ޝަހީބު މި ސަރުކާާރުގައިވެސް މަގާމު ދިފާާއުކުރައްވައިފި؟

ބްރޯޑްކާސްޓިންގް ކޮމިޝަންގެ މިހާރުގެ ރައީސް މުހައްމަދު ޝަހީބު އެ ކޮމިޝަނަށް ވަޑައިގެންނެވީ ކުރީގެ ރައީސް މުހައްމަދު ނަޝީދުގެ ދައުރުގައެވެ. 2010 ވަނަ އަހަރުގައި ތަސްދީގު ކުރެވުނު ޤާނޫނު ނަންބަރު 2010/16 (ބްރޯޑްކާސްޓް ކުރުމުގެ ޤާނޫނު)ގެ 3 ވަނަ މާއްދާގައިވާ ގޮތުގެ މަތިން އުފައްދާފައިވާ މި ކޮމިޝަންގެ ފުރަތަމަ ހަތް މެންބަރުންގެ ތެރޭގައި ޝަހީބު ހިމެނިވަޑައިގެންނެވިއެވެ.

އެ ހަތް މެންބަރުންެގެ ތެރެއިން މިއަދާއި ހަމައަށްވެސް އެ ކޮމިޝަންގައި ފައިތިލަ ސާބިތުކުރައްވައިގެން ހުންނެވީ ހަަމައެކަނި ޝަހީބެވެ. ރައީސް ނަޝީދުގެ ފަހުން ދެ ސަރުކާާރެއް ނިމިދިޔަ އިރުގައިވެސް، އެ ހުރިހާ ރައީސުންވެސް ޝަހީބު އެ ކޮމިޝަންގައި އިންނެވުމަށް ހިތްޕުޅާއިވިއެވެ. ފަހަރެއްގައި އެމަނިކުފާނުގެ މީޑިޔާާގެ ތަޖުރިބާ ރަނގަޅުވުމުން ކަމަށްވެސް ވެދާނެއެވެ.

ބްރޯޑްކޮމްގެ ރައީސްކަމަށް ޝަހީބް އިންތިޚާބުވެ ވަޑައިގަތުމަށްފަހު، މީޑިޔާގެ ފަލަސުރުޚީތަކަށް އެމަނިކުފާނު އަރަން ފެއްޓީ، ކުރީގެ ރައީސް އަބްދުﷲ ޔާމީންގެ ދައުރުގައެވެ. ދިވެހި ނޫސްވެރިކަމުގެ އުޖާލާ ޖައްވު ބަނަކުރި އަބުރު ރައްކާތެރިކުރުމުގެ ގާނޫނު ހުއްޓުވުމަށް އެކަށީގެންވާ މަސައްކަތެއް ނުކުރެއްވުމުންނެވެ. އެ މަސައްކަތް ނުކުރިތަނުގައި އެ މަނިކުފާނު އިސްވެ ހުރެ ހިންގެވި ބްރޯޑްކޮމްއިން އެ ގާނޫނުގެ ޒަރިއްޔާއިން، ވަކި މީޑިޔާތަކަކަށް އަމާޒުކޮށް ޖޫރިމަނާތަކެއް ކުރެއްވުމުންނެވެ.

ވަކި މީޑިޔާތަކަކަށް އަމާޒުކޮށް ޖޫރިމަނާ ކުރެވުނު ކަަމަކީ ޚުދު ޝަހީބުވެސް މަޖިލީހުގެ ކޮމެޓީގެ ކުރިމަތީގައި އިއުތިރާފްވެ ވަޑައިގަންނަވާފައިވާ ކަމެކެވެ.

ރައްޔިތުންގެ މަޖިލީހުގެ މިނިވަން މުއައްސަސާތަކާއި ބެހޭ ކޮމެޓީގެ ބައްދަލުުވުމުގައި ވާހަކަފުޅު ދައްކަވަމުން ރާއްޖެޓީވީއާއި ސަންގުޓީވީ ޖޫރިމަނާކުރި ބްރޯޑްކޮމްގެ ރައީސް މުހައްމަދު ޝަހީބު ވިދާޅުވީ ވަކިވަކި ޓީވީ ސްޓޭޝަނަކަށް ނުވަތަ ސްޓޭޝަންތަކަށް އަމާޒުކޮށްގެން ކޮމިޝަނުން މައްސަލަތައް ބަލައި ޖޫރިމަނާ ކޮށްފައިވާނެކަމަށާއި، އެގޮތަށް އަމަލުކޮށްފައިވަނީ މެންބަރުން އަމިއްލަ އަށް އިސްނަގައިގެން ވަކި ޗެނަލްތަކުގެ މައްސަލަ ކޮމިޝަނަށް ހުށަހެޅުމުން ކަމަށެވެ.

ޝަހީބު ވިދާޅުވީ ކޮމިޝަނުން ބަލާ މައްސަލަތަކުގައި ވަކި ގޮތެއް ކަނޑައަޅަން ނަގައި ވޯޓުގައި ރިޔާސަތުގައި އިންނަވާ ބޭފުޅަކަށް ވޯޓެއް ނުދެވޭތީ، ޖޫރިމަނާ ކުރި ގިނަ މައްސަލަތަކުގައި އޭނާ ވޯޓުދެއްވާފައެއް ނުވާނެއެވެ.

ނަމަވެސް ކޮމިޝަންގެ އަހުލަބިއްޔަތުން ނިންމާ ނިންމުމެއް ތަންފީޒު ކުރެއްވުމަކީ ރިޔާސަތުގެ އިންނަވާ ބޭފުޅެއްގެ ޒިންމާއަށް ކަމަށްވާތީ ނިންމުންތައް ތަންފީޒުކުރެއްވީ ކަމަށް ޝަހީބު ވިދާޅުވިއެވެ. އަދި އެހެން ދިމާވީ ކޮމިޝަންގެ މެންބަރުންގެ އިހުލާސްތެރިކަމެއް ނެތި ސިޔާސީ ނުފޫޒު ފޯރާފައިވާތީކަމަށް ޝަހީބު ވިދާޅުވިއެވެ.

ޝަހީބަކީ މިނިވަން މުއައްސަސާއެއްގެ ރައީސެކެވެ. އެ މުއައްސަސާގެ މެންބަރުންގެ މިނިވަންކަން ގެއްލުުނު ވާހަކަ ޝަހީބް ދައްކަވަންވީ، ބޮޑެތި ޖޫރިމަނާތަކުން މިންޖުވުމަށް ރާއްޖެޓީވީއާއި ސަންގުޓީވީ ސަލާންޖަހާ ނިމުނުފަހުން ހެއްޔެވެ؟ އޭގެ ކުރިން މީޑިޔާގެ އާއިލާގެ އެއް ބެލެނިވެރިޔާގެ ހައިސިއްޔަތުން ޝަހީބުގެ ޒިންމާއެއް ނެތީބާވައެވެ؟ ޚުދު ޝަހީބަކީ ލިޔުނު ވާހަކައެއްގެ ސަބަބުން ޖަލުގެ ތޭރިތައް ދުށް ފަރާތެއްކަން ހަނދާާން ނެތުނީތޯއެވެ؟

މި ވާހަކަތައް ދައްކަމުންދާ ފަރާތްތައް ކިތަންމެހާވެސް ގިނައެވެ. ނަމަވެސް ފެންނަ މަންޒަރަކީ ޝަހީބުގެ ޒިންމާއިން އެމަނިކުފާނު އަދިވެސް ރެކެމުންދާ ތަނެވެ. މިސަރުކާރުގައިވެސް އެމަނިކުފާނުގެ މަގާމު ދިފާއުކުރައްވައިގެން އިންނެވި ތަނެވެ. ޝަހީބަކީ މި ރައީސްވެސް ކޮމިޝަންގައި ބައިންދަވާނެ ފަރާާތެއްތޯއެވެ؟