ރައީސް ޑރ.މުއިއްޒު އައްޑޫ ސިޓީ އަށް ވަޑައިގެންފި

ރައީސުލްޖުމްހޫރިއްޔާ ޑރ. މުހައްމަދު މުއިއްޒު، އައްޑޫ ސިޓީ އަށް ވަޑައިގެންފިއެވެ.

މިއަދު ހެނދުނު ރައީސް ޑރ.މުއިއްޒު މިސިޓީ އަށް ވަޑައިގެންނެވުމާއި އެކު އެ ސިޓީގެ ރައްޔިތުން ވަނީ އެމަނިކުފާނަށް ވަރަށް ހޫނު މަރުހަބާއެއް ދަންނަވާފައެވެ.

އައްޑޫ ސިޓީއަށާއި ފުވައްމުލައް ސިޓީގެ އިތުރުން ހުވަދުއަތޮޅު އުތުރުބުރިއާއި ހުވަދު އަތޮޅު ދެކުނުބުރީގެ ބައެއް ރަށްތަކަށް ރައީސް ޑރ.މުއިއްޒު މިއަދު ފެއްޓެވި ދަތުރުފުޅުގެ ތެރެއިން އެ ރަށްރަށުގެ ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކާ ބައްދަލުކުރައްވާނެ ކަމަށް ރައީސް އޮފީހުން މައުލޫމާތު ދެއެވެ.

މީގެ އިތުރުންވެސް، މި ދަތުރުފުޅުގައި ސިޓީތަކާއި ރަށްރަށުގެ ރައްޔިތުންނާއި، ރައީސް ޑރ.މުއިއްޒު ބައްދަލު ކުރައްވާ، ތަރައްޤީއަށް އެންމެ މުހިންމު މަޝްރޫޢުތަކާއި، ރައްޔިތުންނަށް އެންމެ ބޭނުންވެފައިވާ ކަންކަމާ ގުޅޭގޮތުން މަޝްވަރާ ކުރެއްވުމަށް ވެސް ވަނީ ހަމަޖެހިފައެވެ.

ސިޓީތަކާއި ރަށް ރަށަށް ރައީސް ޑރ.މުއިއްޒު މިހާރު ކުރައްވަމުންގެންދަވާ ދަތުރުފުޅުގައި، އެމަނިކުފާނުގެ އަރިހުގައި ސަރުކާރުގެ މަތީ ފަންތީގެ ވަފުދެއް ބައިވެރިވެ ވަޑައިގަންނަވައެވެ.

ރައީސް ޑރ.މުއިއްޒު ވަނީ މި މަހުގެ 6 ވަނަ ދުވަހު ވެސް އަތޮޅު ތެރެއަށް ދަތުރުފުޅެއް ކުރައްވާފައެވެ. ތިން ދުވަހުގެ މި ދަތުރުފުޅުގައި އެމަނިކުފާނު ވަނީ ކޮޅުމަޑުލުގެ ގުރައިދޫގެ އިތުރުން، ދިޔަމިގިލި، ގާދިއްފުށި، ވޭމަންޑޫ، ބުރުނި، ކަނޑޫދޫ، ވަންދޫ، އޮމަދޫ، ކިނބިދޫ އަދި ތިމަރަފުއްޓަށް ވަޑައިގަންނަވާފައެވެ. އަދި އެ އެރަށްރަށުގެ ރައްޔިތުންނާ ބައްދަލުކުރައްވައި، އެރަށްރަށުގެ ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކާއި ވެސް ރައީސް ޑރ.މުއިއްޒު ވަނީ ބައްދަލުކުރައްވާފައެވެ.