ޔޫއެންއޯޑީސީން ދިވެހި ފުލުހުންނަށް އެޑްވާންސްޑް ޑްރޯންތަކެއް ހަދިޔާކޮށްފި
އ.ދ. ގެ އޮފީސް އޮން ޑްރަގްސް އެންޑް ކްރައިމް (ޔޫއެންއޯޑީސީ)ގެ ފަރާތުން ދިވެހި ފުލުހުންނަށް އެޑްވާންސްޑް އަންޑަވޯޓަރ އަދި އޭރިއަލް ޑްރޯންތަކެއް ހަދިޔާކޮށްފިއެވެ.
ޔޫއެންއޯޑީސީ އިން މިއަދު އެކްސްގައި ކުރި ޕޯސްޓެއްގައި ބުނެފައިވަނީ މި އާލާތްތަކުގެ ސަބަބުން ނުރައްކާތެރި ތަކެތި ދެނެގަތުމުގެ ޤާބިލުކަން އިތުރުވެ، އޮފިސަރުންގެ ސަލާމަތާއި ރައްކާތެރިކަން ކަށަވަރުކުރެވޭނެ ކަމަށެވެ.
ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން މައުލޫމާތު ދެއްވި ގޮތުގައި މި ޑްރޯންތަކާއި ހަވާލުވުމަށްޓަކައި ރާއްޖޭގެ ފަރާތުން ސޮއިކުރެއްވީ ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާނެވެ. އަދި ޔޫއެންއޯޑީސީގެ ފަރާތުން ސޮއިކުރެއްވީ ރާއްޖޭގައި ހުންނަ އެ ވުޒާރާގެ އޮފީހުގެ އިސްވެރިޔާ އެންރީކޯ ބޮނިންސެގްނާއެވެ.
މި ކަމާ ގުޅިގެން، ދިވެހި ފުލުހުންގެ ޚިދުމަތުން ބުނެފައިވަނީ، ޑްރޯންތަކުގެ ސަބަބުން ދިވެހިން ޓެރަރިޒަމާ ދެކޮޅަށް ކުރާ މަސައްކަތުގެ ޤާބިލުކަން ވަރަށް ބޮޑަށް އިތުރުވެގެންދާނެކަމަށެވެ. އަދި މީގެ ސަބަބުން ނުރައްކާތައް ދެނެގަނެ، އެކަންކަން ހުއްޓުވުމަށް މިހާރަށްވުރެ ހަރުދަނާކޮށް މަސައްކަތްކުރެވޭނެ ކަންވެސް ފުލުހުން ވަނީ ފާހަގަކުރައްވާފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
