އެމްޑަބްލިއުއެސްސީގެ އެޕުން ބިލް ދައްކައިގެން އުމްރާ ދަތުރެއް ހޯދުމުގެ ފުރުސަތު!

ޤައުމީ ފެންކުންފުނި، އެމްޑަބްލިއުއެސްސީގެ އެޕްލިކޭޝަން މެދުވެރިކޮށް ފެންބިލް ދައްކާ ޑޮމަސްޓިކް ކަސްޓަމަރުންނަށް އުމްރާ ދަތުރު ލިބޭ ޕްރޮމޯޝަނެއް ފަށައިފިއެވެ.

އެމްޑަބްލިއުއެސްސީން ބުނީ މިއަހަރަކީ އެކުންފުންޏަށް 30 އަހަރު ފުރޭ އަހަރުކަމަށް ވުމާއި ، އެ މުނާސަބަތާއި އަދި ރަމަޟާންމަހާއި ގުޅުވައިގެން "އެކުވެރި ރޯދަ30" ނަމުގައި އެކުންފުނީގެ އެޕް މެދުވެރިކޮށް ބިލްދައްކާ ޑޮމަސްޓިކް ކަސްޓަމަރުންގެ ތެރެއިން ގުރުއަތުން ހޮވޭ ނަސީބުވެރި 3 ފަރާތަކަށް އުމްރާ ދަތުރެއް ލިބޭ ޕްރޮމޯޝަނެއް ފަށާފައިވާކަމަށެވެ.

މި ޕްރޮމޯޝަނުގެ މަޤްސަދަކީ ރަމަޟާންމަހާ ގުޅުވައިގެން ކަސްޓަމަރުންނަށް ފަހި ފުރުސަތެއް ތަނަވަސްކޮށްދިނުމާއެކު، ވީހާވެސް ގިނަ ކަސްޓަމަރުން އެމްޑަބްލިއު އެސްސީގެ އެޕަށް އަހުލުވެރިކުރުވުމެވެ. އަދި ބިލް ދެއްކުމަށް ކައުންޓަރުޓަރުތަކަށް އައުމުގެ ބަދަލުގައި އެޕް ފަދަ ޒަމާނީ ވަސީލަތްތައް ބޭނުންކުރުމަށް ބާރުއަޅައި، ކައުންޓަރަށް އައުމުގެ ބަދަލުގައި އެޕުން ބިލްތައް ދައްކައި ވަގުތު ސަލާމަތްކުރުމެވެ. މީގެ އިތުރުން އެމްޑަބްލިއުއެސްސީގެ ހިދުމަތްތައް ޑިޖިޓަލްކޮށް ފަސޭހަކޮށް ޒަމާނީ ކުރުމުގެ މަސައްކަތަށް ހަލުވިކަމާއެކު ކުރިއެރުން ހޯދުމެވެ.

އެމްޑަބްލިއުއެސްސީގެ މި ޕްރޮމޯޝަން ކުރިއަށްދާނީ މިމަހުގެ އެއްވަނަ ދުވަހުން ފެށިގެން މާޗްމަހުގެ 31 ވަނަ ދުވަހުގެ ނިޔަލަށެވެ. މި ޕްރޮމޯޝަނުގައި ބައިވެރިވެވޭނީ އެކުންފުނިގެ ޑޮމަސްޓިކް ކަސްޓަމަރުންނަށެވެ. އަދި ޕްރޮމޯޝަނުގައި އެޕްލިކޭޝަން މެދުވެރިކޮށް ބިލްތައް ދެއްކުމާއި، ޕްރޮމޯޝަން ހަމަވާއިރު، ފައިސާ ދެއްކުމުގެ މުއްދަތު ހަމަވެފަިއވާ އެއްވެސް ފެންބިލެއް ނުވަތަ އަދަދެއް ނެތް ކަސްޓަމަރަކަށް ވާންޖެހޭނޭކަމަށްވެސް ފެންކުންފުނިން ޝަރުތު ކަނޑައަޅައެވެ.

ފެންކުންފުނިން ބުނީ ގުރުއަތުން ހޮވޭ ނަސީބުވެރި ފަރާތްތަކުން އިއުލާނުކުރާތާ 1 އަހަރުދުވަހުގެ ތެރޭގައި އުމްރާ ދަތުރު ބޭނުންކޮށް ނިންމަންވާނޭ ކަމަށެވެ. އުމްރާ ދަތުރު ލިބުނު ފަރާތަށް އެހެން މީހަކަށްވެސް އެ ދަތުރު ބަދަލުކުރެވިދާނެއެވެ.

ގުރުއަތުން ހޮވޭ ފަރާތްތައް އިއުލާނުކުރުމަށް ނިންމާފައިވަނީ އެމްޑަބްލިއުއެސްސީގެ ސޯޝަލް މީޑިއާ، ވެބްސައިޓް، އަދި ކަސްޓަމަރުންނަށް އެހެނިހެން މައުލޫމާތުތައް ފޯރުކޮށްދޭ  ވަސީލަތްތައް މެދުވެރިކޮށްކަމަށް އެކުންފުނިން ބުނެއެވެ.