ކުޑަހުރާ ރިސޯޓްގައި ދިވެހިންނާއި މެދު ތަފާތުކުރަނީ؟

މާލެ އަތޮޅު ފޯ ސީޒަންސް ކުޑަހުރާ ރިސޯޓްގެ ދިވެހި މުވައްޒަފުންނާއި އިންޑިޔާގެ މުވައްޒަފުންނާއި މެދު ތަފާތުކުރުން ގެންގުޅޭކަމަށް އެ ރިސޯޓްގެ މުވައްޒަފުން ތުހުމަތުކޮށްފިއެވެ.

މުވައްޒަފުން މިހެން ބުނެފައިވަނީ ތުނބުޅި ދިގުކޮށްފައި ބެހެއްޓުން އެ ރިސޯޓްގެ މުވައްޒަފުންނަށް މަނާކޮށްފައިވާއިރު، އިންޑިޔާގެ މުވައްޒަފަކަށް އެކަން ކުރުމަށް ހުއްދަ ދިން މައްސަލައެއްގައެވެ.

މައުލޫމާތު ލިިބިފައިވާގޮތުގައި ތުނބުޅި ދިގުކުރުމުގެ ހުއްދަ ދީފައިވަނީ ދީނީ ކަމެއްގެ ގޮތުގައި، އެ ރިސޯޓްގައި މަސައްކަތްކުރާ އިންޑިޔާގެ ޕަންޖާބުގެ މީހަކަށެވެ. އެއީ ސިކް ދީނުގެ މީހެއްކަމަށްވެއެވެ.

މިކަމާއި ގުޅިގެން އެ ރިސޯޓުގައި މަސައްކަތް ކުރާ ބައެއް ދިވެހިން އެ ރިސޯޓްގެ އެޗްއާރު މެނޭޖަރާ ވަނީ ބައްދަލުކޮށްފައިވެއެވެ. އެ ބައްދަލުވުމުގައި އެޗްއާރު މެނޭޖަރ ވަނީ، ދީނީ ކަމެއްގެ ގޮތުގައި އިންޑިޔާ މީހާއަށް އެ ހުއްދަ އޮތް ނަމަވެސް ދިވެހިންނަށް އެ ހުއްދަ ނުދޭނެކަމަށް ބުނެފައެވެ.

ފާހަގަކޮށްލެވޭ ގޮތުގައި ފޯސީޒަންސް ކުޑަހުރާ ރިސޯޓްގެ އެޗްއާރް މެނޭޖަރަކީވެސް އިންޑިޔާގެ ރައްޔިތެކެވެ. މިކަމާއި ގުޅިގެން އެ ރިސޯޓުން މިހާތަނަށް ވަކިއެއްޗެއް ބުނެފައެއް ނުވެއެވެ.

ދުނިޔޭގެ ޓުއަރިޒަމް ސިނާއަތުގެ ގިނަ ތަންތަނުގައި މުވައްޒިފުންނަށް ތުނބުޅި މަތިމަސް ދިގުކޮށްފައި ނުބެހެއްޓޭނެއެވެ.