މި ނޮވެންބަރު މަހު ވައިޑް-ބޮޑީ އެއާކްރާފްޓްގެ ހިދުމަތް ދޭން ފަށާނަން: ރައީސް ޑރ.މުޢިއްޒު

އެއަރބަސް އޭ 330-200ގެ ވައިޑް-ބޮޑީ މަތިންދާބޯޓެއް ރާއްޖެ ގެނެސް، މި އަހަރުގެ ނޮވެންބަރުމަހުގެ ތެރޭގައި ހިދުމަތް ދޭން ފަށާނެ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސް ޑރ.މުޢިއްޒު މިފަދައިން ވިދާޅުވީ، ރޭ ބޭއްވި މިނިވަން ދުވަހުގެ ރަސްމީ ޖަލްސާގައި ވާހަކަފުޅުދައްކަވަމުންނެވެ.

މިގޮތުން ރައީސް ޑރ.މުޢިއްޒު ވިދާޅުވީ، ރާއްޖެއިން ގިނަ މަންޒިލްތަކަށް ޑައިރެކްޓް ފްލައިޓު އިތުރުކުރުމުގެ މަސައްކަތް މިހާރު ފަށާފައިވާކަމަށާއި، މިދިޔަ 8 މަސް ދުވަހުގެ ތެރޭގައިވެސް ޗައިނާގެ އެކި ސަރަހައްދުތަކަށް ސީދާ ދަތުރުތައް ހަމަޖައްސާފައިވާ ކަމަށެވެ.

ރާއްޖެއަށް ވައިޑް-ބޮޑީ މަތިންދާބޯޓެއް ގެނެސް ދުރު ރާސްތާތަކަށް ޑައިރެކްޓް ދަތުރުތައް ހަމަޖެއްސުމަކީ މެނިފެސްޓޯގައި ފަތުރުވެރިކަން ކުރިއެރުވުމަށް ހިމެނުއްވި އެންމެ މުހިންމު ކަންތައްކަމަށް ރައީސް ޑރ.މުޢިއްޒު ވިދާޅުވިއެވެ.

"މި ނޮވެންބަރު މަހު އިރާދަކުރެއްވިއްޔާ ވައިޑް-ބޮޑީ އެއާކްރާފްޓްގެ ފުރަތަމަ ފްލައިޓްގެ ހިދުމަތްދޭން ފަށާނަން. އޭގެ ނަތީޖާއަކަށް ވެގެންދާނީ ހައި ސީޒަންގައި އިރާދަކުރެއްވިއްޔާ އަޅުގަނޑުމެންގެ ޓާގެޓަށް ވުރެ ވެސް މައްޗަށް، މިއަހަރުގެ 2 މިލިއަން ޓުއަރިސްޓުން އޮތީ، ޓާގެޓް އެއަށްވުރެ ވެސް މައްޗަށް އިރާދަކުރެއްވިއްޔާ ގެންދާނަން. އެއީ އަމާޒަކީ."

ރައީސް ޑރ.މުޢިއްޒު ވިދާޅުވިއެވެ.

ރައީސް ޑރ.މުޢިއްޒު ވިދާޅުވީ، މި ހިދުމަތާއިއެކު، ޗައިނާގެ އެކި މަންޒިލްތަކުގެ އިތުރުން ދުނިޔޭގެ އެހެން ހިސާބުތަކަށް ވެސް ރާއްޖޭގެ ފަތުރުވެރިކަން ފުޅާ ކުރެވިގެންދާނެ ކަމަށެވެ.

ރައީސް ޑރ.މުޢިއްޒުގެ ރިޔާސީ ވައުދުފުޅާއި އެއްގޮތަށް އެއަރބަސް އޭ 330-200ގެ ވައިޑް-ބޮޑީ މަތިންދާބޯޓެއް ރާއްޖެއަށް ގެނައުމުގެ އެއްބަސްވުމުގައި އައިލެންޑް އޭވިއޭޝަން ސަރވިސަސް ލިމިޓެެޑާއި އެއަރލައިންތަކަށް މަތިންދާބޯޓު ފޯރުކޮށްދޭ ކުންފުންޏެއް ކަމަށްވާ ޓްރޫނޯޑްއާ ދެމެދު ސޮއިކޮށްފައިވަނީ އިއްޔެއެވެ.

މިކަމާއި ގުޅިގެން މޯލްޑިވިއަނުން ބުނީ، އެ ކުންފުނީގެ އުދުހުންތަކަށް އޭ330-200 ތަޢާރަފުކުރުމުން އެއަރލައިންގެ އޮޕަރޭޝަނަލް ޤާބިލުކަން ވަރަށް ބޮޑަށް އިތުރުވެ، އައު މަންޒިލުތަކަށް އުދުހުމުގެ ފުރުޞަތު ލިބި، ފަސިންޖަރުންނަށް އިތުރަށް ފެންވަރު ރަނގަޅު ދަތުރުފަތުރުގެ ތަޖުރިބާއެއް ލިބިގެންދާނެކަމަށެވެ.

އެއާ ބަސްގައި ތިން ކްލާހެއް ހިމެނޭއިރު، އޭގެ ތެރޭގައި، ބިޒްނަސް އަށް 18 ގޮނޑި އާއި ފްރިމިއަކް އެކޮނަމީއަށް 36 ގޮޑިއާއި އިކޮނޮމީ ކުލާހުގައި 210 ގޮޑިއާއެކު ޖުމްލަ 264 ގޮނޑި ހިމެނޭނެއެވެ.

މި މަތިންދާބޯޓުން އެންމެ ފުރަތަމަ ދަތުރުތައް ފެށުމަށް ހަމަޖެހިފައިވަނީ ޗައިނާއަށެވެ.