ދިވެހިރާއްޖެއާއެކު ގުޅުން އިތުރަށް ބަދަހިކުރާނަން: ސްރީލަންކާގެ އާ ރައީސް

ރާއްޖެ އާއި ސްރީ ލަންކާ ދެމެދު އޮތް ތާރީޚީ އަދި ޒަމާންވީ ގުޅުން އިތުރަށް ބަދަހި ކުރައްވާނެ ކަމަށް އެ ގައުމުގެ އާ ރައީސް އަނޫރާ ކުމާރަ ޑިސަނަޔަކަ ވިދާޅުވެއްޖެއެވެ.

ސްރީލަންކާގެ އަލަށް އިންތިޚާބުވި ރައީސް އަނޫރާ ކުމާރަ ޑިސަނަޔަކަ ވަނީ ދިވެހިރާއްޖެއާއެކު އޮތް ގުޅުން އިތުރަށް ހަރުދަނާކުރައްވާނެ ކަމުގެ ޔަޤީންކަން ދެއްވާފައެވެ. މިކަން އޭނާ ފާހަގަކުރެއްވީ، ރިޔާސީ އިންތިޚާބުގައި ކާމިޔާބު ހޯއްދެވުމާ ގުޅިގެން ރައީސް ޑރ. މުޙައްމަދު މުޢިއްޒު "އެކްސް" ގައި ކުރެއްވި ޕޯސްޓަކަށް ޖަވާބު ދެއްވަމުންނެވެ.

ރައީސް މުޢިއްޒުގެ ޕޯސްޓުގައި، އަނޫރާގެ ވެރިކަމުގައި ދެ ގައުމުގެ ގާތް ގުޅުން އިތުރަށް ވަރުގަދަކުރުމަށް ގުޅިގެން މަސައްކަތްކުރުމަށް ތައްޔާރަށް ހުންނެވި ކަމަށް ވިދާޅުވެފައިވެއެވެ.

މި ޕޯސްޓު ރީޕޯސްޓުކުރައްވައި، އަނޫރާ ވަނީ ރައީސް މުޢިއްޒަށާއި ދިވެހި ރައްޔިތުންނަށް ޝުކުރު ދަންނަވާފައެވެ. އިތުރަށް އޭނާ ވިދާޅުވީ، ދެ ގައުމުގެ ދެމެދުގައިވާ ތާރީޚީ ގުޅުން އިތުރަށް ބަދަހިކޮށް، ސަރަޙައްދީ ކަންކަމުގައި ގުޅިގެން މަސައްކަތްކުރުމުގެ ފުރުޞަތު ލިބިވަޑައިގަތުމުން އުފާކުރައްވާ ކަމަށެވެ.

55 އަހަރުގެ އަނޫރާ ވަނީ އިޤްތިޞާދީ ހީނަރުކަމުގައި ސްރީލަންކާ ބަނގުރޫޓުވި ފަހުން ބޭއްވުނު ފުރަތަމަ ރިޔާސީ އިންތިޚާބުގައި ނޭޝަނަލް ޕީޕަލްސް ޕަވަރ (އެންޕީޕީ) ކޯލިޝަންގެ ކެންޑިޑޭޓެއްގެ ގޮތުގައި ވާދަކުރައްވައި، ވޯޓުގެ 55.89 އިންސައްތައަށް ވުރެ ގިނައިން ހޯއްދަވައި ކާމިޔާބު ހޯއްދަވާފައެވެ.

ކުރިން މާ މަޤްބޫލުނޫން ލީޑަރެއްގެ ގޮތުގައި ހުންނެވި އަނޫރާއަށް މިފަހަރު ކުއްލި މަޤްބޫލުކަމެއް ލިބިވަޑައިގަތީ ކޮރަޕްޝަނާ ދެކޮޅަށް ކެމްޕޭނުގައި ދެއްކެވި ވަރުގަދަ ވާހަކަތަކާއި، ފަޤީރުންގެ ދިރިއުޅުމުގެ ފެންވަރު ރަނގަޅުކުރެއްވުމަށް ވެވަޑައިގެންނެވި ވަޢުދުތަކާ ގުޅިގެންނެވެ.