ސްލޮވާކިއާއި އެއްވަރުވެ، 24 އަހަރަށްފަހު ރޫމޭނިއާއަށް ތާރީޚީ ކާމިޔާބެއް

ޔުއެފާ ޔޫރޯ 2024 ގެ ގުރޫޕް އީގައި މިރޭ ރޫމޭނިއާއި ސްލޮވާކިއާ ވާދަކުރި މެޗު 1-1 ގެ ނަތީޖާއަކުން އެއްވަރުވެ ގުރޫޕްގެ އެއްވަނަ ޓީމުގެ ގޮތުގައި، 24 އަހަރަށްފަހު ފުރަތަމަ ފަހަރަށް ރޫމޭނިއާ އިން މުބާރާތުގެ ދެވަނަ ބުރުން ޖާގަ ހޯދައިފިއެވެ.

މުބާރާތުގައި ރޫމޭނިއާ ކުޅުނު ފުރަތަމަ މެޗުގައި 3-0 ގެ ނަތީޖާއަކުން ޔުކްރެއިން އަތުން މޮޅުވި ނަމަވެސް ދެވަނަ މެޗުގައިބެލްޖިއަމް އަތުން އެޓީމު ވަނީ 2-0 ގެ ނަތީޖާއަކުން ބަލިވެފައެވެ. އަދި ސްލޮވާކިއާގެ ފުރަތަމަ މެޗުގައި ބެލްޖިއަމް އަތުން 1-0 ގެ ނަތީޖާއަކުން މޮޅުވިއިރު، ދެވަނަ މެޗުގައި 2-1 ގެ ނަތީޖާއަކުން ޔުކްރެއިން އަތުން އެޓީމު ވަނީ ބަލިވެފައެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެން ދިޔައިރު، މިމެޗުގައި ފުރަތަމަ ލަނޑުޖަހައި ކުރިހޯދީ ސްލޮވާކިއާ އިންނެވެ. ކިލަނޑު ފުރަތަމަ ހާފުގެ 24 ވަނަ މިނެޓުގައި ކާމިޔާބުކޮށްދިނީ މިޑްފީލްޑަރު އޮންޑްރޭޖް ޑޫޑާއެވެ.

ރޫމޭނިއާ އިން މެޗުގެ ނަތީޖާ އެއްވަރުކުރި ލަނޑު ފުރަތަމަ ހާފުގެ 37 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔަބުކޮށްދިނީ މިޑްފީލްޑަރު ރަޒްވާން މަރިންނެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިހާފުގައިވެސް ދެޓީމުން ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މިނަތީޖާއެކު ކުޅުނު ތިންމެޗުން މިދެޓީމަށްވެސް ހަތަރު ޕޮއިންޓް ލިބިފައިވާއިރު، ލަނދުގެ ތަފާތުން ގުރޫޕްގެ އެއްވަނަ ޓީމުގެ ގޮތުގައި ރޫމޭނިއާ ދެވަނަ ބުރުން ޖާގަ ހޯދިއިރު، ގުރޫޕްގެ ތިންވަނަ ޓީމުގެ ގޮތުގައި ސްލޮވާކިއާ އިން ވެސް ވަނީ ދެވަނަ ބުރުގެ ޖާގައެއް ކަށަވަރުކޮށްފައެވެ.