އިމާމުންނަށް ޚާއްސަ މަހާސިންތާއެއް މިމަހުގެ 21 ގައި ފަށަނީ
އިމާމުންނަށް ޚާއްސަ މަހާސިންތާއެއް މިމަހުގެ 21 ގައި ފެށުމަށް ހަމަޖެހިފައިވާކަމަށް އިސްލާމީ ކަންތައްތަކާއި ބެހޭ ވަޒީރު ޑރ.މުޙައްމަދު ޝަހީމް އަލީ ސައީދު ވިދާޅުވެއްޖެއެވެ.
މިއަދު ރައީސުލްޖުމްހޫރިއްޔާގެ އޮފީހުން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު ޝަހީމް ވިދާޅުވީ، އިމާމުންނަކީ ދިވެހިރާއްޖޭގެ ގައުމިއްޔަތުގެ ތެރޭގައި އިސްލާމީ އެއްބައިވަންތަކަން ގާއިމު ކުރުމުގެ ވަރަށް މުހިންމު މަސައްކަތެއް ކުރާ ބައެއް ކަމަށެވެ.
"އެހެންކަމުން، ދިވެހި ރާއްޖޭގައި މުޅިން އަލަށް އަޅުގަނޑުމެން ކަނޑައެޅި މަހާސިންތާ ތަކުގެ ތެރޭގައި އިމާމުންނަށް ހާއްސަ މަހާސިންތާއެއް އަޅުގަނޑުމެން ކަނޑައަޅާފައިވާނެ،"
ވަޒީރު ޝަހީމް ވިދާޅުވިއެވެ.
މި މަހާސިންތާގައި ހާޒިރުވެގެންނާއި އޮންލައިންކޮށް ޖުމްލަ 388 އިމާމުން ބައިވެރިވާއިރު، ވަޒީރު ޝަހީމް ވިދާޅުވީ، މި މަހާސިންތާގެ ބޭނުމަކީ މިވަގުތު ފިކުރީ ގޮތުން ކުރިމަތިވެފައިވާ ގޮންޖެހުންތައް އަދި މުޖުތަމައުގެ އިމާމުންގެ ދައުރަކީ ކޮބައިކަމާއި އަދި އިސްލާމީ އުންމަތް ބިނާކުރުމުގައި މިސްކިތުގެ ދައުރުގެ މައްޗަށް އިމާމުން ތަމްރީނު ކުރުން ކަމަށެވެ.
މިސްކިތަކީ އިޖުތިމާއީ ހަޔާތުގައި ވަރަށް މުހިންމު ދައުރެއް އަދާކުރާ މުއައްސަސާއެއްކަން ފާހަގަކުރައްވަމުން ވަޒީރު ޝަހީމް ވިދާޅުވީ، އިމާމުންނަކީ އެތަންތަނުގެ ލީޑަރުން އަދި މެނޭޖަރުންކަމަށާއި އެކަންކަމުގެ މައްޗަށް އިމާމުން ތަރުބިއްޔަތު ކުރުމުގައި މިފަދަ މަހާސިންތާތައް ވަރަށް ބޮޑު ދައުރެއް އަދާކުރާނެ ކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
