ކުޅުދުއްފުށީ ހޮނިހިރު ބާޒާރު ނިމުމަކަށް އަންނަނީބާ!

ހދ. ކުޅުދުއްފުށީގައި މީގެ 15 އަހަރު ކުރިން ސުރެ ކޮންމެ ހޮނިހިރު ދުވަހަކު ބާއްވަމުން އަންނަ ''ހޮނިހިރު ބާޒާރު'' އަންނަ މަހުގެ 7 ވަނަ ދުވަހުން ފެށިގެން ނުބާއްވަން އެރަށު ކައުންސިލުން ވަނީ ނިންމައި އެކަން އިއުލާންވެސް ކޮށްފައެވެ. މިއީ ބޮޑުތިލަދުންމަތީގެ ރައްޔިތުންނަށް ހަމަ ގައިމުވެސް ހިތާމަވެރި ހަބަރެކެވެ.

ކުޅުދުއްފުށީ ކައުންސިލުން ބުނެފައިވަނީ ހޮނިހިރު ބާޒާރު ނުބާއްވަން ނިންމީ އެސަރަހައްދުގައި ލޯކަލް މާރުކޭޓު ހުޅުވައި ހިދުމަތް ދޭން ފެށުމުންނެވެ.

ހޮނިހިރު ބާޒާރު އޮންނަނީ ކޮންމެ ހޮނިހިރު ދުވަހަކު ރީޖަނަލް ހޮސްޕިޓަލާއި ދިމާ އަތިރިމަތީ، ފިނި ބުރުތަކާއި ހިޔާގަސްތަކުން ފުރިފައިވާ ބޮޑު ސަރަހައްދެއްގައެވެ. އެސަރަހައްދުގައި ފުރަތަމަ އެއްޗިހި ވިއްކަން އުތުރުގެ ތިން އަތޮޅު މީހުން ތިބެންފެށީ ވަކި ހުއްދައެއް އޮވެގެންނެއް ނޫނެވެ. ނަމަވެސް އެކަން ވެގެންދިޔައީ ކުޅުދުއްފުއްޓާއި އަދި ހޮސްޕިޓަލަށް ޑޮކްޓަރަށް ދައްކަން ކޮންމެ ހޮނިހިރު ދުވަހަކު އަންނަ މީހުންނަށާއި ރަށަށް އަރާ ބީރައްޓެހިންނާއި މެހެމާނުންނަށް ވަރަށް ކަމުދާ ކަމަކަށެވެ. އެހެންކަމުން ހޮނިހިރު ބާޒާރު ފުޅާވެ، ބޮޑު ސަރަހައްދަކަށް ފެތުރި ވިޔަފާރިވެސް ފުޅާވެ، އެންމެ ފަހުން އުތުރުގެ ތިން އަތޮޅު މީހުންގެ މާރުކޭޓަކަށް ބަދަލުވެގެން ދިޔައެވެ.

ހޮނިހިރު ބާޒާރުން ހުރިހާ ބާވަތެއްގެ ތަރުކާރީއާއި މޭވާގެ އިތުރުން ފަލަމަޑީގެ ބާވަތްތަކާއި ރޯމަހާއި ވަޅޯމަސްވެސް ލިބެން ހުރެއެވެ. މިތަކެތި ގެންނަނީ އުތުރު ތިން އަތޮޅުގައި ދަނޑުވެރިކަން ކުރާ ދަނޑުވެރިންނެވެ.

ހއ. ކެލާ، ހދ. ވައިކަރަދޫ، ހދ. ނޮޅިވަރަމް، ހދ. ހަނިމާދޫ، ށ. ފީވަށް، ށ. ފޯކައިދޫ، އަކީ ދަނޑުވެރިކަމަށް ހާއްސަ ރަށްރަށެވެ. އެރަށްރަށުގައި ގެދޮރު މޯގޭޖްކޮށްގެން ދަނޑުވެރިކަން ކުރާ މީހުން އެބަތިއްބެވެ. އެހެންކަމަށްވާނަމަ އެފަދަ ފަރާތްތަކަށް ''ހޮނިހިރު ބާޒާރު'' އުވާލުމުން ފޫނުބެއްދޭ ވަރުގެ ގެއްލުމެއް ލިބިގެންދާނެއެވެ.

އަދި ރަށުގެ ފިހާރަތަކަށްވުރެ ހެޔޮ އަގުގައި ބޭނުން އެއްޗެއް ގަންނަން ލިބެންްހުންނަ އެބާޒާރު އުވާލުމަކީ ތިން އަތޮޅުގެ ރައްޔިތުންނަށް ލިބޭނެ ދެރައެކެވެ. ހޮނިހިރު ދުވަހު ހަމައެކަނި ހެޔޮއަގުގައި ބާޒާރުކޮށްލަން ދާމީހުންވެސް މަދެއްނޫނެވެ. ޚައްސަކޮށް ކުޅުދުއްފުށީ ގިނަ ރައްޔިތުންވެސް ހޮނިހިރު ބާޒާރުން ގިނަ އަދަދަކަށް ތަކެތި ގަނެއެވެ. ހޮނިހިރު ދުވަހަށް އިންތިޒާރުކުރެއެވެ. ހޮސްޕިޓަލުން ނިމިގެން ރަށަށް ފުރަންދަމުން ބާޒާރުން ތަކެތި ގަނެގެން ދޯންޏަށް އަރަނީ ވަރަށް ހިތްހަމަޖެހިގެން ތިބެއެވެ. ނަމަވެސް މިއަދު އެކަމާ ހިތާމަކުރާ ވަރަށް ގިނަ މީހުން އެބަތިއްބެވެ. ހާއްސަކޮށް އެންމެ ބޮޑު ގެއްލުމެއް ވަމުންދާ ތިން އަތޮޅުގެ ދަނޑުވެރިންނެވެ.

މީގެއިތުރުން ހޮނިހިރު ބާޒާރަކީ މިހާރު ރާއްޖެއަށްވެސް ވަރަށް މަޝްހޫރު ބާޒާރަކަށްވެއްޖެއެވެ. ރަށަށް އަރާ މެހެމާނުންނާއި އިއްޒަތްތެރިންނާއި ބޮޑެތި ވިޔަފާރިވެރިން ވެސް އެބާޒާރު ބަލައިލަން ޒިޔާރަތްކުރެއެވެ. އަދި އެވާހަކަތައް އެބޭފުޅުން ދައްކަވައެވެ.

ރާއްޖޭގެ ބޮޑެތި ކުންފުނިތަކުންނާއި މުއައްސަސާތަކުން ވެސް ހޮނިހިރު ބާޒާރުގެ ބޭނުން ހިފައެވެ. ތަފާތު މައުލޫމާތު ދޭ ރޯޑްޝޯވ ތަކާއި ޕްރޮމޯޝަންތައް އެތަނުގައި ވަނީ ހިންގާފައެވެ. އެކަމުގެ ސަބަބުން ދޭން ބޭނުންވާ މައުލޫމާތު ގިނަ ބަޔަކަށް އެއްތަނަކުން ފޯރު ކޮށްދިނުމުގެ އިތުރުން ރައްޔިތުން ބޭނުންވާ ގިނަ މައުލޫމާތުތަކެއް ފަސޭހައިން ލިބުމަށް އެހީތެރިވެދެއެވެ.

އެތައް ބަޔަކަށް މަންފާ ލިބެމުންދާ ހޮނިހިރު ބާޒާރު އުވާލުމާއި ދެކޮޅަށް މީސް މީޑިއާގައި ފާޑުކިޔަމުންދާއިރު، ތިން އަތޮޅުގެ ރައްޔިތުންގެ ހިތްތަކުގައި އުފެދިފައިވާ ކަންބޮޑުވުންތަކަށް ހައްލެއް ހޯދައިދެވޭނީ ކުޅުދުއްފުށީ ކައުންސިލަށެވެ.

އެތައް ބަޔަކަށް މަންފާ ލިބެމުންދާ ތަނެއް ކުއްލިއަކަށް ހުއްޓައިލުމުގެ ބަދަލުގައި ރަގަޅު އެހެން ސަރަހައްދެއްވެސް ހަމަޖައްސައިދެވިދާނެއެވެ. އޭރުން ލޯކަލް މާރުކޭޓުގެ ގޮޅިތަކަށް ގެއްލުންވާނެތޯ މިއީ އުފެދޭ ސުވާލެކެވެ.

ހަގީގަތަކީ ކިތަންމެ ދުރުގައި ހުއްޓަސް ހެޔޮ އަގުގައި ހުރިހާ ބާވަތެއްގެ މުދާ އެއްތަނަކުން ގަންނަން ލިބެން ހުންނަކަމަށްވާނަމަ، ދިވެހިން އެތަނަކަށް ދާނެ އެވެ.

އެއްބަޔަކަށް ގެއްލުން ދިނުމަށްފަހު، އަނެއްބަޔަކަށް ފައިދާ ހޯދައިދިނުމަށް ކޮށްގެންވާނެ ކަމެއް ނޫނެވެ. އެހެންކަމުން ކަމާބެހޭ ފަރާތްތަކާއި މަޝްވަރާކޮށް ކައުންސިލުން ދެވަނަ ވިސްނުމަކަށް ހިނގައްޖެނަމަ އެއްވެސް ރައްޔިތަކަށް ލިބޭނެ ގެއްލުމެއް ނޯންނާނެ އެވެ.