ހަމަލާތައް މެދުކަނޑާލުމާއެކު ޢައްޒާއަށް އެހީގެ ޓްރެކްތައް ވެއްދުމުގެ މަސައްކަތް ފަށައިފި

އިސްރާއީލުގެ ފަލަސްތީނުގެ ޢައްޒާއަށް ދެމުން އަންނަ ހަމަލާތައް ވަގުތީގޮތުން ހުއްޓާލުމާއެކު މިސްރުމަގުން އެހީގެ ޓްރަކްތައް ވެއްދުމުގެ މަސައްކަތް އެހީދޭ ފަރާތްތަކުން ފަށައިފިއެވެ.

ވޮއިސްއާ މައުލޫމާތު ހިއްސާކުރި އިންޓަރނޭޝަނަލް އެއިޑް ކެމްޕެއިނުގެ އޮފިޝަލަކު ވަނީ އިސްރާއީލްގެ ހަމަލާތައް ވަގުތީގޮތުން މެދުކަނޑާލުމާ ގުޅިގެން އެހީގެ ޓްރަކްތައް ޢައްޒާއަށް ވެއްދުމުގެ މަސައްކަތް ފަށާފައިވާކަމަށް ބުނެފައެވެ. އިސްރާއީލުން ވަނީ 12 ގަޑިއިރަށް ހަމަލާތައް މެދުކަނޑާލިކަމަށް ބުނެފައެވެ.

އޮފިޝަލް ވިދާޅުވީ ހަމަލާތައް މެދުކަނޑާލިކަމުގެ މައުލޫމާތު ލިބުމާއެކު ހެނދުނު ހެނދުނާ ޓްރަކްތައް ޢައްޒާއަށް ވެއްދުމުގެ މަސައްކަތް ފަށާފައިވާކަމަށެވެ. އެގޮތުން އެހީގެ 14 ޓްރަކެއް މިހާރު އުރުދުންކޮޅުން ޢައްޒާއަށް ފޮނުވާލާފައިވާކަމަށާއި، އެ ޓްރަކްތައް މިހާރު ބޯޑަރު ހުރަސްކޮށް ވަންނަމުންދާކަން އޭނާ ފާހަގަކުރެއްވިއެވެ. މީގެ އިތުރުން އައިއޭސީއާ އެކު މަސައްކަތްކުރާ ކޯލިޝަނުގެ 130 ޓްރަކް ޢައްޒާތެރެއަށް ވެއްދުމުގެ މަސައްކަތް ކުރަމުންދާކަމަށާއި، މީގެ ތެރެއިން 10 ޓްރަކަކީ ދިވެހިންގެ އެހީގައި ފޮނުވާ ޓްރަކްތައްކަމަށްވެސް އޮފިޝަލް ފާހަގަކުރިއެވެ.

އިސްރާއީލުން މިއަދު ނިންމާފައިވަނީ ކޮންމެ ދުވަހަކުވެސް ވަކި ވަގުތުތަކެއްގައި އެހީގެ ޓްރަކްތައް ޢައްޒާއަށް ވެއްދުމުެގ ފުރުސަތު ދިނުމަށެވެ. ނަމަވެސް އެ ޓްރަކްތަކަށް ވަދެވެނީ އިސްރާއީލް ސިފައިން ވަރަށްބޮޑަށް ބަލައި ފާސްކުރުމަށްފަހުއެވެ.

އިސްރާއީލުން ޢައްޒާއަށް އެހީގެ ޓްރަކްތަކަށް ވަނުމުގެ ފުރުސަތު ހުޅުވާލާފައިމިވަނީ އެސިޓީގައި ދިރިއުޅެމުންދާ ރައްޔިތުން ކާނެއެއްޗެއް ނުލިބި ބަނޑަށް މަރުވާން ފެށުމުންކަމަށް އިންސާނީ އެހީތެރިކަމަށް މަސައްކަތްކުރާ ޖަމާއަތްތަކުން ބުނަމުންދާތާ ދުވަސްތަކެއްފަހުންްްނެވެ. މި މައްސަލާގައި އިސްރާއީލް ސަރުކާރަށް ވަނީ ވަރަށްބޮޑު ފާޑުކިޔުންތަކެއް އަމާޒުވެފައެވެ.