ގައިދީން ރިހެބިލިޓޭޝަން ޕްރޮގްރާމެއްގައި މަސައްކަތް ކުރާ ކޮންމެ ދުވަހަކަށް ޖަލު ހުކުމުން ދުވަހެއް އުނިކުރަނީ!

ގައިދީން ޖަލުތަކުގައި ރިހެބިލިޓޭޝަން ޕްރޮގްރާމެއްގައި މަސައްކަތް ކުރާ ކޮންމެ ދުވަހަކީ އެ ގައިދީއެއްގެ ޖަލު ހުކުމުން އުނިވާނެ ދުވަހެއް ކަމަށް ދާޚިލީ ސަލާމަތާ ފަންނިއްޔާތާ ބެހޭ ވުޒާރާގެ ވަޒީރު ޢަލީ އިޙްސާން ވިދާޅުވެއްޖެއެވެ.

ވަޒީރު މިފަދައިން ވިދާޅުވީ، ކ. މާފުށީގައި ގައިދީންގެ މަސައްކަތްވެސް ހިމަނައިގެން ތަރައްގީ ކޮށްފައިވާ “ދިވެހި ސަގާފީ ގޯތި” ހުޅުވުމުގެ ރަސްމިއްޔާތުގައި ވާހަކަ ދައްކަވަމުންނެވެ.

މި ރަސްމިއްޔާތުގައި ވާހަކަ ދައްކަވަމުން އިހްސާން ވިދާޅުވީ، ގައިދީން ރިހެބިލިޓޭޓް ކުރުމުގެ މަސައްކަތުގެ ތެރޭގައި ކުރިއަށްވުރެ ބޮޑަށް ގައުމިއްޔަތު ހިމެނުމަކީ ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ އަމާޒެއް ކަމަށެވެ.

އެގޮތުން، ކޮމިޝަނަރ އޮފް ޕްރިސަންސްގެ އިސްނެންގެވުމާއެކު ކަރެކްޝަނަލް ސާވިސަސްގެ އޮފިސަރުންނާއި ޖަލު ގައިދީންގެ މަސައްކަތުން ތަރައްގީ ކުރެވުނު ދިވެހި ސަގާފީ ގޯއްޗަކީ ރާއްޖޭގައި އެފަދައިން ކުރެވޭ އެންމެ ބޮޑު މަސައްކަތް ކަން އިހްސާން ފާހަގަކުރެއްވުއެވެ. އެކަން ދެމެހެއްޓެނިވި ގޮތެއްގައި ކުރިއަށް ގެންދެވޭނެ ގޮތުގެ ޕްލޭނެއްވެސް ސަރުކާރުގެ އޮތް ކަމަށް ވަޒީރު ވިދާޅުވިއެވެ.

އެގޮތުން މިތަނުގައި ކުރެވޭ މަސައްކަތަކީ ގައިދީންނަށް ދަސްކޮށްދީގެން ދެމެހެއްޓެނިވި ގޮތެއްގައި ގައިދީން ވާނެ. އަދި އެ މަސައްކަތުގެ ތެރެއިން އާމްދަނީ ލިބި އެ އާމްދަނީގެ ބައެއް ގައިދީންނަށް ސީދާ ލިބޭނެ ގޮތްތަކެއް  ހޯދުން.

ދާޚިލީ ސަލާމަތާ ފަންނިއްޔާތާ ބެހޭ ވުޒާރާގެ ވަޒީރު ޢަލީ އިޙްސާން

މިއާއެކު ވަޒީރު ވަނޫ މިކަމުގެ ތެރެއިން، ރައީސްޖުމްހޫރިއްޔާ ކަނޑައަޅާފައިވާ އައު ސިޔާސަތެއް އިއުލާން ކުރައްވާފައެވެ.

ގައިދީންގެ ތެރެއިން ރިހެބިލިޓޭޝަން މަސައްކަތުގައި ބައިވެރިވާ ކޮންމެ ގައިދީއެއް، އެއީ އިލެކްޓިރިކަލް އިންޖިނިއަރިންގެ ދާއިރާއިން ވިޔަސް، ރޭނުމުގެ ދާއިރާއިން ވިޔަސް، ސަގާފީ މަސައްކަތުގެ ދާއިރާއިން ވިޔަސް، މަސައްކަތް އުނގެނުމަށް ނުވަތަ މަސައްކަތް ކުރުމަށް މަސައްކަތްކުރާ ކޮންމެ ދުވަހަކީ ޖަލުގައި މަސައްކަތްކުރާ ކޮންމެ ދުވަހަކީ އޭނާގެ ޖަލުގެ ހުކުމުން އެއްދުވަސް ކެނޑިގެންދާނެ ދުވަހެއް

ދާޚިލީ ސަލާމަތާ ފަންނިއްޔާތާ ބެހޭ ވުޒާރާގެ ވަޒީރު ޢަލީ އިޙްސާން

އަިޚްސާން ވިދާޅުވީ، ގާނޫނު ތަކާއި ގަވާއިދު ތަކަށް ގެންނަންޖެހޭ ބަދަލުތައް ގެނެސްގެން އެ މަސައްކަތް ހަރުދަނާ ގޮތެއްގައި ގެންދެވޭ އުސޫލުތަކެއް ކަރެކްޝަނަލް ސާވިސަސް އިން ވަރަށް އަވަހަށް ކަނޑައަޅުއްވައި، އެކަން ހުރިހާ ގައިދީންނަށްވެސް އަންގަވާނެ ކަމަށެވެ.

އިހްސާން ވިދާޅުވީ، ރައީސް މުޢިއްޒުގެ ސިޔާސަތަކީ، ގައިދީން ޖަލުގައި ހޭދަކުރާ މުއްދަތުގައި، ކޮންމެވެސް މަސައްކަތެއް ދަސްކޮށް، އާމްދަނީ ހޯދޭނެ މަގެއް އެ މީހުންނަށް ހީދައިދީ، މުޖުތަމަޢުއަށް އަވަހަށް ނުކުމެވޭނެ މީހަކަށް ހެދުން ކަމަށެވެ.

އެހެންކަމުން ކަމުން، ޖަލުތަކުގައި މީހުން ގިނަ ދުވަހު ބަންދު ކުރުމުގެ ބަދަލުގައި، ޖަލަށް ވެއްދުމާއެކު، އެމީހާ އިސްލާހު ކުރުމުގެ މަސައްކަތް ފަށައި، ދަސްކުރަން ޖެހޭ ކަންކަން ދަސްކޮށްދީ، މުޖުތަމަޢުއަށް ބޭނުންތެރި މީހަކަށް ހެދުމުގެ މަސައްކަތް ކުރައްވާނެ ކަމަށް ވަޒީރު ވިދާޅުވިއެވެ. އަދި އެއީ ރައީސް މުޢިއްޒުގެވެސް އެދިލެއްވުން ކަމަށް ވަޒީރު ވިދާޅުވިއެވެ.