ސަރުކާރުން އުޅެނީ ހުދުމުހުތާރު ވެރިކަމެއްގެ ސިފަތައް އަށަގަންނުވަން: އެމްޑީޕީ

ސަރުކާރުގެ ސިޔާސަތްތަކާއި ވިސްނުން ހުރީ އަވަސް މުސްތަގްބަލެއްގައި ހުދުމުހުތާރު ވެރިކަމެއްގެ ސިފަތައް އަށަގަންނުވަންކަމަށް އެމްޑީޕީން ބުނެފިއެވެ.

ލޯކަލް ކައުންސިލް އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީ 2026 އިންތިޚާބު ގެ ކެންޕެއިން ލޯންޗް ކުރުމުގެ ގޮތުން އިދިކޮޅު މައި ޕާޓީ، އެމްޑީޕީން ރޭ ބޭއްވި ޖަލްސާގައި ވާހަކަދައްކަވަމުން އެޕާތީގެ ލީޑަރޝިޕްގައި ހިމެނިވަޑައިގަންނަވާ ބޭފުޅުންނާއި ރައްޔިތުން މަޖިިލީހަށް ނިސްބަތްވާ ބޭފުޅުން ވަނީ ސަރުކާރުގެ ސިޔާސަތްތަކަށް ވަރަށްބޮޑަށް ފާޑުވިދާޅުވެ ވާހަކަދައްކަވާފައެވެ.

ޖަލްސާގައި ވާހަކަދައްކަވަމުން އެމްޑީޕީގެ ރައީސް ޢަބްދުﷲ ޝާހިދު ވިދާޅުވީ، ސަރުކާރުގެ ކިބައިން މިހާރު ފެންނަމުންދަނީ ރައްޔިތުންގެ ބާރުތައް ދުވަހެއް ދުވަހަކަށް ކުޑަވަމުންދާތަން ކަމަށާއި، ދެ އިންތިހާބު އެއްކޮށްލުމުގައިވެސް ރަނގަޅު ނިޔަތެއް ނެތްކަމަށެވެ. ސަރުކާރުގެ ކުންފުނިތައް މެދުވެރިކޮށް އަތޮޅުތެރޭގެ ރަށްތަކުގައި ތިބި މީހުން ކުންފުނިތަކަށް ވައްދައި ރައްޔިތުން މިއަދު ވަނީ މުސާރައިގެ އަޅުންތަކަކަށް ހަދާލާފައިކަމަށް ޝާހިދު ވިދާޅުވިއެވެ.

ސަރުކާރުން ހުދުމުހުތާރު ވެރިކަމަކަށް މިސްރާބް ޖަހާފައިވާކަން ފާހަގަކުރަމުން ޝާހިދު ވިދާޅުވީ، އިންތިހާބު އެއްކޮށްލުމުގެ މަސައްކަތަށްފަހު ދެން ސަރުކާރުގެ ވިސްނުމަކީ، ރައީސުލްޖުމްހޫރިއްޔާ ކަމުގެ ދައުރު 10 އަހަރަށް ބަދަލުކުރުންކަމަށެވެ. މިކަންކަން ކުރަމުންދަނީ ރައްޔިތުންނަށް އޮޅުވާލައި ހީލަތްތެރި ރޭވުމެއްގެ ދަށުންކަން ޝާހިދު ފާހަގަކުރެއްވިއެވެ.

ދިވެހިރާއްޖޭގެ ރައްޔިތުންނަށް ކޮންމެ ފަސް އަހަރަކުން މިހާރު ޤާނޫނު އަސާސީ އޮތް ގޮތުން ސަރުކާރާ ދޭތެރޭ ސަރުކާރު ހިންގާ ގޮތާ ދޭތެރޭގަ ބަސް ބުނަން ދެ ފުރުސަތު ލިބޭ. ރައީސުލްޖުމްހޫރިއްޔާ ހޮވާ ފުރުސަތާ ރައްޔިތުންގެ މަޖިލިހުގެ އިންތިޚާބު. މިހާރު ހުށަހެޅިފައިވާ ގޮތުން ނަމަ މި ފެންނަ ނުފެންނަ ވޯޓުގަ މިބޭފުޅުން މި ގެންދަވަނީ މި ދެ އިންތިޚާބު އެއްކޮށްލަން. ނަމުގަ ޚަރަދު ކުޑަކުރަން. 20 މިލިއަން ރުފިޔާ ކުޑަކުރަން. 20 މިލިއަން ރުފިޔާ ކުޑަކޮށްލަން ބޭނުންފުޅިއްޔާ 30 ސިޔާސީ ވަޒީފާ ކަނޑާލީމަ އެކަން އެނިމުނީ

އެމްޑީޕީގެ ރައީސް ޢަބްދުﷲ ޝާހިދު

މި ޖަލްސާގައި ވާހަކަދައްކަވަމުން ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ (ގަޕޯ) ވިދާޅުވީ މި ސަރުކާރު ވެރިކަމަށް އައިސް ރައްޔިތުންގެ ލާބައަށް ކުރެވުނު ކަމެއް ނުދެއްކުނު ތަނުގައި އެމްޑީޕީގެ ވެރިކަމުގައި މާލެ ސަރަހައްދުން ރައްޔިތުންނަށް ދޫކުރުމަށް ކަނޑައެޅި ގޯތިތައްވެސް ނުދެވުނުކަމަށެވެ.

ގޯތިތައް ދޫކޮށްގެން ދައުލަތަށް ގެއްލުންތަކެއް ލިބުނުކަމަށް ބުނާއިރު، އެކަންވެސް ސާފުކޮށްދެވިފައި ނުވާކަމަށް ގަޕޯ ވިދާޅުވިއެވެ.

ކީއްވެގެންތޯ ގޯތި ކަނޑާފައި ދޭން ނުކެރިގެން ތިއުޅެނީ؟ އަޅުގަނޑުމެން އަޑުއެހީމޭ، މި ސަރުކާރަށް ނިސްބަތްވާ ބޭފުޅުން ރައްޔިތުންގެ މަޖިލީހުގައި ވާހަކަ ދެއްކިއިރުގައި، ދައުލަތަށް ވީ ގެއްލުމުގެ ވާހަކަ ދައްކާ، މާލިއްޔަތު ކޮމިޓީއަށް ހުށަހަޅައިގެން ވީ ގެއްލުމުގެ އޮޑިޓު ހަދާވާހަކަ މިބޭފުޅުން ދެއްކި ވާހަކަ. މާލޭގެ ރައްޔިތުން ނިކުމެ ރޮއެ އާދޭސް ކުރީމާ، މިއަދު މީން އެއްވެސް ބޭފުޅަކަށް ނުކެރުނޭ އެވާހަކަ ދައްކާކަށް

ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ (ގަޕޯ)

ގަޕޯ ވިދާޅުވީ ރައްޔިތުން ބާރުވެރިކުރުވުމުގެ ވާހަކަ ދައްކަން ސަރުކާރުން ލަދުގަންނަން ޖެހޭ ކަމަށާއި، ރާއްޖެއަށް ޑޮމޮކްރަސީ ގެނައުމުގައި ޕީޕީއެމް/ޕީއެންސީއަށް ނިސްބަތްވާ މީހެއްގެ ގައިން ހިއްލާލި ދާކޮޅެއް ނޯންނާނޭކަމަށެވެ. ސަރުކާރަށް ނިސްބަތްވާ ފަރާތްތަކުން މަސައްކަތްކުރަނީ ހުދުމުހުތާރު ވެރިކަމެއް ކުރަންކަން ފާހަގަކުރައްވައި ގަޕޯ ވިދާޅުވީ، ޑިމޮކްރަސީގެ ނަން ބޭނުންކޮށްގެން ސަރުކާރުން އުޅެނީ ޤައުމު ހަލާކުކޮށް ފަސާދަކުރަން ކަމަށެވެ.