ޖޭއެސްސީގެ ރައީސްކަމަށް މެންބަރު ރިޟާ

ޖުޑީޝަލް ސަރވިސް ކޮމިޝަން، (ޖޭއެސްސީ)ގެ ރައީސްކަމަށް، ރައްޔިތުންގެ މަޖިލީހުގެ މާފުށީ ދާއިރާގެ މެންބަރު އަލްއުސްތާޛް ޙުސައިން ރިޟާ އިންތިޚާބުކުރައްވައިފިއެވެ.

ޖޭއެސްސީއަށް ރިޟާ އައްޔަންކުރައްވާފައިވަނީ މިމަހުގެ 4 ވަނަ ދުވަހުއެވެ. މެންބަރު ރިޟާ އަކީ ރައްޔިތުންގެ މަޖިލީހުގެ ފަރާތުން ޖޭއެސްސީއަށް ކަނޑައަޅުއްވާފައި ހުންނަވާ މެންބަރެވެ.

ރައްޔިތުންގެ މަޖިލީހުގެ ރައީސާއެކު، 10 މެނަބަރުން ހިމެނިވަޑައިގަންނަވާ މި ކޮމިޝަނުގެ ރައީސާއި ނައިބު ރައީސް ކަނޑައަޅުއްވަނީ ޖޭއެސްސީގެ މެންބަރުންގެ މެދުގައި ނަގާ ވޯޓަކުންނެވެ.

މިއަދު މެންބަރު ރިޟާ އެ ކޮމިޝަނުގެ ރައީސަކަށް އިންތިޚާބުކުރި އިރު، ކުރިން އެކޮމިޝަނުގެ ރައީސްކަން ކުރައްވަމުންގެންދެވީ މަޖިލީހުން އެ ކޮމިޝަނަށް ކުރިން ކަނޑައަޅާފައި ހުންނެވި ތުޅާދޫ ދާއިރާގެ އޭރުގެ މެމްބަރު ހިސާން ހުސައިނެވެ.

މެންބަރު އަލްއުސްތާޛް ޙުސައިން ރިޟާއަކީ ޤާނޫނީ ދާއިރާއިން މަތީ ތަޢުލީމް ހާސިލްކުރައްވާފައިވާ ބޭފުޅެކެވެ. އޭނާ މީގެކުރިން ކްރިމިނަލް ކޯޓުގެ އެޑްމިނިސްޓްރޭޓާގެ މަޤާމުވެސް އަދާކުރައްވާފައިވާކަން ފާހަގަކޮށްލެވެއެވެ.