އއ.މާޅޮހު ކައުންސިލް ތިޖޫރީން 4 ލައްކައަށްވުރެ ގިނަ ރުފިޔާ ގެއްލިއްޖެ

އއ.އަތޮޅު މާޅޮހު ކައުންސިލް ތިޖޫރީން 4 ލައްކައަށްވުރެ ގިނަ ރުފިޔާ، ގެއްލިފައިވާކަމަށް އޮޑިޓަރ ޖެނެރަލް ވިދާޅުވެއްޖެއެވެ.

އޮޑިޓަރ ޖެނެރަލް ހުސައިން ނިޔާޒީ ސޮއިކުރައްވައި ނެރުއްވާފައިވާ އއ.މާޅޮހު ކައުންސިލް އިދާރާގެ ހާއްސަ އޮޑިޓް ރިޕޯޓްގައި ބުނެފައިވަނީ، އެރަށު ކައުންސިލް އިދާރާގެ ތިޖޫރީން 2017 އަދި 2028 ވަނަ އަހަރު ނަގާފައިވާ ފައިސާގެ ތެރެއިން ޖުމްލަ 492،867 ރުފިޔާ ގެއްލިފައިވާކަން ފާހަގަކުރެވޭ ކަމަށެވެ.

އެ ފައިސާގެ ތެރޭގައި ހިމެެނެނީ ބޭންކް އެކައުންޓުން ނެގި ފައިސާގެ ތެރެއިން ކައުންސިލް އިދާރާގެ ތިޖޫރީއަށް ވައްދާފައިނުވާ 255،584 ރުފިޔާ އާއި ކައުންސިލް އިދާރާގެ އެކިއެކި ކަންކަން ކުރުމަށް ލިޔެކިޔުންތައް އޮޅުވާލައިގެން ކައުންސިލް އިދާރާގެ ބޭންކު އެކައުންޓުން ނަގާފައިވާ 112،500 ރުފިޔާ އާއި މުއައްޒަފުންނަށް މުސާރަ އާއި އެލަވަންސްގެ ގޮތުގައި ދޭންޖެހޭ ވަރަށްވުރެ އިތުރަށް ތިޖޫރީ އާއި ބޭންކު އެކައުންޓުންނެގި 82،579 ރުފިޔާއެވެ. މީގެ އިތުރުން ކައުންސިލް އިދާރާގެ އެކައުންޓަށް ޖަމާކުރުމަށް ތިޖޫރީން ނެގި 42،204 ރުފިޔާވެސް ހިމެނެއެވެ.

އޮޑިޓް ރިޕޯޓްގައި ބުނެފައިވަނީ ކައުންސިލް އިދާރާގެ ފައިސާގެ ކަންކަމާ 2018 ވަނަ އަހަރު ހަވާލުވެ ހުރި ކައުންސިލް އިދާރާގެ ކުރީގެ އެޑްމިން އޮފިސަރު އެ އަހަރު ކައުންސިލް އިދާރާއަށް ލިބިފައިވާ ފައިސާގެ ތެރެއިން ގާތްގަނޑަކަށް ދެ ލައްކައެއްހާ ރުފިޔާ އަމިއްލަ ބޭނުންތަކަށް ބޭނުންކުރިކަމަށް އިއުތިރާފްވެފައިވާކަމަށެވެ.