ގޯހެއް ހެދިއްޖެކަން ރައްޔިތުންނަށް މިހާރު އެނގޭ: ރައީސް ޞާލިހު

ވެރިކަން ބަދަލުކޮށް، ރައީސުލްޖުމުހޫރިއްޔާ ޑރ. މުހައްމަދު މުޢިއްޒަށް ވެރިކަން ހޯދައިދިނުމަކީ ހެދުނު ގޯހެއްކަން ރައްޔިތުންނަށް ޔަގީންވެފައިވާ ކަމަށް ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވެއްޖެ އެވެ.

އެމްޑީޕީގެ ޓިކެޓުގައި ގދ. ގައްދޫ ދާއިރާއަށް ވާދަކުރައްވާ ކުރީގެ ފެނަކައިގެ މެނޭޖިން ޑިރެކްޓަރު އަހުމަދު ސައީދުގެ މާލޭ ކެމްޕޭނު އޮފީސް ހުޅުއްވުމަށް ރޭ ބޭއްވި ޖަލްސާގައި ވާހަކަދައްކަވަމުން ރައީސް ސޯލިހު ވިދާޅުވީ، މި ސަރުކާރު ވެރިކަމަށް އައުމަށްޓަކައި ރައްޔިތުންނަށް ދެއްކި ހުވަފެނާއި، ހެދި ދޮގުތަކާއި އޮޅުވާލުންތަކުގެ ހަގީގަތް މިހާރު ރައްޔިތުންނަށް ހާމަވަމުންދާ ކަމަށެވެ.

"އަޅުގަނޑު މިކުރާ ދަތުރުތަކުގައި ރަށްރަށުން ވެސް ލިބެނީ ހަމަ އެ މެސެޖު. ގޯހެއް ހެދިއްޖެކަން ރައްޔިތުންނަށް ގަބޫލުކުރެވޭ. ގަބޫލުކުރެވޭ ވަރަށް އެބޭފުޅުން އެކަންތައް ކޮށްފި. ރައްޔިތުން ތިބީ މި ހެދުނު ގޯހުން ސަލާމަތް ވުމަށް މަސައްކަތް ކުރަން ތައްޔާރަށް. އަޅުގަނޑަށް އިރާދަކުރެއްވިއްޔާ ޔަގީން މި މަޖިލީހުގެ އިންތިހާބު ނިމިގެން ދާއިރުގަ އަޅުގަނޑުމެންނަށް ގިނަ ގޮނޑިތަކެއް ރާއްޖޭގެ އެކި ކަންކޮޅުތަކުން ލިބިގެންދާނެ،"

ކުރީގެ ރައީސް އިބްރާހިމް މުހައްމަދު ޞާލިހު

ރައީސް ސޯލިހު އިތުރަށް ވިދާޅުވީ، މިސަރުކާރު ހަމަ މަގަށް އެޅުވުމަށް މަސައްކަތް ކުރެވެން އޮތް ތަނަކީ ރައްޔިތުންގެ މަޖިލީސް ކަމަށެވެ.

"އޭރުވެސް ހެދީ ދޮގު. މިހާރު ވެސް ހަދަމުން ދަނީ ދޮގު. އަޅުގަނޑަށް ޔަގީން ފުރުސަތު ދިން ވަރަކަށް ދާނީ އަނެއްކާވެސް ދޮގު ހަދަމުން. ދޮގު ހަދަމުން ހަދަމުން ގޮސް ކައިރީގައި ތިބި ބޭފުޅުން ލައްވަ ވެސް ދޮގު ހަދުވަމުން އެދަނީ. އެއް ދޮލަނގުފުރި ބަންޑުންވަމުން މިހާރު އެދަނީ،"

ކުރީގެ ރައީސް އިބްރާހިމް މުހައްމަދު ޞާލިހު

ކަންމިހެން ހުރުމުން، ސަރުކާރު ޖަވާބު ދާރީ ކުރުވައި، ރައްޔިތުންނަށް ސަރުކާރު ތެރޭގައި ކަން ހިނގާ ގޮތް އޮޅުން ފިލުވައިދިނުމަށް ފަސޭހަ ކުރުމަށް ރައްޔިތުންގެ މަޖިލީހުގެ މެޖޯރިޓީ އެމްޑީޕީއަށް ލިބެންޖެހޭ ކަމަށް ޞާލިހު ވިދާޅުވި އެވެ.

ސަރުކާރު ޖަވާބުދާރީ ކުރެވެން ޖެހޭނެ. ވަޒީރުންނާއި ސުވާލު ކުރެވެންޖެހޭނެ. ހަމަ މަގަށް އެޅޭ މަސައްކަތް ތަކުން ނަތީޖާ ނުނިކުންނަ ނަމަ، ދެން ކުރަންޖެހޭ ކަންކަންވެސް ކުރަންޖެހޭނެ.

ކުރީގެ ރައީސް އިބްރާހިމް މުހައްމަދު ޞާލިހު

ރައީސް ޞާލިހު ވިދާޅުވި ގޮތުގައި، އިދިކޮޅު މެންބަރުންގެ ގޮތުގައި މަޖިލީހުގައި ތިއްބަވާ ބޭފުޅުންނަކީ ވަރަށް ރަނގަޅު ޢަޒުމެއްގައި ކެރިގެން މަސައްކަތް ކުރަންޖެހޭ ބައެއް ކަމަށެވެ. އަދި ސަޢީދަކީ އެފަދަ ބޭފުޅެއް ކަމަށް ވިދާޅުވެ އެމަނިކުފާނު ވަނީ ސަޢީދަށް ވަރަށްބޮޑަށް ތަޢުރީފް ކުރައްވާފައެވެ.