އިސްލާމިކް ޔުނިވާސިޓީ އުވާލުމަށް މަޖިލީހުގައި ބަހުސްކޮށްފި

ރާއްޖޭގައި ވަކިން އިސްލާމިކް ޔުނިވާސިޓީއެއް އޮންނަންޖެހޭނެ ކަމަށް ގަބޫލު ނުކުރައްވާކަމަށް މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ (އިންތި) ވިދާޅުވެއްޖެއެވެ.

އިންތި މިހެން ވިދާޅުވީ މިއަދު ބޭއްވި ރައްޔިތުންގެ މަޖިލީހަށް، އިސްލާމީ ޔުނިވަސިޓީގެ ގާނޫނަށް އިސްލާހު ގެންނަން ސަރުކާރުގެ ފަރާތުން އުނގޫފާރު ދާއިރާގެ މެންބަރު މުހައްމަދު ވަހީދު ހުށަހެޅުއްވި އިސްލާހަށް ބަހުސް ކުރައްވަމުންނެވެ.

އިންތި ވިދާޅުވީ އޭނާ ދެކެވަޑައިގަންނަވާ ގޮތުގައި ރަނގަޅު ފުރިހަމަ ކޮލިޓީ ތައުލީމެއް ދެވޭނީ އެއް ޔުނިވާސިޓީއެއް މި ވަގުތު ބަހައްޓައިގެން ކަމަށެވެ. އަދި އިސްލާމިކް ޔުނިވާސިޓީއޭ ނުކިޔުނު ކަމުގައި ވިޔަސް ރާއްޖޭގައި ހުންނާނީ އިސްލާމިކް ޔުނިވާސިޓީ ކަމަށާއި އިސްލާމީ ތައުލީމު ފުރިހަމަ ގޮތުގައި ދެވޭނެ ފެކަލްޓީއެއް ގައުމީ ޔުނިވާސިޓީގައި ބެހެއްޓިދާނެ ކަމަށް އިންތި ވިދާޅުވިއެވެ.

އެބިލަށް ބަހުސް ކުރައްވަމުން ތުޅާދޫ ދާއިރާގެ މެންބަރު ހިސާން ހުސައިން ވިދާޅުވީ ދުނިޔޭގައި އަމަލު ކުރަމުންދާ އެންމެ ރަނގަޅު އުސޫލަކީ ވަކި މާއްދާތަކަށް ޔުނިވާސިޓީއެއްގައި ވަކި ފެކަލްޓީތަކެއް ގާއިމު ކުރުން ކަމަށެވެ.

އަދި ވަކި މާއްދާއަކަށް ވަކި ކޮލެޖެއް ނުވަތަ ވަކި ޔުނިވާސިޓީއެއް އޮންނަން ނުޖެހޭ ކަމަށް ހިސާން ވިދާޅުވިއެވެ. ހިސާން ވިދާޅުވީ ގައުމީ ޔުނިވާސިޓީގައި އިސްލާމިކް ފެކަލްޓީއެއް ތަރައްގީކޮށް އެ ފެކަލްޓީގެ ޕްރޮގްރާމްތައް ފުޅާކޮށް ހިންގުމުން އިސްލާމީ އިލްމު މާ ހަރުދަނާކޮށް ދެވޭނެ ކަމަށެވެ.

ގިނަ މެންބަރުންވަނީ މިއަދުގެ ޖަލްސާގައި އިސްލާމިކް ޔުނިވާސިޓީ ގައުމީ ޔުނިވާސިޓީގެ ދަށަށް ގެންދިއުމަށް ތާއީދު ކުރައްވައި ވާހަކަދައްކަވާފައެވެ.

ނަމަވެސް މަޑުއްވަރީ ދާއިރާގެ މެންބަރު އާދަމް ޝަރީފު ވިދާޅުވީ ވެރިކަން ބަދަލުވާ ކޮންމެ ފަހަރަކު ޔުނިވާސިޓީތަކުގެ ހިންގުން ބަދަލު ކުރަން ޖެހޭނަމަ އެ ކަމުގެ ނޭދެވޭ އަސަރު ކުރާނެ ކަމަށެވެ. އަދި ގައުމީ ޔުނިވާސިޓީގެ ހިންގުން ހަރުދަނާ ކުރާ ފަދައިން ސައްތައިން ސައްތަ އިސްލާމީ ގައުމެއްގައި އިސްލާމީ ޔުނިވާސިޓީއެއް ވެސްް އޮންނަން ޖެހޭނެ ކަމަށް ވިދާޅުވިއެވެ.

އަދި އިސްލާމިކް ޔުނިވާސިޓީގެ އިތުރު ކެމްޕަސްތަކެއް ވެސް އަތޮޅުތެރޭގެ ރަށްތަކުގައި ގާއިމު ކުރުމަށް ޝަރީފު ވަނީ ގޮވައިލައްވާފައެވެ. އެ ގޮތުން ދީނީ ހަރުކަށި ފިކުރުތައް އާންމުވެފައި ދުވަސްވަރެއްގައި އިސްލާމީ އިލްމު ފެތުރުމަށް ހާއްސަ ސަމާލުކަމެއް ދޭން ޖެހޭ ކަމަށް ޝަރީފު ވިދާޅުވިއެވެ.

އިސްލާމިކް ޔުނިވާސިޓީ އުފައްދެވީ ކުރީގެ ރައީސް އަބްދުﷲ ޔާމީންގެ ވެރިކަމުގައެވެ. އަދި ގައުމީ ޔުނިވާސިޓީގެ ކައުންސިލްގެ 12 މެންބަރުންގެ ތެރެއިން ނުވަ މެންބަރުންނަކީ ސީދާ ރައީސް އައްޔަން ކުރާ މެންބަރުން ގޮތަށް ގައުމީ ޔުނިވާސިޓީގެ ގާނޫނު ބަދަލު ވެސް ގެނެސްފައިވެއެވެ.