ހިޔާވެހި ސްކީމްގެ ލޯނު ދޫކުރަން ބީއެމްއެލްއާއެކު އެއްބަސްވުމެއް

ހިޔާވެހި ފައިނޭންސިން ސްކީމްގެ ދަށުން ލޯނު ދިނުމަށް ހައުސިން މިނިސްޓްރީ އާއި ބޭންކް އޮފް މޯލްޑިވްސްއާއި ދެމެދު އެއްބަސްވުމެއްގައި ސޮއިކޮށްފި އެވެ.

މި އެއްބަސްވުމުގައި ސޮއިކުރުމުގެ ރަސްމިއްޔާތު ބާއްވާފައިވަނީ މިއަދު ހެނދުނު ދަރުބާރު ގޭގައެވެ. އެއްބަސްވުމުގައި ހައުސިން މިނިސްޓްރީގެ ފަރާތުން ސޮއިކުރެއްވީ ހައުސިން މިނިސްޓަރ ޑރ. އަބްދުﷲ މުއްތަލިބެވެ. އަދި ބީއެމްއެލްގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ ސީއީއޯ މުހައްމަދު ޝަރީފެވެ.

މި ރަސްމިއްޔާތުގައި ޑރ. މުއްތަލިބް ވިދާޅުވީ މި ފައިނޭންސިން ސްކީމަށް ފޯމު ހުށަހަޅާފައިވާ ފަރާތްތަކުގެ އަސާސީ ޝަރުތުތައް ހަމަވޭތޯ ބެލުމުގެ މަސައްކަތް މިވަގުތު ކުރަމުން އަންނަ ކަމަށެވެ. އަދި ހަމައެހެންމެ ފޯމުތައް އިވަލުއޭޓްކުރުމުގެ މަސައްކަތްކުރަމުން އަންނަ ކަމަށާއި މި ފެށޭ ޖުލައި މަހު ބޭންކުތަކުން އެ މަސައްކަތް ފަށާނެކަމަށް ވެސް ޑރ، މުއްތަލިބް ވިދާޅުވި އެވެ.

މި ރަސްމިއްޔާތުގައި ބީއެމްއެލްގެ ސީއީއޯ މުޙައްމަދު ޝަރީފް ވިދާޅުވީ، މި ފައިނޭންސިން ސްކީމްއަކީ އިސްލާމީ އުސޫލުގެ މަތިން %5 ފައިދާގައި ކުރިއަށްގެންދާ ފައިނޭންސިންއެއްކަމަށާއި ފައިނޭންސް އަނބުރާ ދެއްކުމަށް 25 އަހަރުގެ މުއްދަތެއް ލިބޭނެ ކަމަށެވެ. ހިޔާވަހި ފައިނޭންސިންގ ޕްރޮގްރާމުގެ ސްކީމްތަކަށް ލޯނަށް އެދި ހުށަހަޅާފައިވާ ފަރާތްތަކުގެ އެޕްލިކޭޝަންތައް ލިބުމާއެކު، އެއެޕްލިކޭޝަންތައް އިވަލުއޭޓްކުރުމުގެ މަސައްކަތް ފަށާނެކަމަށްވެސް މުޙައްމަދު ޝަރީފް ވިދާޅުވިއެވެ.

އަޅުގަނޑުމެންގެ އުއްމީދަކީ ޖުލައި މަހުގެ ތެރޭގައި ލޯނު ދޫކުރެވޭ ވަރު ކުރުން

ބީއެމްއެލްގެ ސީއީއޯ ޝަރީފް ވިދާޅުވިއެވެ.

މި ސްކީމްގެ ދަށުން ލޯނަށް އެދި 2،256 މީހަކު ވަނީ ހައުސިން މިނިސްޓްރީއަށް ފޯމު ހުށަހަޅާފައެވެ. ފާހަގަކޮށްލަންޖެހޭ ގޮތުގައި މޯލްޑިވްސް އިސްލާމިކް ބޭންކް (އެމްއައިބީ) އާއި ހައުސިން ޑިވެލޮޕްމަންޓް ފައިނޭންސިން ކޯޕަރޭޝަން (އެޗްޑީއެފްސީ) މެދުވެރިކޮށް ވެސް މި ލޯނު ދޫކުރުމަށް ސަރުކާރުން ވަނީ ނިންމައިފައެވެ.

މި ސްކީމަކީ 5-10 އިންސައްތަ އިކުއިޓީ ރޭޓުގައި ދޫކުރުމަށް ހަމަޖެހިފައިވާ ސްކީމެކެވެ. އަދި މި ސްކީމުގެ ދަށުށް ރާއްޖޭގެ ކޮންމެ ސަރަހައްދަކުން ބިން ލިބިފައިވާ ފަރާތްތަކަށް ގެދޮރު އެޅުމަށް މާލީގޮތުން ލުއިތައް ފޯރުކޮށްދޭނެއެވެ.