ނުކުޅެދުންތެރި ފަރާތްތަކަށް އިނާޔަތްދޭން ހުށަހެޅުމުން ދައުލަތުގެ ބަޖެޓަށް ބުރަވެއްޖެ

ޚާއްސަ އެހީއަށް ބޭނުންވާ މީހުންނަށް ދެމުންދާ އިނާޔަތް 7000 ރުފިޔާއަށް ބޮޑުކުރުމަށް ހުށަހެޅުމުން އެފަދަ ބިލެއް ހުށަހެޅުމަކީ ދައުލަތުގެ ބަޖެޓަށް މަލީ ބުރައެއް ކުރިމަތިވާނެ ކަމެއް ކަމަށް ހެންވޭރު ހުޅަނގު ދާއިރާގެ މެންބަރު ހަސަން ލަތީފު ވިދާޅުވެއްޖެއެވެ.

ހަސަން ލަތީފު މިހެން ވިދާޅުވީ ނުކުޅެދުންތެރިކަން ހުންނަ މީހުންނަށް 5000 ރުފިޔާ އާއި 7000 ރުފިޔާއާ ދެމެދުގެ އިނާޔަތެއް ދޭން ދަނގެތި ދާއިރާގެ ޖޭޕީގެ މެންބަރު މުހައްމަދު ނާޒިމް ރައްޔިތުންގެ މަޖިލީހަށް ހުށަހެޅުއްވި ބިލުގެ އިބްތިދާއީ ބަހުސްގައި ވާހަކަ ދައްކަވަމުންނެވެ.

ހަސަން ލަތީފް ވިދާޅުވީ އެއްވެސް ދިރާސާއެއް ކުރުމެއްނެތި ދައުލަތުގެ ބަޖެޓަށް މާލީ ބޮޑު ބުރައެއް ކުރިމަތިވާ ގޮތަށް މަޖިލީހުގެ ބަސް ބުނަން އުނދަގޫވާނެ ކަމަށެވެ. އަދި ލަތީފުވަނީ ޖޭޕީން ދައުލަތުގެ ބަޖެޓަށް ބުރަވާ ފަދަ ބިލެއް ހުށަހެޅުމުގެ މަގުސަދާ މެދު ސުވާލު އުފައްދަވައިފައެވެ.

ނުކުޅެދުންތެރިކަން ހުންނަ މީހުންނަށް ދެމުންދާ އިނާޔަތް ބޮޑުކުރަން ހުށަހެޅުމުން ދައުލަތުގެ ބަޖެޓަށް ބުރަވާނެ ކަމެއް ކަމަށް އެމްޑީޕީގެ މެންބަރު ހަސަން ލަތީފު ވިދާޅުވި އިރު، މަޖިލިސް ކެމްޕެއިން ތެރޭގައި އެއިނާޔަތް ބޮޑުކުރާނެ ކަމަށް ވަނީ ވިދާޅުވެފައެވެ.

އަދި އުމުރުން ދުވަސްވީ މީހުންނަށް ދޭ އިނާޔަތާއި އެކަނިވެރިންގެ މައިންނަށް ދޭ އިނާޔަތް ބޮޑުކުރާނެ ކަމަށްވެސް ކެމްޕެއިންގެ ތެރޭގައި ބުނެފައިވެއެވެ.

ރައްޔިތުންނަށް ގިނަ ވައުދުތަކެއްވުމަށްފަހު މަޖިލީހުގެ މެޖޯރިޓީ އެމްޑިޕީން ނެގި ނަމަވެސް އަދި މިހާތަނަށް ރައްޔިތުންނަށް ފައިދާ ހުރި އެއްވެސް ބިލެއް ހުށަހަޅާފައިނުވާކަމަށް އިދިކޮޅު ފަރާތްތަކުން ވަނީ ބުނެފައެވެ.

އަދި މަޖިލީހުގެ މެޖޯރިޓީ ލިބުމުން ކުރިން ހިނގާފައި ހުރި ކަންކަމަށް ބަދަލު ހިފުމުގެ ރޫހުގައި މަސައްކަތް ކުރަމުންދާއިރު، އެމްޑީޕީގެ މެންބަރުން ދަނީ ކުރީގެ ސަރުކާރުގެ އިސްވެރިންގެ މައްޗަށް ތަހުގީގު ހިންގައި ދައުވާ ކުރެވޭނެ ގޮތްތައް މަގުފަހި ކުރުމަށް ރެޔާއި ދުވާލު މަސައްކަތް ކުރައްވަމުންކަމަށްވެސް ދަނީ ބުނަމުންނެވެ.