ޔާމީންގެ މައްޗަށް ކުރި ސިޔާސީ ހުކުމުގެ ޒިންމާ ކޯލިޝަނުގެ ލީޑަރުން ނަގަންޖެހޭނެ: އިދިކޮޅު

ކުރީގެ ރައީސް އަބްދުﷲ ޔާމީން އަބްދުލްގައްޔޫމުގެ މައްޗަށް އިއްވި ފަސް އަހަރުގެ ޖަލު ހުކުމަކީ ސިޔާސީ ހުކުމެއް ކަމަށް ކަނޑައަޅައި، އެހުކުމުގެ ޒިންމާ، ސަރުކާރު ކޯލިޝަނުގެ ހަތަރު ލީޑަރުން ނަންގަވަންޖެހޭނެ ކަމަށް އިދިކޮޅު ކޯލިޝަނުން ބުނެފިއެވެ.

ރައީސް ޔާމީންގެ މައްޗަށް ކުރިމިނަލް ކޯޓުން އިއްވި ހުކުމަކީ ސަރުކާރުން ނުފޫޒު ފޯރުވައިގެން އިއްވި ސިޔާސީ ހުކުމެއް ކަމަށް އިދިކޮޅު ޖޮއިންޓް ކައުންސިލުން މިރޭ ނިންމައި، ހުކުމާއި ގުޅޭގޮތުން ޕީއެންސީގެ ރައީސް އަބްދުއްރަހީމް އަބްދުﷲ ދެއްކެވި ވާހަކައިގައި ވިދާޅުވީ، ސަރުކާރާއި ސަރުކާރު ހިންގާ ކޯލިޝަނުގެ ހަތަރު ވެރިންގެ ބާރާއި ނުފޫޒު، ފަނޑިޔާރުންނަށް ފޯރުވައިގެން ކުރި އެހުކުމުގެ ޒިންމާ ކޯލިޝަނުގެ ލީޑަރުން ނަގަންޖެހޭނެ ދުވަހެއް އަދި އަންނާނެ ކަމަށެވެ.

''ރައީސް ޔާމީންގެ މައްޗަށް ނުހައްގުން ކުރި އެހުކުމުގެ ޒިންމާ ރައީސް ސޯލިހާއި ރައީސް މައުމޫނާއި ގާސިމް އިބްރާހީމާ އިމްރާން އަބްދުﷲ ނަގަންޖެހޭނެ. މިއީ ސަރުކާރުން ފަނޑިޔާރުންނަށް ވަރަސް ބޮޑަށް ނުފޫޒު ފޯރުވައިގެން ކުރި ސިޔާސީ ހުކުމެއް.'' އަބްދުއްރަހީމް ވިދާޅުވިއެވެ.

އަބްދުއްރަހީމް ވިދާޅުވީ ސަރުކާރާއެކު ކޯލިޝަން ދެމިއޮތްހާ ހިނދަކު ސަރުކާރުން ކުރާ ކޮންމެ ކަމެއްގެ ޒިންމާ ކޯލިޝަނުން ނަގަންޖެހޭނެ ކަމަށެވެ.

އަބްދުއްރަހީމް ވިދާޅުވި ގޮތުގައި ރައީސް ޔާމީންގެ މައްޗަށް ހުކުމް އިއްވި ފަނޑިޔާރުންނަށް ނުފޫޒު ފޯރުވި ބޭފުޅުންގެ ތެރޭގައި ރައީސް ސޯލިހާއި ރައީސް މައުމޫނާއި ރައީސް ނަޝީދާއި ގާސިމް އިބްރާހީމްގެ އިތުރުން ހޯމް މިނިސްޓަރު އިމްރާން އަބްދުﷲ ހިމެނެއެވެ.

އޭނާ ވިދާޅުވީ ރައީސް ޔާމީން ޖަލުގައި އޮންނެވިހާ ދުވަހަކު އެއްވެސް މެންބަރަކަށް ހަމަނިދި ނިދިގެން ނުވާނެ ކަމަށާއި ވަގުތު ހޯދައިގެންވެސް ރައީސް ޔާމީން މިނިވަން ކުރުމަށް ކުރާ މަސައްކަތުގައި އެހީތެރިކަން ފޯރުކޮށްދިނުމަށް މަސައްކަތް ކުރަންޖެހޭނެ ކަމަށެވެ.

އިދިކޮޅު ކޯލިޝަނުގެ ޖޮއިންޓް ކައުންސިލު ބައްދަލުވުމުގައި ވާހަކަދެއްކެވި ހ ުރިހާ މެންބަރުންވެސް ވަނީ ރައީސް ޔާމީން މިނިވަން ކުރަންދެން ސިޔާސީ ހަރަކާތްތައް މުޅި ރާއްޖޭގައި ހިންގަން ނިންމާފައެވެ.