް ޖުޑީޝަލް ސަރވިސް ކޮމިޝަނުން ވަނީ ނިންމާފައެވެ.

ފަނޑިޔާރުން ވަކިކުރުމުގެ މައްސަލާގައި ކަންބޮޑުވުން ފާޅުކޮށް މިއަދު އެޗްއާރްސީއެމުން މިއަދު ނެރުނު ނޫސްބަޔާނުގައިވަނީ، އެފަދައިން ކަން ކުރުމުން، އެއީ އެ ދުސްތޫރީ މައްސަލައިގައި ޝަރީޢަތްކުރައްވާ ފަނޑިޔާރުންނަށާއި އެމައްސަލާގެ އިޖުރާޢަތުތަކަށާއި ނިންމުންތަކަށް ނުރަނގަޅު ނުފޫޒު ފޯރުވުމަށް ކޮށްފައިވާ ކަމެއްކަމުގައި ބެލުމުގެ އިހުތިމާލު ފާޅުކަން ބޮޑު ގޮތެއްގައި އޮތް ކަމަށެވެ. އަދި އެއީ، އެ ކޮމިޝަނުން ކަންބޮޑުވާ ކަމެއްކަމުގައިވެސް ބުންޏެވެ.

މިއާއެކު އެޗްއާރުސީއެމުން ބުނީ، ފަނޑިޔާރު އަލްއުސްތާޛު މަޙާޒު ޢަލީ ޒާހިރު އަދި ފަނޑިޔާރު ޑރ. އަޒްމިރާލްދާ ޒާހިރު ދިވެހިރާއްޖޭގެ ސުޕްރީމް ކޯޓުގެ ފަނޑިޔާރުކަމުން ވަކިކުރުމަށް ނިންމެވުމުގައި ޖުޑީޝަލް ސަރވިސް ކޮމިޝަނުންނާއި ރައްޔިތުންގެ މަޖިލީހުގެ ޖުޑީޝަރީ ކޮމިޓީއިން ޢަމަލުކޮށްފައިވާފައިވާ ގޮތާއި އިޖުރާޢަތުތައް ތަރުތީބުކުރި ގޮތުގެ ސަބަބުން ވަރަށް ކަންބޮޑުވާ ކަމަށެވެ.

އެއްވެސް ފަނޑިޔާރަކު އެފަނޑިޔާރުގެ މަޤާމުން ވަކިކުރަންވާނީ ނުވަތަ ސަސްޕެންޑް ކުރަންވާނީ، އެފަނޑިޔާރުގެ މަސްއޫލިއްޔަތުތަކާއި ވާޖިބުތައް އަދާކުރުމަށް ނުކުޅެދުން ނުވަތަ ފަނޑިޔާރުކަމާއި އެކަށީގެންނުވާ ޣައިރުސުލޫކީ ޢަމަލެއް ހިންގުމުގެ ސަބަބުން، އެފަނޑިޔާރުގެ މަސްއޫލިއްޔަތުތަކާއި ވާޖިބުތައް އަދާކުރުމަށް ނާޤާބިލުކަމަށް ފެނިއްޖެ ޙާލަތެއްގައި އެކަނި

އެޗްއާރްސީއެމް

އެހެންކަމުން، ފަނޑިޔާރެއް އެފަނޑިޔާރުގެ މަޤާމުން ވަކިކުރުމުގެ ބޭނުމަށް ކުރެވޭ ތަޙްޤީޤުގައި، އެފަނޑިޔާރެއް މަޤާމުން ވަކިކުރުމަށް ނިންމާ ނިންމުމުގެ އެންމެހައި އިޖުރާޢަތުތައް ތަރުތީބުކުރަންވާނީ، ތަބީޢީ އިންސާފުގެ ހަމަތަކާއި އުސޫލުތަކާއި، އިޖުރާޢީ ޢަދުލުވެރިކަން ޤާއިމުކުރުމުގައި ތަތުބީޤުކުރުން ލާޒިމު ހަމަތަކުގެ މައްޗަށް ކަމަށް އެ ކޮމިޝަނުން ބުނެފައިވެއެވެ. އަދި އެޤައުމެއްގެ ޤާނޫނުތަކާއި ގަވާއިދުތަކުގައި ކަނޑައަޅާފައިވާ އިޖުރާޢަތުތަކާ އެއްގޮތްވާ ގޮތުގެ މައްޗަށް ކަމަށްވެސް ބުންޏެވެ.

ކަންމިހެން ހުރި ނަމަވެސް، ޖުޑީޝަލް ސަރވިސް ކޮމިޝަނުން ކުރިއަށް ގެންދިޔަ ތަޙްޤީޤުތަކަށް ފަނޑިޔާރުންނަށް ޖަވާބުދާރީވުމުގެ ފުރުޞަތު އެކަށީގެންވާ ގޮތުގައި ލިބިދީފައިނުވާކަމަށާއި، ތުހުމަތު ކުރެވޭ މައްސަލަ ބިނާކުރި ސަބަބުތައް ސާފުކޮށް އޮޅުންފިލުވައިދީފައި ނުވާއިރު، ޤާނޫނީ ވަކީލެއްގެ އެހީތެރިކަން ހޯދައި ލިބިގަތުމަށް ހުރަސްއަޅާފައިވާކަމަށް ބުނެ ފަނޑިޔާރުން ކަންބޮޑުވުން ފާޅުކުރައްވާފައިވާ ކަން އެޗްއާރްސީއެމުން ފާހަގަކުރިއެވެ.

އެފަހުން، ފަނޑިޔާރުން ވަކިކުރުމުގެ މައްސަލަ ރައްޔިތުންގެ މަޖިލީހަށް ހުށަހެޅުމުން، ރައްޔިތުންގެ މަޖިލީހުގައިވެސް ޖަވާބުދާރީވުމުގެ އެއްވެސް ފުރުޞަތެއް ދެއްވުމަކާ ނުލައި، ޖުޑީޝަރީ ކޮމިޓީގެ ބައްދަލުވުންތައްވެސް ސިއްރުކޮށް، ފަނޑިޔާރުން ވަކި ކުރުމަށް އެކޮމިޓީއިން ފާސްކުރައްވާފައިވާތީ   އެކަމާވެސް ނުހަނު ކަންބޮޑުވާ ކަމަށް އެޗްއާރްސީއެމުން ބުންޏެވެ.

ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު އަލްއުސްތާޛު މަޙާޒު ޢަލީ ޒާހިރު އަދި ފަނޑިޔާރު ޑރ. އަޒްމިރާލްދާ ޒާހިރު، މަޤާމުން ވަކިކުރުމާމެދު ރައްޔިތުންގެ މަޖިލީހުން ގޮތެއް ނިންމެވުމުގެ ކުރިން، ހާމަކަމާއެކު ކުރިއަށް ގެންދެވޭ އިޖުރާޢަތުގެ ތެރެއިން، ޢަދުލު އިންސާފުގެ ހަމަތަކާ އެއްގޮތަށް، ޖަވާބުދާރީވުމުގެ އެކަށީގެންވާ ފުރުޞަތު އެފަނޑިޔާރުންނަށް ފަހިކޮށްދެއްވައި، ޢަދުލުވެރި އަދި ތަޢައްޞުބުން އެއްކިބާވެފައިވާ ނިންމެވުމަކަށް ވާސިލުވެވޭނެ ގޮތެއްގެ މަތީން، އެ ފަނޑިޔާރުންގެ އަސާސީ ޙައްޤުތައް ރައްކާތެރިކޮށް ކަށަވަރުކޮށްދެއްވުމަށް މިކޮމިޝަނުން އިލްތިމާސްކުރަމެވެ

އެޗްްއާރްސީއެމް

މިއާއެކު އެ ކޮމިޝަނުން ވަނީ، ދިވެހިރާއްޖޭގެ ދުސްތޫރީ އަދި ދިމިޤްރާތީ އުސޫލުތަކާއި، ޤާނޫނުގެ ވެރިކަން ނަގަހައްޓައި، ދިވެހި ދައުލަތުގެ ތިން ބާރު ވަކިވެފައިވާ ނިޒާމަށް އިޙްތިރާމްކުރުމާއެކު، ބައިނަލްއަޤްވާމީ އިލްތިޒާމުތައް ކަށަވަރުކުރުމަށް އެންމެހައި ދައުލަތުގެ މުއައްސަސާތަކަށް ގޮވާލާފައެވެ.