އެންޑޮމެޓްރިއޯސިސް އަށް ހޭލުންތެރިކުރުވުމުގެ މަހާ ގުޅިގެން ހާއްސަ ހަރަކާތެއް ބާއްވައިފި

އެންޑޮމެޓްރިއޯސިސް ހޭލުންތެރިކަމުގެ މަހާ ގުޅިގެން ޝީ ބިލްޑިން ގައި ހޭލުންތެރިކަމުގެ ހަރަކާތެއް ބާއްވައިފި އެވެ.

މި ހަފްލާގައި އެންޑޯ ވޯރިއާސްއާއި، އެހީތެރިންނާއި، ވަކާލާތުކުރާ ފަރާތްތައް އެއްތަނަކަށް ޖަމާވެ، މި ބައްޔާއި ގުޅޭގޮތުން ހިޔާލު ބަދަލުކޮށްފައިވެ އެވެ. މި ހަރަކާތުގެ ޗީފް ގެސްޓަކީ ކުރީގެ ފަސްޓް ލޭޑީ ފަޒްނާ އަހުމަދެވެ.

މި އިވެންޓް ހޯސްޓްކުރި އެންޑޮމެޓްރިއޯސިސް ބަލި ތަހައްމަލު ކުރަމުންދާ ފާތިމަތު ޝާހުނާޒް އަދި ނިއަމް ނަޝީދު ވަނީ އެމީހުންގެ އެންޑޮމެޓްރިއޯސިސްގެ ދަތުރު ހިއްސާކޮށްފަ އެވެ. ރާއްޖޭގައި އެކަށީގެންވާ ސިއްހީ ފަރުވާގެ ފުރުސަތުތައް ނެތުމުގެ ސަބަބުން ކުރިމަތިވާ ޖިސްމާނީ، ނަފްސާނީ އަދި މާލީ ދަތިތައް ފާހަގަކުރި އެވެ.

ކޮންމެ 7 އަންހެނުންގެ ތެރެއިން 1 އަންހެނަކަށް މި ބަލި ޖެހޭއިރު، ރާއްޖޭގައި އެންޑޮމެޓްރިއޯސިސް އެކްސިޝަން ސްޕެޝަލިސްޓެއް ނެތުމުން، ބަލިމީހުންނަށް އެކަށީގެންވާ ފަރުވާ ލިބުމަށް ވަނީ އިތުރު ގޮންޖެހުންތަކެއް ކުރިމަތިވެފައެވެ.

އެންޑޮމީޓްރިއޯސިސް އަކީ ހަކުރު ބަލި ހާ އާއްމު ބައްޔެ ނަމަވެސް ވަރަށް ބޮޑަށް ސްޓިގްމައިޒްޑް ބައްޔެއް ކަމުން އެންޑޮމީޓްރިއޯސިސް ހުންނަ އެތައް އަންހެނުންނެއް މުޖްތަމަޢުގައި ގައި މި ބަލީގެ ސައްހަ މައުލޫމާތު ނޭންގި އަދި ބަލި ޑައެގްނޯސް ނުވެ ސައިލެންޓްލީ ބަލި ތަހައްމަލު ކުރަމުންދާތީ އެންޑޮމީޓްރިއޯސިސްގެ ހޭލުންތެރިކަމަކީ އިންތިހާ އަށް ބޭނުން ވެފައިވާ ކަމެކެވެ.

މި ހަރަކާތުގައި އެންޑޮމެޓްރިއޯސިސްގެ އަލާމާތްތަކާއި، ދިރިއުޅުމަށް ކުރާ އަސަރު އަދި ޚާއްސަ ފަރުވާގެ ބޭނުންތެރިކަން ހިމެނޭ ތަފްސީލީ ޕްރެޒެންޓޭޝަނެއް ދީފައިވެ އެވެ.

މި ހަރަކާތަކީ ހޭލުންތެރިކަން އިތުރުކުރުމަށާއި، މުޖުތަމަޢުގެ އެހީތެރިކަން އިތުރުކުރުމަށާއި، ރާއްޖޭގެ ބަލި ތަހައްމަލު ކުރަމުންދާ ފަރާތްތަކަށް ރަނގަޅު ސިއްހީ ފަރުވާ ލިބޭނެ މަގު ތަނަވަސްކުރުމަށް ވަކާލާތުކުރުމުގެ މަންސައެކެވެ. އަދި މިއީ އެއްވެސް މީހަކު މި ވޭނުގައި އެކަނި ތަހައްމަލުކުރަން ނުޖެހޭނެކަމާއި، ދެމެހެއްޓެނިވި މަސައްކަތާއެކު ބަދަލު ގެނެވިދާނެކަމުގެ ހަނދާންކޮށްދިނުމެކެވެ.

ކުރިޔަށް އޮތް މަސްތަކުގައި ހާއްސަ އިވެންޓްތަކާއި ހަރަކާތްތައް ވަނީ ޕްލޭންކުރެވިފައިއެވެ.

މިބަލީ ތަހައްމަލު ކުރަމުންދާ ފަރާތްތަކަށް އެހޭތިރެވެދިނުމުގެ ގޮތުން އެންޑޮމީޓްރިއޯސިސް ސަޕޯޓް ގްރޫޕެއް އޮވެއެވެ. އެންޑޮމީޓްރިއޯސިސް ޑައެގްނޯސްވެފައި ވާ ހުރިހާ އަންހެން ކަބަލުންވެސް މި ގްރޫޕްއާ ގުޅުމަށް އެދިފައިވެ އެވެ.