މާލީ ހާލަތު މުރާޖައާ ކުރުމަށްފަހު ފިޗުން ރާއްޖޭގެ ރޭޓިން މަތިކޮށްފި

ރާއްޖޭގެ މާލީ ހާލަތު މުރާޖައާކުރުމަށްފަހު، ދުނިޔޭގެ އެންމެ ބޮޑު އެއް ކްރެޑިޓް ރޭޓިންގ އެޖެންސީ، ފިޗުން ރާއްޖޭގެ ކްރެޑިޓް ރޭޓިން މަތިކޮށްފިއެވެ.

ފިޗުން މަތިކޮށްފައިވަނީ، ރާއްޖޭގެ 'ލޯންގް-ޓާމް ފޮރިން-ކަރަންސީ އިޝުއަރ ޑިފޯލްޓް ރޭޓިންގ' 'ސީސީ އިން 'ސީސީސީ-'އަށެވެ. ފިޗުން މިފަހަރު ރޭޓިން މަތިކުރުމުގެ އެންމެ ބޮޑު އެއް ސަބަބެއްގެ ގޮތުގައި ފާހަގަކޮށްފައިވަނީ، މިއަހަރުގެ އޭޕްރިލް މަހު ރާއްޖެއިން އަދާކުރަން އޮތް ސޮވެރިން ސުކޫކް، ރާއްޖެއިން ދެއްކުމުންނެވެ. މިއާއެކު ރާއްޖެއިްނ ދަރަނި ނުދެއްކިދާނެކަމުގެ ނުރައްކާ ކުޑަވެފައިވާ ކަމަށް އެ އެޖެންސީއަށް ފެންނާތީ އެންމެފަހުން ރާއްޖޭގެ ރޭޓިން ވަނީ މަތިކޮށްފައެވެ.

ފިޗުން މިއަދު ނެރުނު ރިޕޯޓްގައި ފާހަގަކުރި ބައެއް ކަންކަމަށް ބަލާއިރު، ރާއްޖެއިން އަދާކުރަން އޮތް ބޭރުގެ އެންމެ ބޮޑު އެއް ދަރަނި ސުކޫކް ސަރުކާރުން ދައްކައި ނިންމުމުން، އިގްތިސާދީ ގޮތުން ރާއްޖެއަށް ދިމާވެދާނެ ނުރައްކާތައް ކުޑަކަމަށް ވަނީ ފާހަގަކޮށްފައެވެ. ފިޗުން ރާއްޖޭގެ މާލީ އަދި އިގްތިސާދާ ގުޅޭގޮތުން ނެރުނު ރައުޔުގައި ބުނެފައިވަނީ ކުރިއަށް އޮތް ތަނުގައި ބޭރުގެ ދަރަނި ދައްކަންޖެހޭ މިންވަރު މަދުވުމާއި، ބައިނަލްއަގުވާމީ އެކި ފަރާތްތަކުގެ އެހީތެރިކަން ލިބެމުންދިއުމަކީ، ރާއްޖޭގެ މާލީ ދަތިކަން ހައްލުވެ، ރިޒާވް އަލުން ބިނާކުރުމަށް މަގުފަހިވާނެ ކަމެއް ކަމަށެވެ.

ފިޗްގެ މި ރިޕޯތްގައި ވަނީ ދަރަނި ދެއްކުމަށް އެޅިގެންދިޔަ ހަރުދަނާ ފިޔަވަޅުތަކާއެކު ކުރިއަށްއޮތްތަނުގައި ރާއްޖޭގެ އިގްތޮސާދުގެ ދިވެލި ކުރިއަރައިގެން ދާނޭކަމަށެވެ.

މިކަމާ ގުޅޭގޮތުން ރާއްޖޭގެ މާލީ ވުޒާރާއިން މިރޭ ބުނެފައިވަނީ، ރާއްޖޭގެ ރޭޓިންގ އަށް އައި މި ބަދަލަކީ ފާއިތުވި އަހަރުގެ ތެރޭގައި ދައުލަތުގެ މާލީ ހާލަތު ރަނގަޅުކުރުމަށާއި ދަރަނި ބެލެހެއްޓުމަށް އެޅި ހަރުދަނާ ފިޔަވަޅުތަކަށް ލިބުނު ބޮޑު ކުރިއެރުން ކަމަށެވެ. މީގެ ތެރޭގައި އާމްދަނީ އިތުރުކުރުމަށް ގެނައި އިސްލާހުތަކާއި، ބޭރު ފައިސާ ވަންނަ މިންވަރު އިތުރުކޮށް ރިޒާވް ވަރުގަދަކުރުމަށް ތައާރަފުކުރި ބޭރު ފައިސާއާ ބެހޭ ޤާނޫނު ފާހަގަކުރިއެވެ.

މާލީ ވުޒާރާއިން ބުނީ ފިޗްގެ މި ރޭޓިންގ އަކީ ދުނިޔޭގެ އިގްތިސާދީ ނުތަނަވަސްކަމުގެ ތެރޭގައިވެސް، ދައުލަތުގެ މާލީ ހާލަތު ހަމަޖެއްސުމަށާއި ދަރަނި އަދާކުރުމަށް ސަރުކާރުން ކުރަމުންދާ މުހިންމު މަސައްކަތްތަކަށް އޮތް އިތުބާރު ބޮޑުވަމުންދާކަމުގެ ހެއްކެއް ކަމަށެވެ.

ގައުމުގެ މެކްރޯ-އިކޮނޮމިކް ހަމަޖެހުން ގާއިމުކުރުމަށާއި، މާލީ ސިޔާސަތުތައް ދެމެހެއްޓުމަށް އަބަދުވެސް މަސައްކަތް ކުރުމުގައި ދެމި އޮންނާނޭކަން ފާހަގަކުރަމުން ސަރުކާރުން ވަނީ، ބޭރުގެ އިގްތިސާދީ ލޮޅުންތަކުން ގައުމުގެ އިގްތިސާދާއި ރައްޔިތުން ރައްކާތެރިކުރުމަށް ބޭނުންވާ އިތުރު ފިޔަވަޅުތައް އަޅަމުންދާނެ ކަމުގެ ޔަގީންކަން ދީފައެވެ.

ސަރުކާރުން މިއަހަރުގެ އޭޕްރިލްމަހުގެ ތެރޭގައި ދައްކާފައިވަނީ، 2021 ވަނަ އަހަރު ރާއްޖެއިން ނެގި 500 މިލިއަން އެމެރިކާ ޑޮލަރުގެ ސުކޫކް އެވެ. 500 މިލިއަން އެމެރިކާ ޑޮލަރުގެ ސުކޫކާއި، އޭގެ ކޫޕަން ޕޭމަންޓުގެ ގޮތުގައި ދައްކަންޖެހޭ 24.68 މިލިއަން އެމެރިކާ ޑޮލަރު ސަރުކާރުން ދައްކާފައިވަނީ، ސޮވެރިން ޑިވެލޮޕްމަންޓް ފަންޑާއި، ބޭރު ފައިސާގެ ރިޒާވް ބޭނުންކޮށްގެންނެވެ.