ތިލަފުށިން އުތުރުތިލަފަޅާއި ހަމައަށް ބްރިޖެއް އެޅުމުގެ ފީސިބިލިޓީ ދިރާސާ ހަދަން މަޝްވަރާކޮށްފި

ތިލަފުށިން ފެށިގެން އުތުރުތިލަފަޅާއި ހަމައަށް ބްރިޖެއް އެޅުމުގެ ފީސިބިލިޓީ ދިރާސާ ހެދުމާއި ގުޅޭގޮތުން އިމާރާތްކުރުމާއި ބިނާރާއި ބެހޭ ވަޒީރު ޑރ. އަބްދުالله މުއްޠަލިބް، އޭޝިއަން އިންފްރާސްޓްރަކްޗަރ އިންވެސްޓްމަންޓް ބޭންކް (އޭއައިއައިބީ)ގެ އިސްވެރިންނާ ބައްދަލުކުރައްވައި މަޝްވަރާ ކުރައްވައިފިއެވެ.

މިކަމާއި ގުޅޭގޮތުން އިމާރާތްކުރުމާއި ބިނާރާއި ބެހޭ ވުޒާރާއިން ބުނީ، މި ބައްދަލުވުމުގައި ވަޒީރު ޑރ. މުއްޠަލިބް، މި މަޝްރޫޢަކީ ކުރިމަގުގައި މި ސަރަޙައްދުގެ ގުޅުން ބަދަހިކޮށް، އިޤްތިޞާދީ ކުރިއެރުމަށް މަގުފަހިކޮށްދޭނެ މުހިންމު މަޝްރޫޢެއް ކަން ފާހަގަކުރައްވާފައިވާ ކަމަށެވެ.

ހަމައެއާއިއެކު، މި ބައްދަލުވުމުގައި ވަޒީރު މުއްޠަލިބް ވަނީ  ރާއްޖޭގައި މީހުން ދިރިއުޅޭ ގާތްގަނޑަކަށް 187 ރަށް އޮތްއިރު މިރައްރަށުގައި އުމްރާނީ ތަރައްޤީ ކުރިއެރުވުމަށްޓަކައި ގިނަގުނަ މަޝްރޫއުތަކެއް މިހާރުވެސް ހިންގަމުންދާކަމަށް ވިދާޅުވެފައެވެ.

އިމާރާތްކުރުމާއި ބެހޭ ވުޒާރާއިން އިތުރަށް ވިދާޅުވީ މިއީ ރާއްޖޭގެ ތަރައްޤީއަށް ބޭނުންވާ އިންފްރާސްޓްރަކްޗަރ މަޝްރޫޢުތަކަށް ބައިނަލްއަޤްވާމީ އެހީ ހޯދުމަށް ސަރުކާރުން ކުރަމުންދާ މަސައްކަތުގެ ތެރެއިން ބޭއްވުނު މުހިންމު ބައްދަލުވުމެއް ކަމަށެވެ.

އޭޝިއަން އިންފްރާސްޓްރަކްޗަރ އިންވެސްޓްމަންޓް ބޭންކުން މިހާރުވެސް ރާއްޖޭގައި 4 މަޝްރޫޢެއް ހިންގުމަށް ފަންޑިންގް ދޫކޮށްފައިވާއިރު، އޭގެ ތެރޭގައި ކޮވިޑް މެނޭޖްމަންޓް ހެލްތް ޕްރިޕެއާރޑްނެސް ޕްރޮޖެކްޓް ގެ އިތުރުން ގްރޭޓަރ މާލެ އޭރިއާގައި ކުނިން ހަކަތަ އުފެއްދުމުގެ މަޝްރޫޢު އަދި ސޯލަރ ޕަވަރ ޑިވެލޮޕްމަންޓް ފަދަ މަޝްރޫއުތައް ފާހަގަކޮށްލެވެއެވެ.