އާއްމު ޚިދުމަތް ދިނުމަށް އަޅާފައިވާ ނެޓްވޯކް ތަކަށް ގެއްލުން ނުވާނެހެން ކެންޕެއިން ބެނާ ހަރުކުރަން އެޗްޑީސީން އެދިއްޖެ

ހުޅުމާލޭގެ އެކި ސަރަހައްދުތަކުގައި ކެމްޕެއިން ބެނާއާއި ކެންވަސް ހަރުކުރާއިރު، އާއްމު އެކިއެކު ޚިދުމަތް ދިނުމަށް އަޅާފައިވާ ނެޓްވޯކްތަކަށް ގެއްލުން ނުވާނެހެން އެކަން ކުރުމަށް ހައުސިންގ ޑިވެލަޕްމަންޓް ކޯޕަރޭޝަން، އެޗްޑީސީން އެދިއްޖެއެވެ.

މިކަމާއި ގުޅިގެން އެޗްޑީސިީން ނެރުނު އިއުލާނެއްގައި ބުނީ، ރާއްޖޭގައި ބޭއްވޭ އާއްމު އިންތިހާބުތަކާ ގުޅިގެން ކެންޕެއިން ބެނާއާއި ކެންވަސް ފަދަ މެޓީރިއަލް ހަރުކުރުމުގެ ފުރުސަތު، ހުރިހައިފަރާތްތަށް ވެސް ހަމަހަމަ ކަމާއެކު ހޯދައިދިނުމަށް އެ ކޯޕަރޭޝަނުން އަބަދުވެސް މަސައްކަތް ކުރަމުންދާ ކަމަށެވެ.

އަދި ކެންޕެއިން ބެނާ އާއި ކެންވަސް ފަދަ ތަކެތި ހަރުކުރަމުންދާއިރު، އެ ސަރަހައްދުތަކުގައި އާއްމު ހިދުމަތްތައް ފޯރުކޮށްދިނުމަށް ސާވިސް ޕްރޮވައިޑަރުން އަޅާފައިވާ ނެޓްވޯކްތަކަށް ގެއްލުން ނުވާނޭހެން މަސައްކަތް ކުރިއަށް ގެންގޮސްދިނުމަށް އެކޯޕަރޭޝަނުންވަނީ އެދިފައެވެ.

އެއީ، ޕޯސްޓަރ ތަކާއި ބެނާތައް ހަރުކުރެވޭ ސަރަހައްދުގެ ގޮތުން ކަރަންޓް ކޭބަލްއާއި ފެނާއި ނަރުދަމާގެ ނިޒާމަށް ގެއްލުމެއް ލިބި، ހިދުމަތް މެދުކެނޑޭފަދަ ހާލަތެއް ދިމާވެއްޖެނަމަ، ރައްޔިތުންނަށް މީގެ ސަބަބުން ގިނަ އުނދަގޫ ކުރިމަތިލާންޖެހިދާނެތީއެވެ.

އެޗްޑީސީ

އެހެންކަމުން، ކުރިއަށް އޮތްތަނުގައި މިފަދަ ކެންވަސް ތަކާއި ބެނާތައް ހަރުކުރާ ފަރާތްތައް އެ ކަމަށް ސަމާލުވެލައްވައި، ކެމްޕެއިން މެޓީރިއަލް ހަރުކުރުމުގެ ކުރިން އެ ކޯޕަރޭޝަންގެ ހުއްދަ ހޯއްދަވައި، ކޯޕަރޭޝަންގެ ލަފައާއި އިރުޝާދާ އެކު ކުރިއަށް ގެންދިއުމަށް އެޗްޑީސީން ވަނީ އެދިފައެވެ.

އަދި ކެމްޕއިން މެޓީރިއަލް ހަރުކުރުމަށް ހުއްދަ ދިނުމަށް ކަނޑައެޅިފައިވާ ސަރަހައްދުތަކުގެ ޗާޓެއް ވެސް އެ ކޯޕަރަެޝަންގެ ބަޔާނާއިއެކު ވަނީ އާއްމުކޮށްފައެވެ.

މިކަމާއި ގުޅޭ އިތުރު މައްލޫމާތު ސާފުކުރުމަށް އެޗްޑީސީގެ ބިޒްނަސް ސޮލިއުޝަނުގެ ނަމްބަރ 3355306 ނުވަތަ [email protected] އަށް އީމެއިލްކޮށް ދެއްވުން އެޗްޑީސީން އެދިފައިވެއެވެ.

އަންނަ އޭޕްރީލް މަހުގެ 21 ވަނަ ދުވަހު ރައްޔިތުންގެ މަޖިލީހުގެ އިންތިޚާބު ބާއްވާއިރު، ކެންޑިޑޭޓުން އަންނަނީ ފޯރިއާއެކު ކެންޕެއިން ކުރަމުންނެވެ.