”މައުމޫން“ ފޮންޓަކީ ރައީސް މައުމޫންގެ ޤައުމީ ޚިދުމަތުގެ ތެރެއަށް އިތުރުވެގެންދިޔަ އައު ބޮޅެއް: ރައީސް ޞާލިޙް

ކުރީގެ ރައީސް މައުމޫން އަބްދުލްޤައްޔޫމްގެ އަތުލިޔުން އަސްލަކަށް ބަލައިގެން ތާނަ ފޮންޓެއް އާންމު ކުރެވިގެން ދިޔުމަކީ އެމަނިކުފާނުގެ ޤައުމީ ޚިދުމަތުގެ ތެރެއަށް އިތުރުވެގެންދިޔަ އާ ބޮޅެއް ކަމަށް ކުރީގެ ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

ރައީސް މައުމޫންގެ އަތުލިޔުން އަސްލަކަށް ބަލައިގެން ”މައުމޫން“ ފޮންޓު ނެރެނީ މައުމޫން ފައުންޑޭޝަނާއި އަކުރު ޓަައިޕް ގުޅިގެންނެވެ. ފޮންޓް ނެރުނީ އާޓް ގެލެރީގައި ހުކުރު ދުވަހުގެ ރޭ ބޭއްވި ހާއްސަ ރަސްމިއްޔާތެއްގަ އެވެ.

މި ފޮންޓް ނެރުމަށް ފަހު ފޮންޓް ދައްކާލުމަށް ހޮނިހިރު ދުވަހު މާލެ އާޓް ގެލަރީގައި މައުރަޒެއް ބާއްވާފައިވާއިރު، އެ މައުރަޒަށް ރައީސް ޞާލިޙްވެސް ވަނީ ވަޑައިގެންފައެވެ.

އެފަހުން، މިއަދު، އެކްސްގައި ކުރެއްވި ޕޯސްޓެއްގައި އެމަނިކުފާނު ވިދާޅުވީ، ”މައުމޫން“ ފޮންޓަކީ އެމަނިކުފާނު ދިވެހިބަސް ދިރުވައި އާލާ ކުރެއްވުމަށް ކުރެއްވި މަސައްކަތްޕުޅުގެ ރަމްޒެއް ކަމަށެވެ.

‏ރައީސް ⁦‪މައުމޫން‬⁩ އަށް ވަރަށް ބޮޑަށް ޝުކުރު ދަންނަވަމެވެ. އަދި “މައުމޫން”  ފޮންޓްަ ފަރުމާކުރެއްވި ގްރެފިކް ޑިޒައިނަރ⁦⁩ އަދި އެކްރިއާ ސުޓޫޑިއޯ އަށް މަރުޙަބާ ދަންނަވަމެވެ.

ރައީސް ޞާލިޙް

ރައީސް މައުމޫނަކީ ވަރަށް މޮޅު ކެލެގްރާފަރެކެވެ. ދިވެހިންނާއި އަރަބީން ވަރަށް ރީތިކޮށް ލިޔުއްވަ އެވެ. މާލޭގެ ބޮޑު މިސްކިތް -- އިސްލާމީ މަރުކަަޒުގެ މިހުރާބުގޭގައިވާ ފިލާގައި އެ ވަނީ ރައީސް މައުމޫންގެ އަތުލިޔުއްވުމެވެ. އިސްލާމީ މަރުކަޒުގެ ނަން ބޯޑް ވެސް ލިޔުއްވާފައި ވަނީ މައުމޫން އެވެ.