ސައްހަ ނޫން ލިޔެކިޔުންތަކަކާއި އެކު ބިދޭސީން ގެނައުމުގެ ކޯޓާ ހޯދަން އުޅުނު ކުންފުނިތަކެއް ހާމަކޮށްފި

ދިވެހިރާއްޖޭގައި މަސައްކަތްކުރުމަށް ބިދޭސީ މަސައްކަތްތެރިން ގެނައުމުގެ ހުއްދަ ހޯދުމަށްޓަކައި ކޯޓާއަށް އެދި ވަޒީފާދޭ ފަރާތްތަކުން ހުށައެޅިއިރު، އޮޅުވާލާފައިވާ ސައްޙަ ނޫން ލިޔެކިޔުންތަކެއް ހުށައެޅި ކުންފުނިތަކެއްގެ ނަންތައް ހާމަކޮށްފިއެވެ.

މި ކުންފުނިތަކުގެ ނަންތައް ހާމަކޮށްފައިވަނީ އިކޮނޮމިކް މިނިސްޓްރީން އާންމުކުރި ނޫސް ބަޔާނެއްގައެވެ.

އިކޮނޮމިކް މިނިސްޓްރީން ބުނީ ދިވެހިރާއްޖޭގައި ވަޒީފާ އަދާކުރުމަށް ބިދޭސީމަސައްކަތްތެރިން ގެނައުމުގެ ހުއްދަ ހޯދުމަށްޓަކައި ކޯޓާއަށް އެދި ވަޒީފާދޭ ފަރާތްތަކުން ހުށަހަޅާއިރު، އޮޅުވާލާފައިވާ ސައްޙަ ނޫން ލިޔެކިޔުންތައް ހުށަހަޅާކަން މިނިސްޓްރީއަށް ދަނީ ފާހަގަކުރެވެމުންކަމަށެވެ. އަދި މި ފަދަ ފަރާތްތަކާމެދު ޤާނޫނީ ގޮތުން އަޅަން ޖެހޭ ފިޔަވަޅުތައް އަޅާނެކަމަށް މިނިސްޓްރީން ވަނީ ބުނެފައެވެ.

އެގޮތުން މިއަދު ނެރުނު މި ބަޔާނުގައި ވަނީ އެގޮތަށް އަމަލުކުރާ 13 ކުންފުންޏެއްގެ ނަން އާންމުކޮށްފައެވެ.

އެއީ

• ނިއު ސަން އިންވެސްޓްމެންޓްސް ޕްރައިވެޓް ލިމިޓެޑް،
• މިޝްކާ އިންވެސްޓްމެންޓް ޕްރައިވެޓް ލިމިޓެޑް،
• ވެމްޒޯ ޕްރައިވެޓް ލިމިޓެޑް،
• ސަރަމީ ޕްރައިވެޓް ލިމިޓެޑް،
• ޒުބައިރު ޢަބްދުﷲ (ރަން ހިރު ފެހުން)،
• ސައިފުﷲ ޙަސަން (ކިންގް ކޮންސްޓްރަކްޝަން)،
• ޖިއާޒު މޯލްޑިވްސް ޕްރައިވެޓް ލިމިޓެޑް،
• ނިއޯ އީކޯ ޕްރައިވެޓް ލިމިޓެޑް،
• އުޘްމާން ނަޢީމް (ކޮމްބައިން ބިލްޑް)،
• މުޙައްމަދު ފަތުޙުﷲ (އެފް.އެސް.ބީ ހޯލްޑިންގްސް)،
• ސަން ސިޓީ އިންވެސްޓްމެންޓް ޕްރައިވެޓް ލިމިޓެޑް،
• ސިނޮޕެކް ޕްރައިވެޓް ލިމިޓެޑް
• ވޯޓަރ ޕާކް މޯލްޑިވްސް ޕްރައިވެޓް ލިމިޓެޑެވެ.

މި ބަޔާނުގައި މިނިސްޓްރީން ވަނީ މިފަދަ ފަރާތްތަކުން ހުށަހަޅާ ސައްޙަ ނޫން ލިޔެކިޔުންތަކާ ބެހޭގޮތުން ތަޙުޤީޤު ކުރުމަށް މޯލްޑިވްސް ޕޮލިސް ސަރވިސްއަށް މައްސަލަ ހުށައަޅާފައިވާކަމަށް ބުނެފައެވެ.