ރައީސް ޑރ.މުޢިއްޒުގެ އިންޑިއާ ދަތުރުފުޅަކީ ދެގައުމުގެ ގުޅުން ބަދަހިކުރުމަށް ލިބޭ ރަނުގެ ފުރުސަތެއް: ޤާސިމް

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު މިހާރު އިންޑިއާއަށް ކުރައްވަމުންދާ ފުރަމާނަ ދަތުރުފުޅަކީ ދެގައުމުގެ ގުޅުން ބަދަހިކުރުމަށް ލިބޭ ރަނުގެ ފުރުސަތެއް ކަމަށް ރައްޔިތުންގެ މަޖިލީހުގެ މާމިގިލި ދާއިރާގެ މެމްބަރު އަދި ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެއެވެ.

ޤާސިމް އިބްރާހިމް މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ.

މިގޮތުން ޤާސިމް ވިދާޅުވީ، ރައީސް ޑރ.މުޢިއްޒު އިންޑިއާ އަށް ކުރައްވަމުން ގެންދަވާ ދަތުރުފުޅުގެ ސަބަބުން ދެގައުމަށް އުންމީދީ އަދި އުފާވެރި ދުވަސްތަކެއް ކުރިއަށް އެބަ އޮތް ކަމަށެވެ.

ރައިސް ޑރ.މުޢިއްޒުގެ މި ދަތުރުފުޅުގައި އިންޑިއާގް ބޮޑުވަޒީރު ނަރެންދްރަ މޯދީ އާއި ބައްދަލުކުރައްވާކަން ފާހަގަކުރައްވަމުން ޤާސިމް ވިދާޅުވީ، މިއީ އިންޑިއާއާއި ރާއްޖެއާއި ދެމެދުގައި އޮތް ގުޅުން އިތުރަށް ބަދަހިކުރުމަށް ލިބޭ ވަރަށް މުހިންމު ފުރުސަތެއް ކަމަށެވެ.

ހަމައެއާއިއެކު ޤާސިމް ވަނީ ޖުމްހޫރީ ޕާޓީގެ ލީޑަރުގެ ހައިސިއްޔަތުން، އިންޑިއާ އާއި ރާއްޖެ އާއި ދެމެދު އޮތް ގުޅުން ހަރުދަނާކޮށް ދެމެހެއްޓެވުމަށް ރައީސް ޑރ.މުޢިއްޒުގެ ކިބައިން އެދިވަޑައިގެންފައެވެ.

ޤާސިމް އިތުރަށް ވިދާޅުވީ، އިންޑިއާ ކަނޑުގެ ސަރަހައްދުގެ ހަމަޖެހުމާއި ސަލާމަތާއި ރައްކާތެރިކަން ކަށަވަރުކޮށް، އިގްތިޞާދީ ތަރައްގީގެ އައު އުސްމިންތަކެއް ހާސިލުކުރުމަށް އިންޑިއާއާއި ރާއްޖެއާއި ދެމެދު އޮތް ގުޅުމަކީ ވަރަށް ވެސް މުހިންމު ގުޅުމެއްކަމަށެވެ.

މިމަހުގެ 10 ވަނަ ދުވަހާއި ހަމައަށް ރައީސް ޑރ.މުޢިއްޒު އިންޑިއާއަށް ކުރައްވާ މިދަތުރުފުޅުގައި އިންޑިއާގެ ރައީސާއި ބޮޑުވަޒީރުގެ އިތުރުން، ސަރުކާރުގެ އިސް ބޭފުޅުންނާއި ބައްދަލުކުރެއްވުމަށް ހަމަޖެހިފައިވާއިރު، މިއީ ރައީސް ޑރ.މުޢިއްޒު އިންޑިއާއަށް ކުރައްވާ ދެވަނަ ދަތުރުފުޅެވެ.

މީގެ ކުރިން މިއަހަރުގެ ޖޫންމަހު ވެސް ރައީސް ޑރ.މުޢިއްޒު ވަނީ އިންޑިއާގެ ބޮޑުވަޒީރުކަމަށް މޯދީ ހުވާކުރެއްވުމުގެ ރަސްމިއްޔާތަށް ވަޑައިގެންފައެވެ.