ބިދޭސީންނާއި ފަތުރުވެރިން، އާންމު އިޖުތިމާއީ މިންގަނޑާ ޚިލާފަށް ހެދުން އަޅާނަމަ ފިޔަވަޅު އަޅާނެކަމުގެ އިންޒާރު ފުލުހުން ދީފި

ދިވެހިރާއްޖޭގައި އުޅޭއިރު އާންމު އިޖުތިމާއީ އަދި އަޚްލާޤީ މިންގަނޑުތަކާ ޚިލާފަށް، ނިވާކަން ކުޑަކޮށް ހެދުން އަޅައިގެން އުޅޭ ފަރާތްތަކާމެދު ޤާނޫނީ ފިޔަވަޅު އަޅާނެ ކަމުގެ އިންޒާރު ދިވެހި ފުލުހުންގެ ޚިދުމަތުން ދީފިއެވެ.

މިކަމާ ގުޅޭގޮތުން ފުލުހުން ނެރުނު ނޫސް ބަޔާނެއްގައި ބުނީ، ދިވެހި މުޖުތަމަޢުގެ އަޚްލާޤީ އަދި ޢާންމު އިޖުތިމާޢީ މިންގަނޑުތައް ހިފެހެއްޓުމަކީ، ރާއްޖޭގައި ދިރިއުޅޭ އެންމެހައި ފަރާތްތަކުން އަދާކުރަންޖެހޭ ޢާންމު މަސްއޫލިއްޔަތެއް ކަމަށެވެ.

އެހެންކަމުން ރާއްޖޭގައި ދިރިއުޅޭ ބިދޭސީންވެސް ދިވެހި މުޖުތަމަޢުގެ ސަގާފަތާއި އާދަކާދައަށް އިޙްތިރާމްކޮށް، ޢާންމު ތަންތަނާއި މަގުމަތީގައި އުޅޭއުޅުމުގައި މި މިންގަނޑުތައް ހިފެހެއްޓުމަށް ފުލުހުން ވަނީ ހަނދާންކޮށްދީފައެވެ.

ފުލުހުން ފާހަގަކުރި ގޮތުގައި، މިހާރަކަށް އައިސް ރާއްޖޭގައި ދިރިއުޅޭ ބައެއް ބިދޭސީންނާއި ފަތުރުވެރިން ޢާންމު އިޖުތިމާޢީ މިންގަނޑުތަކާ ޚިލާފަށް ނިވާކަން ކުޑަކޮށް ހެދުން އަޅައިގެން މަގުމަތީގައާއި ޢާންމު ތަންތަނުގައި އުޅޭކަން ވަނީ ފާހަގަކުރެވިފައެވެ. މިއީ މުޖުތަމަޢުގެ ޢާންމު ސުލޫކީ އަދި އަޚްލާޤީ މިންގަނޑުތަކާ ޚިލާފު، އަދި މުޖުތަމަޢުގެ އަމާންކަމާއި ސުލްޙަ މަސަލަސްކަމަށް ނޭދެވޭ އަސަރުކޮށްފާނެ ކަމެއް ކަމަށް ފުލުހުން ބުނެފައިވެއެވެ.

އެހެންކަމުން، މިފަދަ ކަންކަން ހުއްޓުވުމަށްޓަކައި ޤާނޫނު ނަންބަރު 2010/11 (ޢާންމު އިޖްތިމާޢީ މިންގަނޑުތަކާ ޚިލާފު ޢަމަލުތައް ހުއްޓުވުމުގެ ޤާނޫނު) ގެ ދަށުން އަޅަންޖެހޭ އެންމެހައި ފިޔަވަޅުތައް އަޅަމުން ގެންދާނެ ކަމަށް ފުލުހުންގެ ބަޔާނުގައި ވެއެވެ. އަދި ބިދޭސީން ބަލަހައްޓާ ފަރާތްތަކުން، އެފަރާތްތަކުގެ ދަށުގައި ތިބޭ ބިދޭސީންގެ ކިބައިން މިފަދަ ޢަމަލުތައް ނުފެންނާނެ ގޮތަކަށް އަމަލުތައް ބެހެއްޓުމަށް ސަމާލުކަން ދިނުމަށްވެސް ވަނީ އިލްތިމާސްކޮށްފައެވެ.

މީގެއިތުރުން، ރާއްޖެއަށް ޒިޔާރަތްކުރާ ފަތުރުވެރިންނަށް ޚާއްޞަކޮށް ކަނޑައަޅާފައިވާ ސަރަޙައްދުތައް ފިޔަވައި، އެނޫން ޢާންމު ތަންތަނާއި މަގުތަކުގައި ފަތުރުވެރިން އުޅޭއިރު، ރާއްޖޭގެ ސަގާފަތާއި އާދަކާދައަށް އިޙްތިރާމުކޮށް، އިޖުތިމާޢީ މިންގަނޑުތަކާ އެއްގޮތަށް ހެދުން އެޅުމަށް ބާރުއެޅުމަށް ފަތުރުވެރިންނަށް ޚިދުމަތްދޭ ފަރާތްތަކަށްވެސް ފުލުހުން ވަނީ ހަނދާންކޮށްދީފައެވެ.

އަދި މި އުސޫލުތަކާ ޚިލާފުވާ ފަރާތްތަކާމެދު ޤާނޫނީ ފިޔަވަޅު އަޅާނެ ކަމުގެ އިންޒާރު ފުލުހުންގެ ބަޔާނުގައި ވަނީ ތަކުރާރުކޮށްފައެވެ.