އުދަ އަރާނޭކަމަށް ލަފާކޮށް މުޅި ރާއްޖެއަށް ވައިޓް އެލާޓް ނެރެފި

އުދަ އަރާނޭކަމަށް ލަފާކޮށް މޫސުމާ ބެހޭ ޤައުމީ އިދާރާއިން މުޅި ރައްޖެއަށް ވައިޓް އެލާޓް ނެރެފިއެވެ.

މޫސުމާ ބެހޭ ޤައުމީ އިދާރާ މެޓް އޮފީހުން އިއްޔެ ވަނީ މިއަދުން ފެށިގެން ކުރިއަށްއޮތް ހަތަރު ދުވަހުގެ ނިޔަލަށް ރާއްޖޭގެ މޫސުން ގޯސްވާނޭކަމަށް ލަފާކޮށްފައެވެ. ރިއަށްއޮތް ދުވަސްތަކުގައި ރާއްޖެ ސަރަހައްދަށް ހުޅަނގު މޫސުމުގެ ބާރުގަދާވާނެ ކަމަށް ބެލެވޭކަމަށާއި، މި ދުވަސްތަކުގައި ވައި ބާރުވެ ކަނޑުތައް ގަދަވެ އަދި ބޮޑު ބަޔަކަށް ވިއްސާރާނެ ކުރާނެ ކަމަށް ވެސް ވަނީ ލަފާކޮށްފައެވެ.

އުދަ އަރާނޭކަމަށް ލަފާކޮށް މެޓް އޮފީހުން މިއަދު ވައިޓް އެލާޓް ނެރެފައިވަނީ، މެންދުރުފަހު 14:00 އިން ފެށިގެން މިއަދުގެ 18:00 އާ ހަމައަށެވެ. އެގޮތުން ދިޔަވަރު ބޮޑުވާގަޑިތަކުގައި އުދައަރާފާނޭކަމަށް ލަފާކޮށް އެކަމަށް ސަމާލުވުމަށް ވަނީ އިލްތިމާސްކޮށްފައެވެ

މެޓް އޮފީހުން ހއ އަތޮޅުން ފެށިގެން ވ އަތޮޅާ ހިސާބަށް ފަހުން ނެރުނު ވައިޓް އެލާޓްގައި ވަނީ އެ ސަރަހައްދަށް ގަޑިއަކު 19 މޭލާއި 24 މޭލާ ދެމެދުގެ ބާރުމިނެއްގައި ވައިޖެހޭނޭކަަމަށް ލަފާކޮށްފައެވެ. މީގެ އިތުރުން ވިލާގަނޑުގައި 45 މޭލަށް ވައިގަދަވާނޭކަމަށްވެސް ވަނީ ލަފާކޮށްފައެވެ.

ހިނގަމުން މިދަނީ ހުޅަނގުމޫސުމުގެ 8 ވަނަ ނަކަތްކަމަށްވާ "ފުސް" ނަކަތެވެ. މި ނަކަތުގައި ޢާންމުގޮތެއްގައި އުޑުމަތި އޮންނާނީ ވަރަށް ބަނަކޮށެވެ. ވާރޭ ވެހުން ގިނަ ވާނޭކަމަށް ނަކަތްތެރިން ބުނެއުޅެއެވެ.