ކުރިން ތެއޮ ވިއްކި ރޭޓްގައި މިފްކޯއިން މަސްވެރިންނަށް ތެއޮ ދޫކުރަން ނިންމައިފި

މީގެ ކުރިން ތެއޮ ވިއްކި ރޭޓުގައި މިފްކޯއިން މަސްވެރިންނަށް ތެއޮ ވިއްކުމަށް ނިންމައިފިއެވެ.

މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް، މިފްކޯއިން ވިއްކާ ޑީސަލްގެ އަގަށް ބަދަލުގެނެސް އިއްޔެ ވަނީ އެކުންފުނިން ތެއޮ އަޅާ ތަންތަނުން ވިއްކާ ތެލުގެ އަގު ބޮޑުކޮށްފައެވެ. އެކަމާ ގުޅިގެން މަސްވެރިންގެ ކަންބޮޑުވުން ފާޅުކުރަމުންދަނިކޮށް މިފްކޯއިން ވަނީ މަސްވެރިންނަށް ކުރިން ވިއްކަމުން އައި ރޭޓުގައި ތެއޮ ވިއްކަމުންދާނޭކަމަށް ބުނެފައެވެ.

އެގޮތުން "ފަހި ހަކަތަ" ޕްރޮގްރާމްގެ ދަށުން ސަބްސިޑީ ލިބޭނެ އިންތިޒާމު ހަމަޖެހިފައިވުމުން ކުރިއެކޭ އެއްގޮތަށް މަސްވެރި އުޅަނދުތަކަށް ތެއޮ ވިއްކަމުންދާނޭކަމަށް މިފްކޯއިން ވަނީ ބުނެފައެވެ.

އެގޮތުން މިފްކޯއަށް މަސްކިރުވާ އުޅަނދުތަކަށް ޑީސަލް ލީޓަރެއް 16.54 ރުފިޔާގެ ރޭޓުގައި ވިއްކާނެއެވެ. އަދި ތިން ޓަނަށްވުރެ އިތުރަށް މަސްކިރުވާ ދޯނިތަކަށް ޑީސަލް ލީޓަރެއް 16.04 ރުފިޔާއ ޑީސަލް ލީޓަރެއް ގަންނަން ލިބޭނެއެވެ. މިފްކޯއިން ބުނީ ކުރިއެކޭ އެއްގޮތަށް އާއްމު ފަރާތްތަކަށް އެކުންފުނިން ޑީސަލް ވިއްކަމުންދާނީ، ލީޓަރެއް 17.54 ރުފިޔާއަށް ކަމަށެވެ.

މިފްކޯއިން އިއްޔެ ނެރުނު ބަޔާނުގައި އެކުންފުނީގެ ތެއޮ އަޅައިދޭ ތަންތަނުން ޑީސަލް ލީޓަރެއް ވިއްކުމަށް ނިންމީ 27.24 ރުފިޔާއަށެވެ. އަދި އާއްމު ފަރާތްތަކަށް ޑީސަލް ލީޓަރެއް ވިއްކަމަށް ނިންމީ 28.54 ރުފިޔާއަށެވެ.

މެދުއިރުމަތީގެ މަސްރަހުގައި މިހާރު ފަށާފައިވާ ހަނގުރާމައިގެ ސަބަބުން މުޅި ދުނިޔޭގައިވެސް ތެލުގެ އަގު ހަލުވިކަމާއެކު ބޮޑުވަމުންދާއިރު، ރާއްޖޭގައި ތެލުގެ އަގު ބޮޑުވިޔަ ނުދިނުމަށް ސަރުކާރުން ގެންދަނީ އެކި އިންތިޒާމުތައް ހަމަޖައްސަމުންނެވެ.