އިންސްޓެގްރާމް މިފަހަރު ހަނގާ ކުރުމާއި ދެކޮޅަށް!

އިންޓަރނެޓަކީ މީގެ އަހަރުތަކެއް ކުރިއާއި އަޅާ ކިޔާލާއިރު މިހާރު ވަރަށް ތަފާތު އެއްޗަކަށް ވެއްޖެއެވެ.

އިންޓަރނެޓް މެދުވެރިކޮށް ބޭނުން ކުރެވޭ މީސްމީޑިއާގެ އެކި ވަސީލަތްތައް އިތުރުވެ، މީހުންނަށް މަލާމަތް ކުރުމާއި ބުލީ ކުރުން މިވަނީ ވަރަށް އާއްމު ކަމަކަށް ވެފައެވެ. އިންޓަރނެޓަށް ލޮގިންވާ ކޮންމެ ފަހަރަކު އެފަދަ ކަމަކާއި ކުރިމަތިލައި، ނުވަތަ އެފަދަ ކަމެއް އެހެން މީހަކަށް ކުރިމަތިވާ މަންޒަރު ނުފެނި ދާނީ ވަރަށް މަދު ފަހަރެއްގައެވެ. ބުލީގެ ޝިކާރައަކަށް ވާ މީހުންގެ ތެރޭގައި އެންމެ މަޝްހޫރު ސެލެބްރިޓީންވެސް ހިމެނެއެވެ.

ބުލީ ކުރުން އެންމެ ބޮޑަށް އާއްމުވެފައިވަނީ އިންސްޓެގްރާމްގައެވެ. ފަހުގެ ދިރާސާއަކުން ދައްކާ ގޮތުން އިންސްޓެގްރާމް ބޭނުންކުރާ މީހުން ބުލީގެ ޝިކާރައަކަށް ވާލެއް ގިނަކަމުން، އެންމެ ގިނަ ބަޔަކަށް އެންމެ ކަމުނުދާ އެޕަށް އިންސްޓެގްރާމް ވަނީ ވެފައެވެ. އެގޮތުން، އެންމެ މަޝްހޫރު ފަސް އެޕްގެ ތެރެއިން( ފޭސްބުކް، ސްނެޕްޗެޓް، ޓްވިޓަރ ހިމެނޭގޮތަށް) އެންމެ ގިނަ ބަޔަކަށް ކަމުނުދާ އެޕަކަށް ހޮވިފައިވަނީވެސް އިންސްޓެގްރާމްއެވެ.

އެކަމާއި ގުޅިގެން ފޮޓޯ ޝެއާ ކުރެވޭ އިންސްޓެގްރާމްއިން ދާދި ފަހުން މިވަނީ މުޅިން އާ ފީޗަރއެއް އީޖާދު ކޮށްފައެވެ. އެ ފީޗާގެ މަގްސަދަކީ އިންސްޓެގްރާމް އަކީ ނެގެޓިވިޓީއާއި ދުރު އަދި ވީހާވެސް ޕޮޒިޓިވް އެއްޗެއްގެ ގޮތުގައި ބޭނުންކުރެވޭނެ ގޮތް ހެދުމެވެ.

އެގޮތުން އިންސްޓެގްރާމްއިން ލޯންޗުކުރި "އެންޓި-ބުލީން ޓޫލް" އަކީ މީހަކަށް ނިސްބަތްކޮށް މަލާމާތުގެ ބަހެއް، ނުވަތަ ނަފްރަތުގެ ބަހެއް ބުނުމުގެ ކުރިން އެކަމާއި މެދު ވިސްނުމަށް އެދޭ ފީޗާއެކެވެ. އެފަދަ ކޮމެންޓެއް ކުރުމުގެ ކުރިން، ހަމަ ހަގީގަތުގައިވެސް އެ ކޮމެންޓް ކުރަން ބޭނުންތޯ އިންސްޓެގްރާމްއިން ސުވާލު ކުރާނެއެވެ.

"ރެސްޓްރިކްޓް" ކިޔާ މި ފީޗާގައި ވާގޮތަކީ "ޔޫ އަރ ސޯ އަގްލީ" އެފަދަ ކޮމެންޓެއް ކުރަން އުޅުމުން، އިންސްޓެގްރާމްގެ އާޓިފިޝަލް އިންޓެލިޖެންސުން އެކޮމެންޓް ދެނެގަންނަނީއެވެ.

"އާ ޔޫ ޝުއަރ ޔޫ ވޯންޓު ޕޯސްޓް ދިސް ކޮމެންޓް؟" އެފަދަ ކޮމެންޓެއް ކުރަން އުޅެފިނަމަ އެ ސުވާލު ކުރިމަތިވާނެއެވެ.

ބުލީ ކުރުމާއި ދެކޮޅަށް އިންސްޓެގްރާމްއިން ލޯންޗުކުރި އާ ފީޗާއަށް އަންނަނީ ބޮޑު ތަރުހީބެއް ލިބެމުންނެވެ. އެހެނީ މީހުންނަށް ފުރައްސާރަ ކުރުމުގެ ކުރިން އެކަން ކުރަން ބޭނުންތޯ އެހުމަކީ އެކަމުގެ ސަބަބުން އެފަދަ ކޮމެންޓެއް ކުރަން އުޅޭ މީހާގެ ވިސްނުން ބަދަލުވާނެ ކަމެކެވެ.