ސަރުކާރުގެ ބޯހިޔާވަހިކަމުގެ ސިޔާސަތު ތައާރަފްކޮށްފި

މި ސަރުކާރުގެ ބޯހިޔާވަހިކަމުގެ ސިޔާސަތު "ބޯހިޔާވަހިކަން އެންމެނަށް" ސިޔާސަތު އިފްތިތާހްކޮށްފިއެވެ.

މިކަމަށްޓަކައި މިރޭ ބޭއްވި ރަސްމިއްޔާތެއްގައި ބޯހިޔާވަހިކަން އެންމެނަށް ސިޔާސަތު އިފްތިތާހްކޮށްދެއްވީ މާރާތްކުރުމާއި ގެދޮރުވެރިކަމާ ބިނާރާ ބެހޭ ވަޒީރު ޑރ.ޢަބްދުﷲ މުއްޠަލިބްއެވެ. މި ސިޔާސަތު އިފްތތާހްކުރުމާއެކު ސަރުކާރުގެ ބޯހިޔާވަހިކަމުގެ އުސޫލްތައް ވަނީ އާއްމުކޮށްފައެވެ.

ބޯހިޔާވަހިކަން އެންމެނަށް ސިޔާސަތު އިފްތިތާހްކޮށްދެއްވުމަށްފަހު މިނިސްޓަރު މުއްތަލިބް ވިދާޅުވީ، ރައީސް ޑރ.މުހައްމަދު މުއިއްޒުގެ ބޯހިޔާވަހިކަމުގެ ސިޔާސަތު އެކުލަވާލާފައިވަނީ ހުރިހާ ފަންތިއެއްގެ މީހުންނަށް ބޯހިޔާވަހިކަން ކަށަވަރުވާގޮތަށްކަމަށެވެ. އެގޮތުން މި ސިޔާސަތުގެ ތެރެއިން ފުދުންތެރިވިއަސް ނުވިއަސް އެމީހަކީ އަމިއްލަ ގެދޮރެއް ލިބިގެންވާ މީހަކަށް ވެގެންދިއުމަކީ މި ސިޔާސަތުގެ އެއް އަސާސްކަމަށް ވަޒީރު ފާހަގަކުރެއްވިއެވެ.

ބޯހިޔާވަހިކަމުގެ ސިޔާސަތުގެ ތެރެއިން ފްލެޓާއި ގޯތި ލިބޭ އުސޫލްތައް މިރޭ އާއްމުކުރިއިރު، ތަނަވަސްކަން ނެތް މީހުންނަށް ރެންޓް އޯން މޮޑެލްގެ ދަށުން ބޯހިޔާވަހިކަން ލިބޭއިރު، މި ސިޔާސަތުގެ ދަށުން މާލޭގެ ރަށްވެހިންގެ އިތުރުން މާލޭގައި އުޅޭތާ 15 އަހަރުވެފައިވާނަމަ ބޯހިޔާވަހިކަން މާލެ ސަރަހައްދުން ގޯތި ގެދޮރުގެ ކަށަވަރުކަން ލިބެއެވެ. އެފަރާތްތަކަށް ގޯއްޗާއި ފްލެޓް ދިނުމަށް ނިންމާފައިވަނީ މާލެ ސަރަހައްދުގެ އިތުރުން މިހާރު ހިއްކަމުންދާ ރަސްމާލެއިންނެވެ.

ކުރިއަށްއޮތް 5 މަހެއްހާ ދުވަހުގެ ތެރޭގައި ރަސްމާލެއިން ގޯތި ދޫކުރުމަށް ހުޅުވާލާނެ ކަމަށް ރައީސުލްޖުމްހޫރއްޔާ ޑރ.މުހައްމަދު މުއިއްޒު ވަނީ ވިދާޅުވެފައެވެ. ޖުމްހޫރީ ދުވަހުގެ މުނާސަބަތުގައި ބޭއްވި ޖަލްސާގައި ރައީސް ވިދާޅުވީ 15،000 ގޯތީގެ އިތުރުން 7،000 ހައުސިން ޔުނިޓްގެ މަސައްކަތްވެސް ފައްޓަވާނޭކަމަށެވެ.