އިތުރު 15 އަތޮޅުގައި ޕަބްލިކް ވޯކްސްގެ ޚިދުމަތް ގާއިމުކުރަނީ

ރާއްޖޭގެ އިތުރު 15 އަތޮޅެއްގައި ޕަބްލިކް ވަރކްސް ނުވަތަ ޢާންމު ޚިދުމަތް ތަޢާރަފު ކުރުމަށް އަންނަ އަހަރުގެ ބަޖެޓުގައި ހިމަނުއްވާނެކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.

އިދާރީ ދާއިރާތަކުގެ އާންމު މަސައްކަތްތައް ހަރުދަނާކުރުމުގެ ބައްދަލުވުން ފެށުމުގެ ރަސްމިއްޔާތުގައި ވާހަކަފުޅުދައްކަވަމުން ވަޒީރު އާދަމް ޝަރީފް އުމަރު ވިދާޅުވީ ރާއްޖޭގައި ޕަބްލިކް ވޯކްސްގެ ޚިދުނަތް ދެމުންދާތާ 30 އަހަރު ވެފައިވާ ކަމަށެވެ.

އެހެން ނަމަވެސް މިނިސްޓަރީން އެންމެ ފަހުން ކުރި ދަތުރުތެރެއިންވެސް އެ މަސައްކަތް ކުރާ ސައިޓްތައް އަޅާ ނުލެވި ވަރަށް ބޮޑަށް ހަލާކުވެގެން ގޮސްފައިވާކަން ފާހަގަކުރެވުނު ކަމަށް ވަޒީރު ވިދާޅުވިއެވެ.

ގިނަ ރަށްރަށުގެ ސައިޓްތައް ހުރީ ވީރާނާވެ ހަލާކުވެފައި. އަދި އެތަންތަނުގައި ހުރި ވަސީލަތްތައްވެސް ހުރީ ބޭނުން ނުކުރެވޭ ހިސާބުގަ. މުވައްޒަފުނަނަށް މަސައްކަތް ކުރާނެ ރަނގަޅު މާހައުލެއް ނެތް. ހިންގުމުގެ ނިޒާމުގައުވެސް ބޮޑެތި ގޮންޖެހުންތަކެއް ހުރި

މިނިސްޓަރ އާދަމް ޝަރީފް އުމަރު

އެހެންކަމުން އެތަންތަން ރަނގަޅަށް ހިންގާނެ އުސޫލުތަކެއް އެކުލަވާލައިނއެ ޚިދުނަތް އެންމެ އެކަށީގެންވާ ގޮތުގައި ދެވޭނެކަން ކަށަވަރު ކުރުމަކީ ކުރަންޖެހުފައިވާ ކަމެއް ކަމަށް ވަޒީރު ވިދާޅުވިއެވެ.

މިއާއެކު ވަޒީރު ވިދާޅުވީ، ޕަބްލިކް ވަރކްސްގެ ޚިދުމަތް މުޅި ރާއްޖެއަށް ފުޅާ ކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަރަށް އިސްކަންދެއްވާ ކަމެއް ކަމަަށާ އެމަނިކުފާނުގެ އިރުޝާދުފުޅާއެކު މިހާރު ހުރި ސައިޓުތަކުގައި އެ މައްސަލަތައް ހައްލުކުރައްވާނެ ކަމަށެވެ. އަދި ކުރިއަށް އޮތް އަހަރުގައި ޕަބްލިކް ވޯކްސްގެ ޚިދުމަތް އެހެން 15 އަތޮޅަކަށްވެސް ފޯރުކޮށްދިނުމަށް ބަޖެޓް ކުރެވޭނެ ކަމަށް ވަޒީރު ވިދާޅުވިއެވެ.

މިއަންނަ އަހަރު ފެށޭއިރު، އާދެ މި އަންނަ އަހަރުގެ ބަޖެޓްގައި ރާއްޖޭގެ އިތުރު 15 ރަށެއްގައި ޕަބްލިކް ވޯކްސްގެ ޚިދުމަތް ގާއިމް ކުރުމަށްޓަކައި އިރާދަކުރެއްވިައްޔާ ބަޖެޓް ކުރެވިގެންދާނެ. މިއީ ރާއްޖޭގެ ހުރިހާ އަތޮޅަކުން މި ޚިދުނަތް ލިބުމަށް ރައީސުލްޖުމްހޫރިއްޔާ އިސްކަން ދެއްވައިގެން އަޅުގަނޑުމެންނަށް ދެއްވާފައިވާ އިރުޝާދެއް

މިނިސްޓަރ އާދަމް ޝަރީފް އުމަރު

ވަޒީރު އިތުރަށް ވިދާޅުވީ މި ސަރުކާރުގެ ހަ މަސްދުވަހުގެ ތެރޭގައި ސިޓީތަކާ ބެހޭ ވުޒާރާއިން ރައްޔިތުންނަށް ޚިދުމަތް ފޯރުކޮށްދިނުމާއި ކައުންސިލްތައް ބާރުވެރިކުރުވުމާއި ޕަބްލިކް ވަރކްސްގެ ދާއިރާއިން ގިނަ ކާމިޔާބީތަކެއް ހޯދާފައިވާ ކަމަށެވެ. މި މަސައްކަތްތައް ކުރިއަށްގެންދެވޭނީ މިހާރު ހުރި ގޮންޖެހުންތައް ދެނެގަނެ އެކަމުން އަރައިގަތުމަށް ދާއިރާގެ ހުރިހާ ބޭފުޅުން ގުޅިގެން މަސައްކަތްކޮށްގެން ކަމަށް ވެސް ވަޒީރު ވިދާޅުވިއެވެ.