ދައުލަތުގެ ދަރަންޏާއި ބެހޭ ބިލާއި، ފިސްކަލް ޒިންމާގެ ބިލަށް އާއްމުންގެ ޚިޔާލް ހޯދަނީ

ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ، "ދައުލަތުގެ ދަރަންޏާބެހޭ ބިލު" އާއި “ދައުލަތުގެ ފިސްކަލް ޒިންމާގެ ބިލު” އަށް ޢާންމުންގެ ޚިޔާލު ހޯދުމަށް ފުރުޞަތު ހުޅުވާލައިފިއެވެ.

ރައްޔިތުންގެ މަޖިލީހުން ކުރި އިއުލާނެއްގަައި ބުނީ، މާލިއްޔަތު ކޮމިޓީން ދިރާސާ ކުރަމުންދާ މި ދެ ބިލަށް އެއްވެސް ފަރާތެއްގެ ޚިޔާލެއް ނުވަތަ އިސްލާޙެއް އޮތް ނަމަ، 15 ޖުލައިވާ ހޯމަ ދުވަހުގެ 14:00 ގެ ކުރިން ހުށަހެޅުމުގެ ފުރުސަތު އޮތް ކަމަށެވެ.

އެގޮތުން ޚިޔާލް ހުށަހަޅާނީ، [email protected] އަށް ނުވަތަ މަޖިލީހުގެ އިދާރާއަށް ލިޔުމަކުން ކަމަށްވެސް ބުނެފައިވެއެވެ.

ދައުލަތުގެ ފިސްކަލް ޒިންމާގެ ބިލު ހުށަހެޅުއްވީ ތުލުސްދޫ ދާއިރާގެ މެންބަރު އިބްރާހިމް ނަސީމެވެ. އަދި ދަރަންޏާ ބެހޭ ބިލު ހުށަހެޅުއްވީ ފުނަދޫ ދާއިރާގެ މެންބަރު މުހައްމަދު މަމްދޫހުއެވެ.

މީގެ ތެރެއިން މިހާރު އަމަލު ކުރަމުންދާ ދައުލަތުގެ ހަރަދަށް ޒިންމާވާ ގާނޫނުގެ ބަދަލުގައި ސަރުކާރުން ހުށައެޅި ފިސްކަލް ޒިންމާގެ ބިލުގައި ފައިސާ ޗާފުކުރެވޭނެ އަދަދު ވަނީ އިތުރުކޮށްފައެވެ.

ހަރަދަށް ޒިންމާވާ ގާނޫނުގައި އޮންނަ ގޮތުން، ސަރުކާރަށް މޯލްޑިވްސް މަނިޓަރީ އޮތޯރިޓީން އެޑްވާންސްކޮށް ފައިސާ ނެގޭނީ ނުވަތަ ޗާޕު ކުރެވޭނީ އެއް ޕަސެންޓެވެ. އެއީ ގާތްގަނޑަކަށް 270 މިލިއަން ރުފިޔާއެވެ.

އެހެންނަމަވެސް، އާ ބިލުގައިވަނީ ދައުލަތުގެ ކޭޝް ފްލޯ މެނޭޖު ކުރުމަށް ބޭނުންވެއްޖެ ހާލަތެއްގައި، ފައިސާ ޗާފުކުރެވޭނެ އަދަދު 2.5 އިންސައްތައަށް އިތުރުކޮށްފައެވެ.

މިއީ ދައުލަތުގެ ފިސްކަލް އެންމެހައި ކަންކަން ހިންގަނީ ފިސްކަލް ޑިސިޕްލިން ހާސިލު ކުރެވޭނެ ގޮތަށް، ދެފުށް ފެންނަ ޒިންމާދާރު ގޮތެއްގައިކަން ކަށަވަރު ކުރުމުގެ ގޮތުން ހުށަހަޅާފައިވާ ބިލެކެވެ.

މި ބިލާއިއެކު، މަޖިލީހުން މިއަދު ބަލައިގަނެ ދިރާސާ ކުރަން މާލިއްޔަތު ކޮމިޓީއަށް ފޮނުވި ދަރަންޏާ ބެހޭ ބިލްގައި ދައުލަތުން ސޮވްރިން ގެރެންޓީ ދޭގެ ގޮތްތަކާއި ލޯކަލް ކައުންސިލްތަކާއި ސަރުކާރު ހިއްސާވާ ކުންފުނިތަކުން ދަރަނި ނެގުމުގައި އަމަލުކުރާނެ ގޮތްތައް ބަޔާންކޮށްފައިވާއިރު، ދައުލަތުގެ ދަރަންޏާ ގުޅޭ މައުލޫމާތުތައް އެކްސްޓާނަލް އޮޑިޓަރެއް މެދުވެރިކޮށް އޮޑިޓެއް ހަދައި، ދަރަނީގެ ސްޓްރެޓެޖީ ރައީސުލްޖުމްހޫރިއްޔާ އަށް ހުށަހަޅައި ކޮންމެ އަހަރެއްގެ ޖުލައި މަހުގެ 15 ކުރިން ފާސްކުރަން ޖެހޭނެ ކަމަށް ވަނީ ބަޔާންކޮށްފައެވެ.

ހަމައެއާއިއެކު، އެ ހުރިހާ ކަމެއް މެނޭޖް ކުރުމަށް ހާއްސަ އޮފީހެއް ވެސް އުފައްދަންޖެހޭނެ ކަމަށް ވެސް ދަރަންޏާއި ބެހޭ ބިލުގައި ވެއެވެ.

މި ދެ ބިލު ވެސް މަޖިލީހުން ބަލައިގަނެ، ކޮމެޓީއަށް ފޮނުވަން ފާސްކުރީ 78 މެމްބަރުންގެ ވޯޓުންނެވެ.