މެޑަމް ނަސްރީނާ އިންފެކްޝަނަކަށް ފަރުވާ ހޯއްދަވަނީ، ހެޔޮދުއާގެ މެސެޖުތަކަށް ޝުކުރު

ކުރީގެ ރައީސް މައުމޫން އަބްދުލްޤައްޔޫމްގެ އަނބިކަނބަލުން މެޑަމް ނަސްރީނާ އިބްރާހިމް އިންފެކްޝަނަކަށް ފަރުވާ ހޯއްދަވަމުން ގެންދާކަން ހާމަކުރައްވައިފި އެވެ.

އެކަން ހާމަކުރައްވާ ކުރީގެ ރައީސް މައުމޫންގެ އޮފީހުން މިރޭ ބުނީ މެޑަމް ނަސްރީނާ އިބްރާހިމް އިންފެކްޝަނަކަށް ފަރުވާ ހޯއްދެވުމަށްޓަކައި ފާއިތުވި ހަފްތާއިން ފެށިގެން ދަރުމަވަންތަ ހޮސްޕިޓަލުގައި ވަނީ އެޑްމިޓް ކުރެވިފައި ކަމަށެވެ. އަދި މާތްﷲ ގެ ހެޔޮރަހްމަތްފުޅުން މިވަގުތު އެކަމަނާގެ ހާލުކޮޅު ރަނގަޅުވަމުން އަންނަ ކަމަށް ބުނެފައިވެ އެވެ.

މެޑަމް ނަސްރީނާއަށް ފަރުވާ ދެއްވުމުގައި ދަރުމަވަންތަ ހޮސްޕިޓަލުގެ ޑޮކްޓަރުންނާއި، ނަރުހުންނާއި އަދި އެހެނިހެން މުވައްޒަފުން ދައްކަވަމުން ގެންދަވާ އޯގާތެރިކަމާއި، އަޅާލުން އުފަލާއެކު ފާހަގަކުރާ ކަމަށާ މިކަމަށްޓަކައި ރައީސް މައުމޫން އާއި އެމަނިކުފާނުގެ އާއިލާ ވަރަށް ބޮޑަށް ޝުކުރުވެރިވާ ކަމަށް ބުނެފައިވެ އެވެ.

އަދި ހެޔޮއެދޭ ފަރާތްތަކުންނާއި، އާންމު ރައްޔިތުންގެ ފަރާތުން ލިބެމުންދާ ހެޔޮދުއާތަކާއި، މެސެޖުތަކުން އައިލާއަށް ވަރަށް ބޮޑު ހިތްހަމަޖެހުމެއް ލިބެމުންދާތީ ހުރިހާ ބޭފުޅުންނަށް އާއިލާގެ ފަރާތުން ވަނީ ޝުކުރު އަދާކޮށްފަ އެވެ.