ބަރެސްދޫ މަޝްރޫއާއި ގުޅިގެން އެމްއައިޓީޑީސީން ރެއިންބޯ އަށް 918،000 ރުފިޔާ ދިނުމަށް ހުކުމްކޮށްފި

ބަރެސްދޫ މަޝްރޫއާއި ގުޅިގެން މޯލްޑިވްސް އިންޓްގްރޭޓެޑް ޓުއަރިޒަމް ޑިވޮލޮޕްމަންޓް ކޯޕަރޭޝަން (އެމްއައިޓީޑީސީ) އިން ރެއިންބޯ އިންވެސްޓްމަންޓް ޕްރައިވެޓް ލިމިޓެޑްއަށް ގާތްގަނޑަކަށް 918،000 ރުފިޔާ ދިނުމަށް ސިވިލް ކޯޓުން ހުކުމް ކޮށްފިއެވެ.

ލ.ބަރެސްދޫ އިންވެސްޓްމަންޓް ޕްރޮޖެކްޓުގެ ނަމުގައި ބީޗް ހޮޓާ ތަރައްޤީކޮށް ހިންގުމަށްޓަކައި ބިން ކުއްޔަށް ހިފުމަށް ޝައުގުވެރިވާ ފަރާތްތަކަށް ބީލަން ހުށަހެޅުމުގެ ފުރުސަތު މީގެ ކުރިން ހުޅުވާލުމުން ރެއިންބޯއިން ވަނީ ބީލަން ހުށައަޅާފައެވެ. އަދި އެ ބީލަން އެ ކުންފުނިން ގަބޫލުކުރުމުން، ރެއިންބޯއިން ވަނީ ބީޗު ބާ އަކާއި ގެސްޓްހައުސްއަކަށް އެޑްވާންސްގެ ގޮތުގައި ގިނަ އަދަދެއްގެ ފައިސާ އެމްއައިޓީޑީސީއަށް ޖަމާކޮށްފައެވެ.

އެހެންނަމަވެސް ބަރެސްދޫ މަޝްރޫއު ކުރިއަށް ނުގެންދެވި ހުއްޓުމުން، އެޑްވާންސަށް ދައްކާފައިވާ ފައިސާތަކެއް ހޯދުމަށް ރެއިންބޯއިން އެމްއައިޓީޑީސީއާ ދެކޮޅަށް ސިވިލް ކޯޓުގައި ދައުވާކުރީ މިދިޔަ އަހަރުގެ އޭޕްރިލް މަހުއެވެ.

މި މައްސަލައިގައި ރެއިންބޯއިން ބުނެފައިވަނީ ޖުމްލަ 1،187،766.08 ރުފިޔާ ދިނުމަށެވެ. އެއީ ބަރެސްދޫގައި ރެއިންބޯއިން ހަދަން އެއްބަސްވި ބީޗްބާއަށް އެޑްވާންސްގެ ގޮތުގައި އެ ކުންފުނިން ދައްކާފައިވާ 404،775ރ. އާއި ގެސްޓު ހައުސްއަކަށް އެޑްވާންސްގެ ގޮތުގައި ދައްކާފައިވާ 513،999.95 ރުފިޔާއެވެ.

އަދި އޭގެ އިތުރުން، އެ ފައިސާ އެމްއައިޓީޑީސީއަށް ނުދެއްކި ނަމަ ބީއެމްއެލްއިން ޑިޕޮސިޓް އިންޓެރެސްޓުގެ ގޮތުގައި ލިބޭނެކަމަށް އަންދާޒާކޮށްފައިވާ 240،991.13 ރުފިޔާ އާއ ބިޑް ޑޮކިއުމަންޓް ސަބްމިޝަންގެ ގޮތުގައި ދައްކާފައިވާ 3،000 ރުފިޔާގެ އިތުރުން ގާނޫނީ ވަކީލުންގެ ފީގެ ގޮތުގައި ދެއްކި 25،000 ރުފިޔާވެސް އޭގެ ތެރޭގައި ހިމެނެއެވެ.

އެހެން ނަމަވެސް އެމްއައިޓީޑީސީގެ ފަރާތުން ސިވިލް ކޯޓުގައި ވަނީ އެ ފައިސާ ދޭން ޖެހޭ ކަމަށް އިންކާރުކޮށްފައެވެ.

މި މައްސަލަ ބެއްލެވި ގާޒީ ގާޒީ ރިޒްމީނާ އިދުރީސް ވަނީ ރެއިންބޯއިން ހޯދަން އެދުނު ފައިސާގެ ތެރެއިން ބޭންކް އިންޓްރެސްޓަށް ލިބޭނެ ކަމަށް ލަފާ ކުރި ފައިސާއާއި، ބިޑް ސަބްމިޝަން ފީ އާއި ވަކީލު ފީ ނަގައިނުދެވޭނެ ކަމަށް ނިންމާފައެވެ.

އެހެންނަމަވެސް، ބަރެސްދޫގައި ރެއިންބޯއިން ހަދަން އެއްބަސްވި ބީޗްބާއަށް އެޑްވާންސްގެ ގޮތުގައި އެ ކުންފުނިން ދައްކާފައިވާ 404،775ރ. އާއި ގެސްޓު ހައުސްއަކަށް އެޑްވާންސްގެ ގޮތުގައި ދައްކާފައިވާ 513،999.95 ރުފިޔާ ދައްކަން ޖެހޭނެ ކަމަށް އެ ހުކުމްގައި ވެއެވެ. މިއާއި އެކު އެމްއައިޓީޑީސީ އިން ރެއިންބޯ އަށް ޖުމުލަ 918،774.59 ރުފިޔާ ދޭން ޖެހޭ އިރު، މި ފައިސާ މި މަހުގެ 21 ވަނަ ދުވަހުން ފެށިގެން 15 ދުވަހުގެ ތެރޭގައި ދެއްކުމަށް ވެސް އެ ހުކުމްގައި ވެއެވެ.

އެމްއައިޓީޑީސީ އަކީ ކުރީގެ ރައީސް އަބްދުالله ޔާމީން އަބްދުލްގައްޔޫމްގެ ވެރިކަމުގައި އުފެއްދި ކުންފުންޏެކެވެ. މި ކުންފުނިން އިއުލާނު ކުރި ފުރަތަމަ މަޝްރޫއަކީ ބަރެސްދޫން އާންމު ފަރާތްތަކަށް ބިން ދޫކޮށްގެން ޓޫރިޒަމް ވިޔަފާރި ކުރުމުގެ މަޝްރޫއެކެވެ. ނަމަވެސް މައްސަލަތަކެއް ދިމާވުމާއި ގުޅިގެން އެ މަޝްރޫއުތައް އޭރު ހުއްޓުނު އިރު، ނިމިދިޔަ ސަރުކާރުންވެސް ޑިޒައިނަށް ބަދަލުތަކެއް ގެނެސްގެން މަޝްރޫއު ކުރިއަށް ގެންދިއުމަށް ހަމަޖެހިފަވާކަމުގެ ވާހަކަތަކެއް ދެކެވުނެވެ.