ސުތުރާގެ ނަމުގައި މިސްކިތްތަކަށް ވައްދާފައިވާ ތަކެތި ނަގަން އަންގަނީ

މިފަހަކަށް އައިސް ނަމާދު ކުރާއިރު ކުރިމަތީގައި ބެހެެއްޓުމަށްޓަކައި ސުތުރާގެ ނަމުގައި މިސްކިތްތަކުގެ ތެރެއަށް ވައްދައިގެން އުޅޭ ސާމާނުތައް މިސްކިތްތަކުން ނަގައިދިނުމަށް ސިޓީކައުންސިލުގައި އެދޭނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

މިނިސްޓަރު ވިދާޅުވީ ސުތުރާގެ ނަމުގައި އެކި ސިފަ ސިފައިގެ ތަކެތި ހަދައިގެން މިސްކިތްތަކުގެ ތެރޭގައި ބަހައްޓައިގެން އުޅޭ ކަމަށާ މިގޮތައް މިސްކިތްތަކުގެ ތެރެއަށް ވައްދައިގެން އުޅޭ ސާމާނުތައް މިސްކިތްތަކުން ނަގައިދިނުމަށް ސިޓީކައުންސިލުގައި އެދޭނެ ކަމަށެވެ.

".. މިއީ ރަސޫލާގެ ޙަޔާތްޕުޅުގައި ވެސް އަޞްޙާބު ބޭކަލުންގެ ޙަޔާތްޕުޅުގައި ވެސް އަދި ހެޔޮކަންބޮޑުވެގެންވާ ތިން ޤަރުނުގައި ވެސް މިކަން ކޮށްފައިވާ ގޮތެއް ނޫން. ސުންނަތުގައި ބަޔާންވެގެންވާ ސުތުރާގެ މަފްހޫމާއި ޚިލާފު މިފަދަ ކަންކަން ފެތުރިގެން ދިއުމަކީ ރަނގަޅު ގޮތެއްނޫން," މިނިސްޓަރު ވިދާޅުވި އެވެ.

އަދި ވިދާޅުވީ މިސްކިތްތަކުގައި މިފަދަ ސުތުރާތައް ބެހެއްޓުމުގެ ބަދަލުގައި ސުންނަތުގައި ވާރިދުވެފައިވާ ގޮތަށް އަމަލުކުރުން މާ ރަނގަޅު ވާނެ ކަމަށެވެ. އެއީ ތަނބެއް ނުވަތަ ފާރެއް ނުވަތަ އެނޫންވެސް އާންމު ބޭނުމަކަށް ހުންނަ އެއްޗެއް ސުތުރާގެ ގޮތުގައި ބޭނުންކުރުން ކަމަށް ވިދާޅުވި އެވެ. މިނިސްޓަރު ވިދާޅުވީ މިގޮތުން އަމަލުކުރުމުން ސީދާ ސުންނަތާ އެއްގޮތައް މިކަން ބަދަލުވެގެންދާނެ ކަމަށް ފެންނަނަ ކަމަށެވެ.

މިނިސްޓަރު މިހެން ވިދާޅުވިއިރު މިސްކިތުގެ ތެރޭގައި ވަކި ހާއްސަ އެއްޗެއް ހަދާ ސުތުރާގެ ގޮތުގައި ބެހެއްޓުން ރަނގަޅެއް ނޫން ކަމުގައި އިސްލާމީ ފަތުވާދޭ އެންމެ މަތީ މަޖިލީހުން ވަނީ ފަތުވާ ނެރެފަ އެވެ.

ފަތުވާ މަޖިލީހުން ސުތުރާ ބަހައްޓާ މައްސަލާގައި ނެރުނު ފަތުވާގައި ބުނެފައި ވަނީ މިސްކިތުގެ ތެރޭގައި ވަކި ހާއްސަ އެއްޗެއް ހަދާ ސުތުރާގެ ގޮތުގައި ބެހެއްޓުމަކީ އަލަށް އުފެދިފައިވާ މައްސަލައެއް ކަމުން މި މައްސަލަ އަކީވެސް ފިގުހީ އެހެން މައްސަލަތައް ފަދައިން ހިލާފު އުފެދިފައިވާ މައްސަލައެއް ކަމަށެވެ.

އިލްމުވެރީންގެ ތެރެއިން އެއް ބަޔަކު ދެކެވަޑައިގަންނަވާ ގޮތުގައި މިކަމަކީ ހެޔޮ ކަންކަމަށް އެހީތެރިވުމުގެ ތެރޭގައި ހިމެނޭ ކަމެއް ކަމަށާ ނަމަވެސް އިލްމުވެރީންގެ ތެރެއިން އަނެއް ބަޔަކު އެކަން މަނާކުރާ ކަމަށެވެ.

ރަސޫލާގެ ޒަމާނުގައި ސުތުރާއަށް ބޭނުން ޖެހިފައިވާ ހާލުގައިވެސް އަދި މިސްކިތުތެރެއަށް އެފަދަ ތަކެތި ވެއްދުމުގެ އޮތްއިރުވެސް މިސްކިތުގެ ތެރެއަށް ސުތުރާގެ ގޮތުގައި ވަކި ހާއްސަ އެއްޗެހިތަކެއް ހަދައިގެން ވައްދާފައިނުވާކަން އެނގޭ ކަމަށް ފަތުވާގައިވެ އެވެ. އަދި އެ ޒަމާނުގައި ސުތުރާގެ ގޮތުގައި ހާއްސަ އެއްޗެއް ބޭނުންކުރައްވާގައިނުވާ ކަން ވެސް ދޭހަވާ ކަމަށް ފާހަގަކޮށްފައިވެ އެވެ.

އެ ދުވަސްވަރު މިސްކިތުން ބޭރުގައި ސުތުރާ ގޮތުގެ ބޭނުންކޮށްފައި ވަނީ އާންމުކޮށް އެހެން ކަންކަމަށް ބޭނުންކުރާ ތަކެތި ކަމުން ފަތުވާ މަޖިލީހުގެ މެންބަރުން ބުރަވަނީ ސަލަފުއްސާލިހުންގެ ޒަމާނުގައި ނުކުރައްވާ ކަމެއް މި ދުވަސްވަރު ވެސް އަދި މީގެ ފަހުން ވެސް ކުރުމަކީ އެދެވިގެންވާ ކަމެއް ނޫން ކަމުގައި ބަޔާންކޮށްފައިވެ އެވެ.

ސުތުރާގެ ހުކުމް

ފަތުވާގައި ބުނެފައިވަނީ ސުތުރާ ބޭނުންކުރުމުގެ މައްސަލާގައި ފިގުހުގެ ގިނަ އިލްމުވެރީންގެ ނަޒަރިއްޔާއަކީ ސުތުރާ ބެހެއްޓުމަކީ ސުންނަތެއް ކަމަށެވެ. ނަމަވެސް ފަހުގެ ބައެއް އިލްމުވެރީން ސުތުރާ ވާޖިބު ކަމަށްވެސް ވިދާޅުވާ ކަމަށެވެ.

މި ގޮތަށް ވިދާޅުވާ އިލްމުވެރީންގެ ތެރޭގައި އައްޝައިހް މުހައްމަދު ނާސިރުއްދީން އަލްބާނީ އާއި އައްޝައިހް މުޤުބިލް ބުނު ހާދީ އަލްވާދިޢީ އަދި އަައްޝައިހް އަބްދުއްރައްޒާޤް އަފީފީ ހިމެނިވަޑައިގަންނަވާ ކަމަށެވެ. ނަމަވެސް ގިނަ އިލްމުވެރީން ވިދާޅުވަނީ އެއީ ސުންނަތެއް ކަމުގައި ފަތުވާ މަޖިލީހުން ބުނެފައިވެ އެވެ.

ސަލާމާއި ސަލަވާތް ލެއްވި އިތުރު މާތް ނަބިއްޔާގެ ޒަމާނުގައި މިސްކިތުގައި ސުތުރާއަށް ބޭނުންޖެހިފައިވީއިރުވެސް އެކަމަށް ހާއްސަ އެއްޗެއް ބަހައްޓާފައިނުވާ ކަމަށް ބަޔާންކޮށް އެކަމުގެ ދަލީލު ގެނެސްފައިވެ އެވެ.

ނަމަވެސް މިސްކިތުން ބޭރުގައި ނަމާދުކުރައްވާއިރު ސުތުރާ ބެހެއްޓެވިކަން ސާބިތުވާ ކަމަށާ ސުތުރާގެ ގޮތުގައި ބަހައްޓަވާފައިވަނީ އެހެން ކަންކަމަށް ބޭނުންކުރައްވާ ތަކެތި ކަމަށާ ވަކި އެއްޗެއް ހައްދަވައިގެން ބޭނުމެއް ނުކުރައްވާ ކަމަށެވެ. އެގޮތުން ބޭނުން ކުރައްވާފައި ވަނީ ފާރު, އަސާ, މީހުން, ތަންމަތި, އެނދު, ދުނި ނުވަތަ ތީރު, ސަވާރީ, އަސްދާނުގޮނޑި އަދި ގަސްފަދަ ތަކެތި ކަމަށް ފާހަަގަކޮށްފައިވެ އެވެ.

ފަތުވާ މަޖިލީހުން މިފަދަ ފަތުވާއެއް ނެރެފައި މިވަނީ ރާއްޖޭގެ މިސްކިތްތަކުގައި ސުތުރާގެ ގޮތުގައި ބޭނުންކުރުމަށް ތަފާތު ޑިޒައިންތަކަށް އެކި ކަހަލަ ތަކެތި ހަދާ މިސްކިތުގެ ތެރެއަށް ވެއްދުން އާންމުވެފައި ވަނިކޮށެވެ.