ލަމްބޯގިނީ އެކްސިޑެންޓް؛ ޑްރައިވަރު ރިފާއުގެ ލައިސަންސް ހިފަހައްޓައި މައްސަލަ ބަލަނީ

އިއްޔެ ހެނދުނު ހައިވޭ ހުޅުމާލެއަށް އަރަން އޮންނަ މަގުގައި ހިނގި އެކްސިޑެންޓްގައި ކާރު ދުއްވި ހޯކްސް ކުންފުނީގެ ސީއީއޯ ހަސަން ރިފާއުގެ ލައިސަންސް ހިފަހައްޓައި މައްސަލަ އިތުރަށް ބަލަމުން އަންނަކަމަށް ފުލުހުން ބުނެފިއެވެ.

ރިފާއު ދުއްވި ލަމްބޯގިނީ ކާރު އެކްސިޑެންވިކަމުގެ ރިޕޯޓް ފުލުހުންނަށް ލިބިފައިވަނީ، 8.42 ހާއިރުކަމަށް ފުލުހުން ބުންޏެވެ. މި އެކްސިޑެންޓް ހިނގާފައިވަނީ ހައިވޭ ސޯލާ ޕެނަލްތަކުގެ ހޮޅިދަނޑީގައި ޖެހިގެންނެވެ.

ފުލުހުން ބުނީ އެކްސިޑެންޓް ހިނގިއިރު ކާރުގައި ތިބީ ރިފާއުގެ އިތުރުން 13 އަހަރުގެ ކުޑަކުއްޖެއް ކަމަށެވެ. އެކްސިޑެންޓާ ގުޅިގެން އެ ދެ މީހުން ޓްރީޓޮޕް ހޮސްޕިޓަލަށް ގެންގޮސް ފަރުވާ ދިނުމަށްފަހު ފަހުން ވަނީ ދޫކޮށްލާފައެވެ. މި އެކްސިޑެންޓްގައި އެއްވެސް މީހަކަށް ސީރިއަސް އަނިޔާތަކެއް ނުލިބޭކަމަށް ހޮސްޕިޓަލުން ބުނެފައިވާކަމަށް ފުލުހުން ބުންޏެވެ.

އެކްސިޑެންޓާ ގުޅިގެން ކާރު ބޭނުން ނުކުރެވޭ ވަރަށް ހަލާކުވެފައިވާއިރު، މައްސަލައިގެ ތަހުގީގަށް ބޭނުންވާ މައުލޫމާތު ނެގުމަށްފަހު ކާރުގެ ބައިތައް ވެރިފަރާތާ ހަވާލުކޮށްފައިވާކަމަށް ފުލުހުން ބުންޏެވެ.

އެކްސިޑެންޓް ހިނގިއިރު އެ ސަރަހައްދުގައި ތިބި ބައެއް ފަރާތްތަކުން ބުނެފައިވަނީ ކާރު ދުއްވާފައި ދިިޔައީ ވަރަށް ބާރަށް ކަމަށެވެ. މި ހާދިސާގައި ސޯލާ ޕެނަލްތަކަށް ބޮޑެތި ގެއްލުންތަކެއް ވަނީ ލިބިފައެވެ. ނަމަވެސް ސޯލާ ޕެނަލްތަކަށް ލިބުނު ގެއްލުންތައް ބަލަމުންދާކަމަށް ދައުލަތުގެ އެއްވެސް މުއައްސަސާއަކުން އަދި ނުބުނެއެވެ.

ހުޅޫމާލޭ ހައިވޭގައި ދުއްވަން ކަނޑައަޅާފައި އޮންނަ މިންގަނޑަށްވުރެ ބާރަށް ދުއްވުމުގެ މައްސަލައަކީ އާއްމުން ވަރަށްބޮޑަށް ކަންބޮޑުވުން ފާޅުކުރަމުން އަންނަ މައްސަލައެކެވެ. އަދި ބާރަށް ދުއްވާ ފަރާތްތަކަށް ކަމާބެހޭ އިދާރާތަކުން އެދެވޭ ގޮތެއްގައި ފިޔަވަޅުތައް އަޅައި ތަންފީޒުކުރަމުން ނުދާކަމީ މިއަދު ރައްޔިތުންގެ ގިނަ ބަޔަކު އެކަމާ ކަންބޮޑުވުން ފާޅުކުރަމުން އަންނަ މައްސަލައެއްކަން ފާހަގަކޮށްލެވެއެވެ.