މި ސަރުކާރު ވެރިކަމަށް އައި އިރު ޚާރިޖީ ސިޔާސަތު އޮތީ ވިއްކާލާފައި: ޝާހިދު

ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ދިވެހިރާއްޖޭގެ ވެރިކަމާއި ހަވާލުވެ ވަޑައިގެންނެވިއިރު، ދިވެހިރާއްޖޭގެ ޚާރިޖީ ސިޔާސަތު އޮތީ ވިއްކާލާފައިކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.

އެބޭފުޅާ މިހެން ވިދާޅުވީ އެމްޑީީޕީން ކުރިއަށްގެންދާ ޒުވާނުންގެ ކޮންގްރެސްގެ ތެރެއިން މިރޭ އޮތް ޕެނަލް ޑިސްކަޝަންއެއްގައި ވާހަކަފުޅު ދައްކަވަމުންނެވެ.

ޝާހިދު ވިދާޅުވީ ރައީސް ޞާލިހު ވެރިކަމާއި ހަވާލުވެ ވަޑައިގެންނެވިއިރު، ކުރީ ސަރުކާރުން ވަނީ ރާއްޖޭގެ ޚާރިޖީ ސިޔާސަތު ވިއްކާލާފައިކަމަށެވެ. އެގޮތަށް ޚާރިޖީ ކަންކަން ބައްޓަންކުރުމުގެ ސަަބަބުން ބައިނަލްއަގްވާމީ ދުނިޔެއިން ދިވެހިރާއްޖެ އެކަހެރިވެގެން ދިޔަކަމަށް އެބޭފުޅާ ވަނީ ފާހަގަކުރައްވާފައެވެ.

މިނިސްޓަރ ޝާހިދު ވިދާޅުވީ މި ސަރުކާރުގެ ޚާރިޖީ ސިޔާސަތަކީ ދިވެހިރާއްޖެއަށް ހައްގު އިހުތިރާމް ހޯދުންކަމަށާއި، ރާއްޖޭގެ ޑިޕްލޮމެޓިކް އައުޓްރީޗް މިވަގުތު 41 ގައުމަށް އިތުރުކުރެވިފައިވާނެ ކަމަށެވެ. އެގޮތުން ބަލާލާއިރު މިވަގުތު 16 ގައުމެއްގައި ދިވެހި ރެޒިޑެންޓް ސަފީރުން ތިއްބަވާއިރު، 25ގައުމަކަށް ނޮން-ރެޒިޑެންޓް ސަފީރުން ވަނީ އައްޔަންކޮށްފައެވެ.

އެބޭފުޅާ އިތުރަށް ވިދާޅުވި ގޮތުގައި ޚާރިޖީ ސިޔާސަތު ތަންފީޒު ކުރުމުގައާއި އެކަށަ އެޅުމުގައި ޒުވާނުންގެ ދައުރު ބޮޑެވެ. މިނިސްޓަރ ވަނީ ރާއްޖޭގައި ފޮރިން ސާރވިސް ކާޑްރާއެއް އެކުލަވާލަން ޖެހޭކަމަށް ފާހަގަކުރައްވާ، ފޮރިން ސާރވިސްގެ ގާނޫނެއް މި ސަރުކާރުން މަޖިލީހަށް ހުށައަޅާނެކަމަށް ވިދާޅުވެފައެވެ.